Isaías 25 - Qheshwa Biblia DC

Señorta yupaychanapaj takiy

¹ Señor, qanmin Diosneyqa kanki; pataman sutiykita oqharispa jatunchayki; imaraykuchus t'ukun imasta ruwanki; unaymantapacha unanchasqaykeqa allimpuni cheqataj.

² Llajtasta rumi loqho qontusman tukuchinki. Sumaj jark'achisqa llajtasta raqayman tukuchinki. Enemigospa palaciosninta thuñinki; chaykunataj manaña jayk'ajpis ujtawan ruwakonqankuchu.

³ Chayrayku atiyniyoj runasqa jatunchasonqanku, may jina kallpasapa runaspis manchachikusonqanku.

⁴ Qanqa wajchaj pakakunan kanki, llakisqa pisichikojpaj jark'ajnin, para wayramanta jark'aj, ruphaymanta llanthojtaj. Sajra runaspa samayninkoqa, chiri tiempopi llojlla para perqaman seq'on ajina.

⁵ Ch'aki jallp'api ruphay jina. Qan atiyniyojkuna ch'ajwasqankuta thasnunki. Imaynatachus phuyoj llanthun ruphayta thasnun, ajinata sajra runaspa ch'ajwasqankuta ch'inyachinki.

⁶ Tukuy Atiyniyoj Señorqa Sión orqopi tukuy llajtaspa uj jatun mikhunata ruwanqa, misk'i mikhuykunawan sumaj kaj vinosta ujyachenqa. Chantá sumaj kaj aycha kankasta mikhuchenqa, sumaj allin kaj ch'uwachasqa kaj vinostawan ujyachenqa.

⁷ Kay orqopi Señorqa tukuy llajtasta qhatasharqa. Chayta qhataranqa, tukuy nacionesta uj manta jina qhatasharqa chayta.

⁸ Señorqa wañuyta wiñaypaj chinkachenqa; tukuypaj waqayninta Señorqa pichanqa; ayllumpa mana allimpaj qhawasqa kayninkutataj tukuy jallp'amanta chinkachenqa. Ajinata Señorqa nin.

⁹ Chaypacha nenqanku: Qhawaychej, kaymin Diosninchejqa. Payta maytapuni suyarqanchej. Paytaj salvawarqanchej. Kunanqa kusikunachej jatun kusiywan ajinata salvawasqanchejmanta.

¹⁰ Señorqa makinwan Sión orqota jark'anqa, Moab llajtataj pachampi saronqa, imaynatachus ichhuta q'opata jich'anapi sarunku ajinata.

¹¹ Moabqa puraj makisninta jaywatatanqa, imaynatachus yakupi wayt'aj runa makisninta jaywatatan, ajinata. Chaywampis Señorqa jatunchakuyninta chinkachenqa, jinallataj makisnimpaj kallpantapis.

¹² Señorqa chay chhikachaj jark'akuna sinch'i perqasninta urmachenqa, pampaman choqarqayanqa jallp'aman tukunankama.