Hechos 8 - Qheshwa Biblia DC

Iglesiata Saulo ñak'arichin

¹ Saulotaj qhawallarqa Estebanta wañuchinankuta. Chay p'unchaykunapi Jerusalén iglesiaj contranta oqharikorqanku ñak'arichinankupaj. Tukuynin creejkunataj tukuynejman ch'eqerakorqanku Judeaman, Samariaman ima. Apostolesllaña qhepakorqanku Jerusalempi.

² Khuyakuyniyoj runakuna Estebanta p'ampamorqanku, paymantataj manchayta waqarqanku.

³ Chaykamataj Sauloqa iglesiawan astawan jap'inakusharqa tukuchiyta munaspa. Wasimanta wasi yaykuspataj, creejkunata jawaman orqhomorqa, qharista warmista ima, carcelmantaj wisq'aracherqa.

Evangelio Samariaman chayan

⁴ Jerusalenmanta ch'eqerakoj creejkunaqa, tukuynejman rerqanku evangeliomanta willaspa.

⁵ Felipetaj, Samariaman chayaspa, runasman Cristomanta willarqa.

⁶ Ashkha tantakamoj runakunataj, Felipej nisqanta allinta uyarerqanku, rikorqankutaj jatun milagrosta ruwasqasninta.

⁷ Millay supaykuna ashkha runasmanta sinch'ita qhaparispa llojserqanku. Ashkha suchu runastaj, cojoswan ima thañikaporqanku.

⁸ Ajinamanta Samariapi may kusiy karqa.

⁹ Chay llajtapitaj uj runa Simón sutiyoj karqa. Payqa ñaupajta layqa runa karqa. Chay layqa ruwasqasninwantaj Samariapi runata ch'aukiyarqa, rejsichikuspa jatun atiyniyoj kasqanta.

¹⁰ Tukuy runataj juch'uymanta aswan jatunkama, Simonta allinta uyarispa paymanta nerqanku: Kay qhareqa, Diospa jatun atiynin, nispa.

¹¹ Runakunaqa Simompa nisqanta kasorqanku, unaytaña chay layqeriosninwan paykunata ch'aukiyarqa.

¹² Maypachachus Diospa reinonmanta evangeliota Felipej willasqanta uyarispa creerqanku, Jesucristoj sutinmantawan; bautizakorqankutaj qharis, warmis ima.

¹³ Kikillantataj Simompis creespa bautizachikorqa. Chaymantataj, Felipewampuni karqa, señalesta, milagrostawan ruwakusqanta rikuspa.

¹⁴ Apostolestaj Jerusalempi kashaspa uyarerqanku, Samariapi kaj runakunapis Diospa palabranta jap'isqankuta. Chayta yachaspataj, chayman kacharqanku Pedrota, Juantawan.

¹⁵ Paykunataj Samariaman uraykorqanku, chayaspataj Diosmanta mañakorqanku, creejkuna Santo Espirituta jap'inankupaj.

¹⁶ Santo Espiritutaqa ni mayqenninku jap'isqankurajchu. Paykunaqa Señor Jesuspa sutimpi bautizasqaslla kasqanku.

¹⁷ Chaypachataj Pedrowan Juanwan, creejkunaj patanman makisninkuta churaykorqanku, paykunataj Santo Espirituta jap'erqanku.

^18-19 Simontaj, imaynatachus apóstoles creejkunaj patanman makisninkuta churasqankuta, Santo Espirituta jap'isqankuta ima rikuspa, payqa apostolesman qolqeta qoyta munarqa, nispa: Noqamampis chay atiyta qowaychej, ajinata pimampis makisniyta churajtiy, Santo Espirituta paypis jap'inampaj.

²⁰ Pedrotaj payman kuticherqa: Qolqeyki qanwan tukukuchun, Diospa qosqanta qolqewan rantiyta munasqaykirayku.

²¹ Kay ruwanapeqa mana kanchu parteyki nitaj suerteyki. Sonqoykeqa mana cheqanchu kashan Diospa ñaupaqempi.

²² Chay juchaykita saqespa Diosman kutiriy, Señormanta mañakuspa, ichapis sonqoykipi sajra yuyayniykita pampachapusonqa.

²³ Noqa rikushani jayaqepi kasqaykita, sajraj jap'isqantaj.

²⁴ Simontaj nerqa: Qankuna Diosmanta mañaripuwaychej ama imapis kay nisqaykichejmanta chayamunawampaj.

²⁵ Pedrowan, Juanwan Señorpa palabranta willasqankumanta, Jerusalenman kutiporqanku. Ñanta rej jinataj, Samariaj ranchosnimpi evangeliomanta willarqanku.

Felipe tinkukun Etiopiamanta runawan

²⁶ Chay qhepatataj Diospa angelnin Felipeman nerqa: Jatarispa riy ura kaj ñanman. Chay ñanqa, Jerusalenmanta llojsimuspa Gaza llajtaman rishan ch'in pampanejta.

²⁷ Felipetaj jatariytawan rishaspa, Etiopiamanta eunuco runawan tinkukorqa. Chay runaqa atiyniyoj karqa. Jatun kamachej Candace warmej kapuyninta waqaychaj. Payqa Jerusalenman Diosta yupaychaj jamusqa.

²⁸ Carrompi tiyaspa llajtaman kutipushaspataj, profeta Isaiaspa escribisqanta leesharqa.

²⁹ Santo Espiritutaj Felipeman nerqa: Qayllaykuy jaqay carroman.

³⁰ Felipetaj qayllaykuspa, eunuco runata uyarerqa, imatachus profeta Isaiaspa escribisqanta leesqanta. Taporqataj: Entiendenkichu imatachus leesqaykita?, nispa.

³¹ Etiope runataj kuticherqa: Imaynamantataj yachasaj mana pipis sut'inchawajtinri? Felipetataj wajyarqa carronman, wicharispa ladonman tiyaykunampaj.

³² Escribisqapi qhawasharqa chay cheqapi, kay jinata nerqa: Paytaqa ovejata jina ñak'anankupaj aparqanku; imaynatachus oveja millmanta ch'inllamanta ruthuchikun; ajinallatataj paypis mana siminta kicharerqachu.

³³ Ñak'ariynimpi karqa. Paywan cheqan kajta mana ruwarqankuchu. Pitaj mirayninmanta willanqari? Kay pachapi qhechorqanku paypa kausayninta.

³⁴ Eunucotaj Felipeman nerqa: Willariway ari, pimantataj profeta kayta nishanri? Pay kikinmantachu, chayrí wajmantachu parlashan?

³⁵ Felipetaj yachachiyta qallarerqa. Kay escrituramantapacha qallarispa willarqa Jesusmanta.

³⁶ Ñanta rishaspataj chayarqanku maypichus yaku karqa chayman. Eunucotaj Felipeman nerqa: Qhawariy kaypi yaku kasqa, atikunmanchu noqa bautizachikunayqa? [

³⁷ Felipetaj payman nerqa: Sichus cheqamanta tukuy sonqoykiwan creenki chayqa, atikun bautizachikunayki. Eunucotaj kuticherqa: Arí creeni, Jesucristoqa Diospa Churin kasqanta.]

³⁸ Felipetaj kamacherqa carronta sayachinanta. Iskayninkutaj uraykuspa yakuman yaykorqanku, Felipetaj payta bautizarqa.

³⁹ Yakumanta llojsimusqankumantataj, Diospa Espíritun Felipeta pusakaporqa. Etiopeqa Felipeta mana rikorqañachu. Ñannintataj may kusisqa riporqa.

⁴⁰ Chay qhepata Felipeqa, Azoto llajtapi rikhurerqa. Chaymantataj llajtamanta llajta purispa, evangeliomanta willarqa, Cesarea llajtaman chayanankama.