Génesis 49 - Qheshwa Biblia DC

Jacobpa wañupunan patapi nisqan

¹ Jacobqa tukuynin wawasninta wajyachispa nerqa: Qayllamuwaychej wawasníy, noqaqa nisqaykichej imaschus qankunapaj qhepaman kananta.

² Astawan qayllamuychej, uyariychej Jacobpa wawasnin, uyariychej tataykichejta.

³ Qanqa Rubén kuraj waway kanki; kallpay, tukuy kallpaymanta phiwi waway, kuraj kaj runa kayniypi, kuraj kaj tukuy atiypi.

⁴ Kunanqa manaña ñaupaj kajchu kanki, imaraykuchus qanqa ashkha corrishaj yaku jina kanki, qan puñunayta ch'ichichapuwanki, warmisaywan puñuspa.

⁵ Simeonwan Leviwan wauqesnintin kanku, armasninkoqa juchachakuy armas kanku ujllata sakeyanapaj jina.

⁶ Mana jayk'ajpis kayta munanichu tantakuyninkupi! Phiñasqa kashaspa runata wañucherqanku; allin sonqonkupi kashaspataj torosta cojosta saqerqanku.

⁷ Maldicisqa kachun chay phiñakuyninku, imaraykuchus millay chay phiñakuyninkorqa. Tukuynejman ch'eqerachisaj tukuyninta Israel ukhupi.

⁸ Judá, wauqesniykeqa mayta alabasonqanku. Enemigosniykita much'usninmanta jap'inki. Kikin wauqesniyki qanman k'umuykusonqanku.

⁹ Qanqa, Judá wawáy. Qan kanki león uña jina; maypachachus aycha mikhunaykita qhechuyta munasunku chayqa, pampaman winkuykunki uj jatun leompis kawaj jina. Pitaj payta toreanmanri?

¹⁰ Ni pi qhechonqachu Judaj atiyninta, ni makimpi kashaj chay tojnuntapis, chay tojnuyoj chayamunankama, pitachus tukuy llajtas kasonqanku.

^11-12 Pichus burritonta uvas chajraman watajpata, pichus uvas ch'irwasqaman p'achasninta t'ajsajpata, aswan yanas ñawisnenqa vinomanta nisqaqa, kirusnimpis aswan yurajkuna lechemanta nisqaqa.

¹³ Zabulonqa tiyakonqa mar qochas cantosnejpi, maypichus barcos kanqanku sayanankupaj. Mojonesninkutaj Sidonkama kanqa.

¹⁴ Isacarqa uj carguero burro jina kanchampi wijch'ukoj.

¹⁵ Maypachachus tukuy ima allillan kajtin, sumajta samarikunapaj chay cheqa kajtin, wasanta rikucherqa cargata q'epinampaj, mana imata nispataj wata runaman tukun.

¹⁶ Danqa kikin runasninta cheqanchanqa, ujnin Israel aylluta jina.

¹⁷ Danqa uj katari jina kanqa, ñampi winkushaj, caballospa chakisninta khanispa, caballospi rejta urmachin.

¹⁸ Señorníy, suyarqani qan salvanawaykita!

¹⁹ Gadta uj t'aqa soldados maqaspa qhatiyachanqa, payri ujllata atipanqa.

²⁰ Aserqa ashkha t'antayoj kanqa, reyespa mikhunan jina.

²¹ Neftaleqa taruka jina munasqampi purikoj, payqa k'acha uña tarukitasniyoj jina.

²² Joseqa yaku cantopi kashaj sach'aj ch'illchisqan jina. Sumajtataj poqon, ramasnintaj perqa patasta ch'iparikun.

²³ Arcoswan flechaspa wañuchejkuna sapa kuti toreallankupuni.

²⁴ Josejtari makisnin manchay kallpasniyoj. Pay sumajta arcosta jap'in. Jacobpa atiyniyoj Diosninrayku, Israelta michejninrayku, waqaychajninraykutaj.

²⁵ Tataykej Diosnin qanta yanapasuchun, tukuy atiyniyoj Dios, bendicisuchun janaj pacha bendicioneswan, musphay ukhu mar qochaj bendicionninwan. Qanmanta mirajkuna warmis ashkha wawasniyoj kachunku.

²⁶ Qanta astawan tatayki bendicisonqa, tataypa bendiciwasqanmanta. Mana tukukuy atej orqoskama kanqa kay bendicionesqa, Josej uman patapi, pay ajllasqa karqa wauqesnin chaupimanta.

²⁷ Benjamenqa uj suwa atoj jina, tutamanta mikhun imatachus wañuchisqanta, ch'isiyaykuytataj puchuchisqasninta rak'iran.

Jacobpa wañuynin

²⁸ Kaykuna kanku chunka iskayniyoj Israel ayllus. Kaytataj tatanku sapa uj wawasninman bendicishaspa nerqa.

²⁹ Chaymantataj nerqa: Wañuy patapiña kani wawasníy, p'ampaykapuwaychej ari ñaupa tatasniywan khuska Efrón hitita jallp'api kaj cuevapi, maypichus tatasniy kashanku chaypi.

³⁰ Chayqa kashan Canaán jallp'api, niyta munan maypichus Abraham ranterqa Efrón jallp'atawan khuska, chaypi p'ampakunankupaj. Chay cuevaqa kashan Macpelapi, Mamrej chimpampi.

³¹ Chaypi Abrahamta p'amparqanku, warmin Sarata; Isaacta, warmin Rebecata; chayllapitaj Leatapis p'amparqa.

³² Chay cueva maypichus kashan chay jallp'ataqa Hetpa wawasninmanta ranterqa.

³³ Kay imasta wawasninman niytawantaj, Jacobqa camanman siriykuspa kikimpi wañuporqa, tatasninwan tinkumunampaj.