Génesis 44 - Qheshwa Biblia DC

Josej ujyanan copa

¹ Chay qhepatataj Joseqa mayordomonman nerqa: Kay runaspa costalesninman trigota junt'a sirapuy maytachá atisqankuta apakunankupaj, qolqe pagasqasninkutataj sapa ujninkoj costalesninkoj simisninman siraykuranki.

² Qolqe copaytataj sullk'a kajpa costalninman churaykunki, trigomanta qowasqan qolqetawan khuska, nispa. Mayordomotaj chay nisqanman jina kikinta ruwarqa.

³ Tutamanta inti phawarqamuytataj Joseqa wauqesninta kachaporqa burrosninkupi chajnarisqasta.

^4-5 Llajtamanta manaraj karuta rishajtinkutaj Joseqa mayordomonman yachaykucherqa: Chay runasta qhatiriy, taripaspataj ninki: Imaraykutaj patronniyman kutichinkichej allinmanta mana allintari? Ima nispataj qolqe copanta suwamunkichejri, patronniypa ujyananta, qhawaspataj imatapis yachanantari? Kaytaqa mana allintachu ruwankichej.

⁶ Mayordomoqa paykunata taripaytawan kikin palabraswan nerqa.

⁷ Paykunataj kuticherqanku: Imaraykutaj qan chay imasta nishawaykuri? Noqaykoqa ni jayk'aj chay jinata ruwayta yachaykuchu.

⁸ Qan yachanki jina noqaykoqa qolqetapis kutichimpuyku Canaanmantapacha sapa ujniykojpi rikhurejta. Ima nispataj suwaykumanri patronniykej wasinmanta qorinta qolqentapisri?

⁹ Mayqen kamachiykejpichus rikhurenqa chayqa, wañuchun; noqaykuntin kamachisniyki kasqayku.

¹⁰ Mayordomotaj paykunaman nerqa: Qankunaj nisqaykichejman jina, ajina kachun; chaywampis pejpapichá rikhurenqa chay kajlla kamachimanta qhepakonqa, wakenqa ripullankichej.

¹¹ Sapa ujninku burrosninkumanta usqhayllata cargasta chajnaraytawan, costalesninkuta phaskaraspa qhawaykorqanku.

¹² Mayordomotaj cantollamanta qhawararqa kuraj kajmanta qallarispa sullk'a kajpakama, jinaspataj tarerqa Benjamimpapi qolqe copata.

¹³ Paykunataj tukuyninku p'achasninkuta llakiywan llik'irakorqanku. Jinaytawantaj sapa ujninku burrosninkuman chajnaykuytawan llajtaman kutirerqanku.

¹⁴ Judá, wauqesninwan Josej wasinman chayanankupaj chayllapiraj kasharqa Joseqa. Paykunataj qayllaykuytawan qonqoriykukorqanku pampaman umankuta chayachinankukama.

¹⁵ Josetaj paykunaman nerqa: Imatataj kayta ruwawankichejri? Manachu yachankichej noqa jina runaqa chayta qhawaspa imatapis yachasqanta?

¹⁶ Judataj kuticherqa: Wiraqochi, imatataj astawan qanman nisqaykuri? Imaynamantataj kunan noqayku willasqayku mana suwaschu kasqaykutari? Dios taripawayku juchayku patapi. Kunanqa makiykipi kayku; kamachisniyki kayku, pejpapichus copayki rikhurin chaywan khuska.

¹⁷ Josetaj nerqa: Qankunaqa mana ima kashajtimpis kamachisniy kayta atinkichejchu? Mayqenniykichejpapichá copay rikhurin, chay kajlla kamachiy kanqa. Wakenqa kutipullaychej ama imamantapis llakikuspa tataykichejpa wasinman. Manataj pipis ima nisonqachejchu.

Judá mañakun Benjaminrayku

¹⁸ Judaqa Joseman qayllaykuspa nerqa: Wiraqochíy, ujta mañarikuyki, saqeriway ari sapallaykipi qanwan parlarejta. Ama ari phiñakuwaychu, qanqa kanki kikin faraompis kawaj jina.

¹⁹ Qan tapuwarqayku tatayku tiyanchus manachus chayta, jinallataj wauqeykupis tiyanchus manachus chayta.

²⁰ Noqaykutaj willarqayku tatayku kasqanta, machuñataj kasqanta, jinallataj wauqeykupis kasqantaraj uj wayna, mayqenchus nacesqanta tatayku machuña kashajtin. Chantá nillarqaykutaj tataykoqa maytapuni chay wawanta munakusqanta, pay k'atataj kausashasqanta uj mamayojmanta, ujnin kajtaj wañupusqanta.

²¹ Chaymantaqa qantaj niwarqayku pusamusunaykuta qan rejsiyta munasqaykirayku.

²² Noqaykutaj nerqayku waynaqa tatanta manaña saqerpayayta atisqanta, sapanta saqenman chayqa wañupunman.

²³ Noqaykutaj payta mana pusamuspaqa manaña jamunaykuchu karqa qanwan tinkoj.

²⁴ Noqaykutaj chayta tataykuman willarqayku imachus kasqanta, kaymanta kutiytawan imastachus qan niwarqayku chayta.

²⁵ Chaymantataj tataykoqa niwarqayku: Ujtawan kutispa trigota rantej jamunaykuta.

²⁶ Noqaykutaj nerqayku: Noqaykoqa manapuni riykumanchu, manachus sullk'a wauqeykuta pusasqayku chayqa. Imaraykuchus jaqaypi wiraqocheqa niwayku pay pusarisqapuni chayanaykuta, mana jina kajtenqa mana chayanaykuchu.

^27-28 Tataykutaj nillawarqayku: Qankuna yachankichej, warmeyqa iskay wawasllata saqewasqanta; ujnin kaj ñaupaqeymanta rispa chinkan, chaymantapacha manaña rikunichu. Cheqamanta ima sajra animaleschus mithaykunkupis.

²⁹ Sichus kay uj wawaytawan pusankichej, imanakonqataj chayqa, qankuna juchayoj kankichej kay achachi llakiywan wañunampaj.

^30-31 Ajina ari, tataykoqa maytapuni munakun kay waynata. Manapuni paymanta kacharikuyta munanchu. Chayrayku sichus kay wayna mana noqaykuwan kutenqa chayqa, achachi tatayku wañuponqa llakiywan mana payta rikuspa. Ajinamanta noqayku juchayoj kasqayku, achachi tatayku llakiywan wañupunampaj.

³² Noqa tatayman nerqani: Noqa cuentayoj kanayta kay waynamanta, chanta nillarqanitaj: Noqa mana kutichipusqayki chayqa, noqa juchayoj kasaj qampa ñaupaqeykipi wiñaypaj, nispa.

³³ Chayrayku wiraqochíy, niway ari noqa kamachiykimanta qhepakunayta, kay waynaj cuentanmanta. Payta saqellay ari ripunanta wauqesniywan.

³⁴ Imaynatataj kunan noqaqa mana paywan chayasajri? Mana pay noqaykuwan kutipojtenqa, mana rikuyta munanichu tatay llakiywan, t'ukuwan ima jap'ichikunanta.