Deuteronomio 3 - Qheshwa Biblia DC

Israelitas atipanku Basanmanta rey Ogta

¹ Chaymantaqa Basán ñantañataj jap'irerqanchej, Basanmanta rey Ogñataj tukuy soldadosninwan Edreipi maqanakoj llojsimuwarqanchej.

² Señortaj niwarqa: Ama paymanta manchachikuychu, imaraykuchus noqa makiykiman churasaj, tukuy runasninta, jallp'anta ima munasqaykita ruwanaykipaj, imaynatachus Hesbonmanta amorreos rey Sehonta ruwarqanki ajina, nispa.

³ Ajinata Señor Diosninchejqa makisninchejman Basanmanta rey Ogtapis churarqa, tukuy soldadosninta ima. Tukuyninkutapuni wañuracherqanchej.

⁴ Jinamanta tukuy llajtasninkuman yaykorqanchej, chaypacha ni uj llajtata qhepacherqanchejchu. Tukuynimpi karqanku sojta chunka llajtas. Chaykuna karqa tukuynin Argob jallp'aspi, Basanmanta rey Ogpa kamachinan llajtas.

⁵ Tukuynin chay llajtas sumaj perqaswan muyurichisqas karqanku, chanta punkusniyoj, sumaj sayachisqa postesniyoj; wakin llajtastaj mana perqasniyojchu karqanku. Chaykunaqa mana yupasqaschu karqanku.

⁶ Ajinata chaykunata chinkacherqanchej, imaynatachus Hesbonmanta rey Sehompa jallp'asninkuna ruwarqanchej ajinata tukuy llajtaspi qharista, warmista, wawasta ima wañuchispa.

⁷ Chaymantaqa qhepacherqanchej uywasllataña, imaschus allinkuna enemigosninchejpata karqa chaykunatawan.

⁸ Ajinata chay p'unchaykunapi iskaynin rey amorreospa jallp'asninkuta jap'ikaporqanchej. Paykunaqa Jordán mayoj inti llojsimuynimpi tiyakorqanku, Arnón mayumantapacha Hermón orqokama.

⁹ Chay Hermón orqota Sidonmanta kajkuna suticharqanku Sirionta, amorreostaj Senirta.

¹⁰ Tukuy chay pampa llajtasta, tukuynin Galaadta, Basantawan jap'ikaporqanchej Salcakama, chanta Edreikama ima. Chay llajtasqa Basanmanta rey Ogpa kamachinasnin karqanku.

¹¹ Basanmanta rey Ogllaña qhepakorqa tukuynin refaíta runasmanta kaj. Sepulturanqa rumimanta ruwasqs karqa. Chay rumeqa sayt'unman karqa tawa chunka metros, kinrayninmantaj yaqha iskay metros jina. Chay sepulturaqa kunankama kashan amonitaspa llajtan Rabapi.

Jordán mayu chimpapi tiyakojkuna ayllus

¹² Chay qhechusqanchej jallp'asmantaqa Rubén aylluman, Gad ayllumanwan qoporqani, Arnón mayu cantopi kaj chay jallp'asta, Galaad orqospi khuskanninkama tukuy llajtasnintinta.

¹³ Manasespa khuskan ayllunmantaj qorqani Galaadpa khuskan jallp'asta, tukuynin Basán jallp'astawan. Chay jallp'asqa rey Ogpata karqanku. Chaymanta qollarqanitaj tukuynin Argob jallp'astawan. Chaykuna rejsisqas karqanku refaitaspa jallp'asnin jina.

¹⁴ Manasespa wawan Jair, Argob jallp'asta jap'ikorqa Gesurmanta, chanta Maaca jallp'a muyuynimpa tinkuyninmantapacha. Chaymantataj suticharqa kikin sutillanwantaj chay Basán jallp'asta, Havot-jair, nispa. Jinamanta chay jallp'aqa kunankama chay sutillawampuni kashan.

¹⁵ Galaad jallp'asta Maquirman qoporqani.

¹⁶ Wakin Galaad jallp'astataj qoporqani Rubén aylluman, Gadpa ayllunmanwan, Galaadwan Arnón mayuwan tinkuy jallp'asta. Chaypa mojonnenqa karqa khuskan vallemanta, Jaboc mayukama, chayqa karqa amonitaspa mojonninwan tinkuyña.

¹⁷ Chaymantaqa qollarqanitaj inti llojsimuypi Pisga orqo kinraypi Arabá jallp'asta. Chayqa karqa Jordán mayuwan tinkuykama. Chaymanta rillarqapuni Cineret qocha cantonta millu qochakama. Chayqa wañusqa qocha nisqa karqa.

¹⁸ Chaypacha noqaqa kay jinata qankunaman kamacherqaykichej: Kay jallp'asta Señor Diosniykichej qankunaman qopusunkichej. Kunanqa tukuy maqanakuyta yachajkunaqa maqanakunasniykichejta oqharikuspa wauqesniykichej israelitaspa ñaupaqenta puririychej.

¹⁹ Qorqaykichej chay llajtaspi qhepakuchunku warmisniykichej wawasniykichej, tukuy uywasniykichej imalla. Noqa yachani qankunajtaqa uywasniykichej ancha ashkhas kasqankuta.

²⁰ Qankunaqa israelita wauqesniykichejwan khuska rinaykichej tiyan, Jordán mayu chimpapi Señor Diosniykichej paykunaman jallp'ata qonankama qankunaman jina, chaymantaraj qankunaqa kutimpunkichej qorqaykichej chay jallp'asman.

²¹ Chaypacha Josueman kay jinata nerqani: Qan kikiyki rikorqanki, Señor Diosniyki imaynatachus kay iskay reykunawan ruwasqanta. Kikillantataj ruwanqa waj reykunawampis may llajtastachus pasanki chaykunapi.

²² Paykunamanta amapuni manchachikunkichejchu. Señor Diosniykichej qankunarayku maqanakonqa.

Señorqa mana saqenchu Moisés Canaanman yaykunanta

^23-24 Chay kikimpacha Señorman mañakorqani: Señor Diosníy, qan kikiyki kay kamachiykiman rikuchiwarqanki may jatun kayniykita, may chhikan atiyniykitawan. Mana waj Diosqa qan jina kanchu janaj pachapi, nitaj kay pachapipis may chhika k'acha imasta qan jina ruwajqa.

²⁵ Mañakuyki ari: Jordán mayuta chimpachillaway ari, Señor. Noqaqa chay chhika k'acha jallp'ata, k'acha orqosta, Libanotawan rikumuytapuni munani, nispa.

²⁶ Señortaj mayta phiñakuwarqa qankunaj juchasniykichejrayku. Mana uyariwarqachu imatachus mañakusqayta. Manachayqa niwarqa: Kaykamalla qanwanqa. Amaña kay imasmanta parlawaychu.

²⁷ Aswan jatun kaj Pisga orqoman wichariy, chaymanta qhawariy patanejman, uranejman, inti llojsimuynejta, inti yaykuynejtawan. Jordán mayutaqa qan manaña chimpankichu.

²⁸ Josueman sumajta yachachiy, sonqochay, kallpachaytaj sumajta. Payqa israelitasta pusanqa. Payqa jallp'asta rak'enqa paykunaman, ima jallp'atachus kunan rikumunki chayta.

²⁹ Jinamanta vallepi qhepakorqanchej Bet-peorpa chimpampi.