Deuteronomio 18 - Qheshwa Biblia DC

Sacerdote levitas imastachus ruwanankumanta

¹ Leví aylloqa sacerdote ayllu nisqa mana jallp'asniyojchu, nitaj chayaqeyojchu kanqa israelita masisninku ukhupi. Manachayqa paykunaqa kausanqanku Señorman apasqa rikuchikusmanta, Señorpa chayaqenmanta ima.

² Paykunaqa mana chayaqeyojchu kanqanku israelita masisninku ukhupi. Paykunaj chayaqenkoqa Señorllamin, imaynatachus nisqanman jina.

³ Israelitas rikuchikusta Señorman, torosta, ovejasta ima apasqankumanta, kaykuna sacerdotespaj kanqa: Wasa aychas, uya aycha, wijsa aycha ima.

⁴ Jinallataj sacerdotespaj kanqa, ñaupaj poqoykunata apasqankumanta: Trigota, vinota, aceiteta, ñaupaj ruthuy millmasta ima.

⁵ Paykunataqa Señor Diosniykichej ajllakun ayllus chaupimanta, Señorta yupaychachinankupaj. Paykuna mirayninkupis wiñaypaj.

^6-7 Levitasqa mayqen Israel llajtallamantapis jamojtinku tukuy sonqo Señorpa ajllakusqan cheqaman, Señor Diosnimpa sutimpi atenqanku ruwayta imaynatachus tukuy levita masisninku Señorpa ñaupaqempi ruwanku ajinata.

⁸ Mikhunankupajqa imatachus tukuy levitas mikhunku, chayllatataj jap'enqanku. Chanta jap'illanqankutaj tatasninkoj chayaqentapis.

Waj nacionespa ruwasqankutaqa mana qhatinachu

⁹ Maypachachus yaykunkichej Señor Diosniykichej qosonqachej chay jallp'aman, ama chaypi kaj runas jina millaykunata ruwayta yachakunkichejchu.

^10-11 Amapuni ni mayqenniykichej wawasniykichejta rikuchikuta jina qonkichejchu ninapi ruphachispa. Amapuni ni mayqenniykichej suerte watunata ruwankichejchu, ni qhepaman imachus kananmantapis yachaj tukunkichejchu, layqakuytapis ama yachankichejchu, ama mayqentapis t'ukuchinkichejchu, ama suerteta watojkunata tapukunkichejchu, ama almasta wajyachinkichejchu. Amallataj wañusqastapis tapuchinkichejchu.

¹² Señorqa millachikun chaykunata ruwaykunamantaqa. Señor Diosniykichejqa chay nacionesta ñaupaqeykichejmanta wijch'orqa chay millaykunata ruwayta yachasqankumanta.

¹³ Qankunaqa Diospa ñaupaqempi cheqan sonqoyojpuni kanaykichej tiyan.

¹⁴ Chay nacionesqa mayqenkunajtachus jallp'asninkuta jap'ikapunkichej chaykuna, layqasta, suerte watojkunata ima uyarinku. Señor Diosniykichejqa mana munanchu qankunaqa chaykunata ruwanaykichejta.

Dios nin uj sut'inchajta kachamunanta

¹⁵ Señor Diosniykichejqa qankuna ukhumanta uj sut'inchajta noqata jina sayarichipusonqachej, qankunataj payta kasunkichej.

¹⁶ Qankunaqa chaytapuni Señor Diosniykichejmanta Horeb orqopi mañakorqankichej, maypachachus chaypi ujllapi tantakorqankichej, kay jinata nispa: Mana ujtawan uyariyta munaykuchu Señor Diosniykoj parlamusqanta, nitaj kay jina jatun ninata rikuyta munaykuchu ama wañunaykupaj.

¹⁷ Chaypacha Señorqa niwarqa: Nisqankoqa walejpacha.

¹⁸ Noqa paykunapaj uj sut'inchajta ayllu masinku ukhumanta rikhurichimusaj qan kikinta, paykunaman noqaj nisqayta ninampaj, imatachus paykunaman kamachisqayta.

¹⁹ Pi runallapis mana uyarinmanchu imatachus chay sut'inchaj noqaj sutiypi parlanqa chayqa, chay runamanta noqa cuentata mañasaj.

²⁰ Sichus mayqen sut'inchaj runa wapuykachaspa noqaj sutiypi parlayta munanman, noqa mana kamacherqanichu chayta; chayri waj dioskunaj sutimpi parlanqa chayqa, chay runa wañuchisqa kanqa.

²¹ Ichapis sonqoykichejpi niwajchej, imaynapitaj yachasqayku chay palabraqa mana Señorpa palabran kasqantari?, nispa.

²² Sichus chay sut'inchaj Señorpa sutimpi parlasonqachej, nisqanta manataj junt'anchu chayqa, ajinamanta yachankichej chay palabrataqa mana Señorchu nisqanta. Manachayqa chay sut'inchaj jinata parlan wapuykachaspalla. Chay sut'inchajmanta ama manchachikuychejchu.