Daniel (hebreo) 3 - Qheshwa Biblia DC

Qorimanta ruwasqa lantita yupaychaynin

¹ Rey Nabucodonosorqa uj qori lantita ruwacherqa, chay lantej sayaynin karqa kinsa chunka metroyoj, p'altantaj kinsa metroyoj karqa. Kamacherqataj sayachinanta Babiloniapi kaj Dura pampapi.

² Chanta kamacherqa wajyachinankuta kamachejkunata tukuyninkuta, soldadospa kurajninkuta, provinciaspi kamachejkunata, sumaj yuyayta qojkunata, ramasqa qolqeta jap'ejkunata, juezkunata, aswan kurajkunata, provinciasmanta autoridadesta ima, lantita ruwacherqa chayta sayarichejta qhawanankupaj.

³ Tukuy paykuna chay lantej ñaupaqenman tantakamorqanku lantita sayarichejta qhawanankupaj.

⁴ Chay lantita sayarichiyta qallarichinampaj churasqa karqa chayqa, jatunmanta qhaparispa kamacherqa: Tukuynej llajtasmanta, nacionesmanta, tukuy laya parlayniyojkunataj uyariychej, nispa.

⁵ Putututa, pinkilluta, bombota, arpata, salteriota, zampoñata tucuynin chay tocanasta ch'ajwarejta uyariytawankama qonqorikunkichej, yupaychankichejtaj, rey Nabucodonosor ruwacherqa chay qori lantita.

⁶ Tukuy pikunachá mana qonqorikonqankuchu, nitaj chay lantita yupaychanqankuchu chaykunaqa, chay rato uj larwashaj hornoman wijch'uykusqas kanqanku.

⁷ Ajinataj ari, ashkha tantakamorqanku chay runakunaqa, tocanasta ch'ajwarejta uyariytawankama qonqorikorqanku, yupaycharqankutaj chay qorimanta ruwasqa lantita.

^8-9 Wakin runakuna Caldeamanta karqanku, paykunataj rey Nabucodonosorman jamuspa judiokunata ch'ataykorqanku, nerqankutaj: Jallp'a jallp'a, wiñaypaj rey kanki, sutiykita yuyarisqapuni kachun.

¹⁰ Reyníy, qan kamacherqanki runakunata tukuyninku qonqorikunankuta, qorimanta ruwasqa lantitataj yupaychanankuta, tukuy tocanasta ch'ajwarejta uyariytawan.

¹¹ Pillapis mana jinata ruwajta uj larwashaj hornoman wijch'uykusqa kananta ninki.

¹² Kunanqa tiyan wakin judiokuna. Paykunataqa qan churarqanki Babilonia llajtapi kamachejkuna kanankupaj. Kunantaj paykunaqa mana uj pisillatapis qampa rey kasqaykita respetashankuchu, ni dioskunata, nitaj qan ruwacherqanki chay qori lantitapis yupaychankuchu. Paykuna kanku Sadrac, Mesac, Abed-nego ima.

^13-14 Chanta Nabucodonosorqa manchayta phiñakorqa, kamacherqataj ñaupaqenman pusarichimunankuta Sadracta, Mesacta, Abed-negotawan. Paykunata ñaupaqenman pusachimuspataj, tapurerqa: Cheqamanta qankuna mana yupaychankichejchu diosniykunata, nitaj qorimanta ruwacherqani chay lantitapis?

¹⁵ Kunanqa, kasukunkichejchu, pututu waqajtinkama, tukuy tocanasta ch'ajwarejta uyariytawankama qonqorikunkichejchu, noqa ruwacherqani chay lantitapis yupaychankichejchu? Sichus payta mana yupaychankichejchu chayqa, kunampacha uj nina larwashaj hornoman wijch'uykusqas kankichej. Chaypacha, ima diostaj qankunata salvayta atisunkichejri?

¹⁶ Kinsantin waynastaj kuticherqanku: Kaymantaqa mana ima parlaypis kanchu, nispa.

¹⁷ Noqayku yupaychayku chay Diosniyku salvayta atiwasqayku nina larwashaj hornomanta, tukuy laya sajrata ruwayta yuyashawayku rey kayniykipi chaykunamantapis salvawasqaykupuni.

¹⁸ Mana salvawaykuman chaypis, yachay allinta reyniyku, manapuni dioskunasniykitaqa yupaychaykumanchu, nitaj qonqorikusqaykuchu, qorimanta ruwasqa chay lantiykimampis.

Kinsantin waynas nina larwashaj hornomanta salvasqas

¹⁹ Maypachachus Nabucodonosor chay nisqankuta uyarerqa, chay rato uyan pukayarqa rabiamanta, kinsantin waynaspa contrampi. Chanta kamacherqa, hornota imaynatachus q'oñichej karqanku chaymanta qanchis kutikama aswan ruphata q'oñichinankuta.

²⁰ Kamachillarqataj ejercitonmanta wakin kallpasapa soldadosnin, Sadracta, Mesacta, Abed-negotawan wataykunankuta, wijch'uykunankutataj nina larwashaj hornoman.

²¹ Kinsantin waynasta, jatun kargonkupi churakoj kanku chay p'achasninkuwan kashajtinkuraj wataykorqanku. Chantá larwashaj nina hornoman wijch'uykorqanku.

²² Reytaj kamacherqa chay ratopacha kamachisqanqa junt'akunanta, hornotaj manchay pareqa karqa, chayrayku nina larwayqa wijch'uykojkuna soldadokunata wañuracherqa, chay kinsa waynakunata wijch'uykushajtinku.

²³ Chay kinsa waynakunataj nina larwashaj horno ukhuman urmaykorqanku.

²⁴ Chaypacha Nabucodonosorqa usqhayllata sayarerqa, may mancharisqataj yanapajninkunata nerqa: Manachu kinsa qharikunallata watarasqata ninaman wijch'uykorqanchejri? Ajina karqa, nispa kuticherqanku.

²⁵ Noqa rikuni tawa qharikunata phaskarasqasta. Mana imanasqaslla nina chaupipi purikushanku. Tawantinmanta uj kajtaj uj dioskunaj wawanman rijch'akun.

²⁶ Kayta nispataj, Nabucodonosorqa horno punkuman qayllaykorqa, qhaparerqataj: Sadrac, Mesac, Abed-nego, may jatumpi Diospa kamachisnin, llojsimpuychej, jampuychejtaj kayman!, nispa. Kinsantin llojsimorqanku nina chaupimanta.

²⁷ Jaqay naciompi kaj tukuy jatun kamachejkuna, chay runakunaman qayllaykorqanku, paykunaj cuerposninkoqa mana q'asparasqachu karqanku ninawanqa. Rikorqankutaj ni uj chujchallankutapis umankumanta nina ruphasqanta, ni p'achasninkupis imanasqachu kasqanku, nitaj nina q'apayllapis yachakorqachu.

²⁸ Chay ratopi Nabucodonosor jatunmanta qhaparerqa: Yupaychasqa kachun Sadracpata, Mesacpata, Abed-negojpatawan Diosninkoqa. Pay angelninta kachamorqa salvanampaj. Paykunaqa mana junt'arqankuchu reypa kamachisqanta. Astawampis wañuyta munarqanku manapuni munaspa, paykunaj Diosninkumanta waj diosman qonqorikuyta, yupaychaytataj!

²⁹ Kunanqa noqa kamachini, pillapis kay waynakunaj Diosninkoj contrampi sajrata parlanqa chayqa, wañuchispa ukhuntaqa khuchuraspa choqarasqa kachun, wasintaj phirisqa kachun. Mayqen nacionmantapis kachun, chayri mayqen parlayniyojpis kachun, imaraykuchus mana waj dios kanchu chay jinata salvajqa.

³⁰ Chay ratomantapacha reyqa, chay kinsa waynasman aswan sumaj jatuchej cargosta qorqa Babilonia llajtapi.