2 Tesalonicenses 2 - Qheshwa Biblia DC

Cristota qhesachajpa jamuynin

^1-2 Kunanqa, hermanos, mañakuyku Señorninchej Jesucristoj jamuyninmanta, paywan tantakunanchejmantawan, ama yuyayniykichejta usqhayllata kuyuchinaykichejta, nitaj musphanaykichejta, ni ima espiriturayku, ni ima parlayrayku, nitaj ni ima cartarayku, noqaykojpatapis kanman jina, Señorpa p'unchayninñapis ancha qayllapiña kashanman jina.

³ Ama piwampis, ni imaynamanta ch'aukiyachikuychejchu, imaraykuchus ñaupajta femanta t'aqakuyraj jamunan tiyan; chay qhepatataj juchallikoj runa rikhurimonqa, wañuypaj t'aqasqa runa.

⁴ Payqa sayaykukonqa, oqharikonqataj tukuy ima Dios sutichasqaj contrampi, chayrí yupaychanaj contrampi; Diospa templonman yaykuspataj Dios jina tiyaykukonqa, kikin Diospis kanman jinataj rikuchikonqa.

⁵ Manachu yuyarikunkichej qankunawan kashaspa kay imasmanta qankunaman willasqayta?

⁶ Kunantaj yachankichej pichus payta jark'asqanta, maychus tiempompi rikhurimunanta.

⁷ Chay pakasqa sajra ateyqa, ñapis llank'ashanña; payqa suyashan jark'ajqa chaupinmanta orqhosqa kanallanta.

⁸ Chaypachataj chay sajra runa rikhurimonqa. Paytataj Señorqa simimpa samayninwan wañuchenqa, jamuynimpa k'anchayninwantaj phirenqa.

^9-10 Jaqay sajra runaj jamuynenqa, Satanaspa ruwayninwan kanqa, tukuy atiywan, jatuchaj rikuchinaswan, llulla milagroswan ima, tukuy ima llullakuywan wañuyman rejkunapaj; imaraykuchus chay runasqa cheqa kaj munakuyta mana jap'erqankuchu, salvasqas kanankupaj.

¹¹ Chayrayku, Diosqa paykunaman pantachej atiyta apachimun, llulla kajta creenankupaj.

¹² Tukuyninkutaj juchachasqas kanqanku; imaraykuchus cheqa kajta mana creerqankuchu, astawanqa sajra kajta kusiywan qhaterqanku.

Salvakunankupaj ajllasqas

¹³ Noqaykoqa qankunamanta Diosman graciasta qonaykupuni tiyan, Señorpi munasqa hermanosníy, imaraykuchus Diosqa qankunata qallariymantapacha ajllasorqachej salvaciompaj, Espíritoj llimphuchaynimpi, cheqa kaj fepitaj.

¹⁴ Chaypaj wajyasorqachej evangelioykunejta, Señorninchej Jesucristoj janaj pacha k'anchayninta tarinaykichejpaj.

¹⁵ Chayrayku, hermanos, sinch'ita sayaychej, jallch'aychejtaj noqaykumanta yachakusqaykichejta, ñaraj siminejta, ñaraj cartaykunejta.

¹⁶ Kikin Señorninchej Jesucristo, Dios Tatanchej ima munakuwarqanchej, qhasimanta qowarqanchej wiñay kusiyta, sumaj suyaytawan khuyakuyninrayku.

¹⁷ Pay sonqoykichejta kallpachachun. Tukuy ima allin parlaypi, ruwaypi ima sinch'ita qankunata sayachichun.