2 Samuel 6 - Qheshwa Biblia DC

Davidqa, Dioswan trato ruwasqa cajonta Jerusalenman apanayan

¹ Davidqa, watejmanta Israel ayllumanta ajllasqa kaj soldadosninta tantaykullarqataj, tukuyninkupitaj kinsa chunka waranqas karqanku.

² Judapi chay Baala llajtamanta purirerqanku Davidwan tukuy runasninwan ima, chaymanta Dioswan trato ruwasqa cajonta apamunankupaj. Chay cajón patapi Señorwan parlaj kanku, querubines patapi tiyakoj Señorwan.

^3-4 Señorpa cajonnintaqa mosoj qhatatana carroman churaykorqanku, orqo patapi kasharqa Abinadabpa wasinmanta apakapunankupaj. Abinadabpa wawasnin Uzawan, Ahiowan Señorpa cajonninta pusayserqanku. Ahiotaj ñaupaqenta risharqa.

⁵ Chaykamataj, Davidwan tukuy israelitaswanqa Diospa ñaupaqenta risharqanku, tukuy kallpankuwan takispa, tususpa tocanasninkoj ch'ajwaynimpi. Tocaspa arpasta, salteriosta, panderosta, castañuelasta, platillosta ima.

⁶ Nacompa eran nisqa chayman chayamuspataj, Uzaqa Señorpa cajonninta makinwan jap'iykurisqa, bueyes misk'ajtinku chay cajón urmanayajtin.

⁷ Chaypacha Señor sinch'ita Uzapaj phiñakorqa chay cajonta llujchisqanmanta. Diosqa chay kikimpi Uzata wañorparicherqa. Uzaqa wañusqa choqakorqa, Dioswan trato ruwasqa cajompa qhayllanman.

⁸ Davidqa phiñarikorqa, Señor chay jinata Uzata wañurparichisqanrayku. Chayrayku chay cheqata Perez-uzata suticharqa, chay sutiwantaj kunankama kashan.

⁹ Chay kikin diapacha Davidqa, Señorpa ñaupaqempi sinch'ita manchachikorqa, nerqataj: Imapajtaj yuyallaymampis Señorpa trato ruwasqa cajonninta apakapuytaqa!

¹⁰ Diospa trato ruwasqa cajonninta Davidqa manaña llajtanman apayta munaspari, kamacherqa Gat llajtamanta Obe-edompa wasinman apanankuta.

¹¹ Diospa trato ruwasqan cajonqa Obed-edompa wasimpi qhepakorqa kinsa killata. Señortaj payta aylluntintawan bendicerqa.

Davidqa, Diospa trato ruwasqa cajonninta Jerusalenman apan

¹² Davidan willarqanku Señorpa trato ruwasqa cajonninrayku, Obed-edompa ayllunta tukuy paypa kapuynintawan Señorqa mayta bendicisqanta, Davidqa rispa jatun kusiywan Obed-edompamanta Señorpa trato ruwasqa cajonninta apakamporqa Davidpa llajtanman.

¹³ Señorpa trato ruwasqa cajonninta apamojkuna sojta pasosta thaskisqankumantataj, Davidqa ñak'arqa uj torota uj wira corderotawan Señorman jaywanampaj.

¹⁴ Davidqa, linomanta efod p'achawan p'achallisqa risharqa tukuy kallpanwan tusurispa Señorpa ñaupaqempi.

¹⁵ Davidwan tukuynin israelitaswanqa Señorpa trato ruwasqa cajonninta apasharqanku may kusiywan qhaparispa pututusninkuta waqarichispataj.

¹⁶ Señorpa trato ruwasqa cajonnin Davidpa llajtanman chayamojtintaj, Saulpa ususin Micalqa wasin ventananmanta qhawarimuspa, rey Davidta rikorqa tusushajta phinkiykachashajtataj Señorpa ñaupaqempi. Chayta rikuspa Micalqa sonqompi Davidta pisipaj qhawarqa.

¹⁷ Señorpa trato ruwasqa cajonninta apaykuspa uj cheqaman churarqanku, chaypaj nispapuni David ruwacherqa uj toldota, chay ukhuman. Chay ratopachataj Davidqa Señorpa ñaupaqempi jaywarqa uywa ñak'asqasta q'olasqa kanampaj, jinataj allinyakunapaj jaywanastawan.

¹⁸ Chaykunasta jaywayta tukuypañari Davidqa, tukuy aylluta bendicerqa Tukuy Atiyniyoj Señorpa sutimpi.

¹⁹ Chaypi kajkuna tukuy israelitasmanqa, qharisman jinataj warmismampis mikhunankupaj qorqa, sapa ujman uj t'antata, uj chhikan aycha kankata, chantá uvas k'isamanta t'antata ima. Chaymantataj tukuyninku wasisninkuman kutiporqanku.

²⁰ Ajinallatataj Davidqa ayllunta bendicimunampaj kutiporqa, Saulpa ususin Micaltaj payta taripaj llojsimuspa nerqa: Kunanqa ancha walejpuni Israelpa reynimpajqa karqa, kamachisnimpa ususisninman uj mana p'enqayniyoj runa jina rikuchikusqanqa!

²¹ Davidtaj Micalman kuticherqa: Arí, cheqamanta tusorqani, chaytaqa ruwarqani Señorpa ñaupaqempi. Payqa ajllawarqa tataykej cuentanmanta jinataj tukuy aylluykejmanta ima, Israel ayllunta kamachinaypaj. Chayrayku Señorpa ñaupaqempi tusullasajpuni.

²² Jinapis astawanraj kunanmanta nisqaqa ruwasaj, ninki jina noqapaj p'enqay kasqanta, chaywampis chay sipaskuna piskunamantachus parlanki, chaykuna allimpaj qhawawanqanku.

²³ Saulpa wawan Micalqa wañupunan p'unchaykama mana uj wawatapis rejserqachu.