2 Samuel 4 - Qheshwa Biblia DC

Is-bosetta wañuchin

¹ Saulpa wawan Is-boset, Hebrompi Abner wañusqanta yachaspa qharqarqa, Israelpi tukuynintaj manchachikuyta qallarerqanku.

² Is-bosetpataqa tiyarqa iskay yanapajkuna runasnin, chaykunataj suwa runaspa kurajkunasninku karqanku. Ujnimpata Baana sutin karqa, ujnimpatataj Recab. Paykunaqa Beerot llajtamanta Rimompa wawasnin karqanku, Benjamimpa ayllunmanta. Beerot llajtaqa Benjamimpa ayllumpata jina qhawasqa karqa.

³ Beerotmanta kajkunaqa ayqesqanku Gitaim llajtaman, chaypitaj kunankama mana llajtayoj runas jina tiyakushanku.

⁴ Saulpa wawan Jonatampata uj qhari wawan karqa Mefi-boset sutiyoj, payqa chakisninmanta onqosqa karqa. Mefi-boset phishqa watayoj kashajtin, Jezreelmanta uj willay chayamorqa Saulwan Jonatanwan wañusqankuta. Chaypacha uywaqenqa Mefi-bosetta jap'ispa paywan ayqerqa, usqhayta ayqeshajtinkutaj Mefi-bosetqa urmakorqa, chaymantapachataj wist'u karqa.

⁵ Beerotmanta Rimompa wawasnin Recabwan Baanawan ima, rerqanku Is-bosetpa wasinman, chayarqankutaj chaupi p'unchayta sinch'i ruphay kashajtin, pay wasimpi samarikoj jina puñukushajtin.

⁶ Wasi qhawaj warmitaj trigota wayrachisharqa, paypis puñurparillasqataj, jinamanta Recabwan Baanawanqa mana pejpa rikusqallan wasiman yaykorqanku.

⁷ Wasiman yaykushajtinkoqa, Is-bosetqa puñuna wasimpi puñusharqa, chaypitaj wañurparichispa umanta qorurparerqanku, chaymantataj chay umanta apariykukuspa Arabá ñanninta tukuy tutantinta rerqanku.

⁸ Is-bosetpa umantataj Hebronman Davidpaman aparqanku. Reymantaj nerqanku: Reyníy, kayqa Saulpa wawan Is-bosetpa uman. Saulqa enemigoyki karqa, wañuchiyta munasoj. Kunantaj Señor munan qan vengakunaykita Saulmanta, jinataj ayllusninmantapis.

⁹ Davidtaj paykunaman kuticherqa: Señorpa sutimpi juraykichej, pay tukuy ñak'ariymanta t'aqawasqanrayku.

¹⁰ Maypachachus uj jamuwarqa Saulpa wañusqanta willaspa, yuyarqa sumaj willayta apamuwasqanta, chay willawasqanmantataj jap'ispa Siclagpi wañucherqani.

¹¹ Ajinallatataj chaypis astawanraj qankuna sajra runaswanqa ruwasaj, chay mana juchayoj runata wañuchisqaykichejrayku, kikin wasimpi, chanta puñukushajtinrajtaj! Chayrayku qankunata wañuchillasqaykichejtaj! Kay pachamantataj chinkachisqaykichej!

¹² Chay ratopacha Davidqa kamacherqa yanapajkunasninta, paykunataj chay runasta wañucherqanku, makisninkuta chakisninkutawan qholorqanku, warkhurparerqankutaj Hebrón yaku qhocha chaynejpi. Chaymantataj, Is-bosetpa umanta Hebrón llajtapi Abner p'ampasqa karqa chay covachaman churaykaporqanku.