2 Pedro 1 - Qheshwa Biblia DC

Pedroj napaykuynin

¹ Noqa, Simón Pedro, Jesucristoj kamachin apostolnintaj kani. Dios Tataj cheqa kaynimpi, Salvawajninchej Jesucristopitaj, chay sumaj creeyta noqayku jina tarinkichej. Qankunaman kay cartata apachimuykichej.

² Khuyakuy, sonqo tiyasqa kaytaj qankunapaj ashkhayachun, Diosta rejsinaykichejpaj, Señor Jesucristotawan.

Cristota qhatakojkunaj wiñayninku

³ Diosqa atiyninrayku, kausayninchejpaj chay tukuy imasta qowanchej, payta yupaychananchejpaj, payta rejsisqanchejrayku, pichus wajyawarqanchej jatun kayninwan, atiyninwantaj.

⁴ Chay imasnejta Dios niwanchej, qhapaj, jatuchaj imasta qonawanchejta; chay qosqaykichej nisqanejta, qankuna Diospa kayninta chayaqepaj jap'inaykichejta; chantá, kay mundoj millay kausayninmanta ayqenaykichejpaj, aychaj sajra munayninmanta ima.

⁵ Chayrayku qankunapis tukuy k'uchi kayta churaspa, feniykichejman yapaychej atiyta, atiymantaj yachayta.

^6-7 Yachaymantaj yapaychej, qankuna kikin juchata atipayta; juchata atipaymantaj pacienciata, pacienciamantaj, Diosta yupaychayta, Diosta yupaychaymantaj, hermanospura kausakuyta; hermanospura kausakuymantaj munakuyta.

⁸ Chay imaschus qankunapi kashanku, ashkhayashankutaj chayqa, mana saqesunkichejchu qhellas kanaykichejta, nitaj Señorninchej Jesucristota mana poqoyniyoj rejsinaykichejta.

⁹ Pejpatachus chay imas mana tiyapunchu chayqa, chay runaqa pisi ñawiyoj, nitaj rikunñachu; ñaupa juchasnin llimphuchasqa kasqanta qonqapusqanrayku.

¹⁰ Chayrayku hermanos, wajyasqas ajllasqastaj kasqaykichejpi sumajta sayaychej. Chaykunata ruwaspa mana jayk'ajpis urmankichejchu.

¹¹ Chay jinamanta, Señor Jesucristo Salvadorninchejpa wiñay reinonman yaykunaqa allin, sumaj kichasqa qankunapaj kanqa.

¹² Chayrayku mana qonqasajpunichu kay imasta qankunaman yuyarichiyta. Qankunarí, ñapis chayta yachankichejña. Kunantaj cheqa kajpi sinch'ita sayashankichej.

¹³ Noqa yuyani cheqan kasqanta kay aycha cuerpoypi kashaspa yuyayniykichejta rijch'arichinay, sonqochanaytaj.

¹⁴ Yachakuniña pisi p'unchaymantawan kay aycha cuerpoyta saqepunayta. Señorninchej Jesucristopuni jinata sut'inchawan.

¹⁵ Chayrayku, ruwallasajpuni atisqayta, wañupojtiykamataj, qankuna kay imasmanta sapa kuti yuyarikunaykichejpaj.

Cristoj jatun k'anchayninta rikojkuna

¹⁶ Señorninchej Jesucristoj atiyninmanta, jamuyninmantawan qankunaman yachacherqayku chay imasqa, mana wakichisqa, nitaj qhasi mana kaj parlaywanchu, astawanqa, noqaykupuni paypa jatun k'anchayninta rikorqayku.

¹⁷ Maypachachus payqa Dios Tatamanta jap'erqa allin qhawasqa kayta, jatun kayta ima; chaypacha uj jatun k'anchaypi janaj pachamanta Dios parlamorqa: Kaymin munasqa Chureyqa. Paywan ancha kusisqa kani, nispa.

¹⁸ Noqaykupis uyarerqayku janaj pachamanta parlamojta, Señorwan khuska, Diospaj ajllasqa orqopi kashaspa.

¹⁹ Tiyapullawanchejtaj profetaspa mana chinkaj escribisqasninku. Chay palabrasta uyarispataj allinta ruwankichej; imaynatachus uj k'anchay laqhapi sut'iyanankama k'anchan, ajinata; paqariy ch'aska jinataj sonqoykichejpi k'ancharinankama.

²⁰ Ñaupajta yachaychej kayta: Escriturapi profetaspa escribisqantaqa, mana pillapis payllamanta sut'inchayta atinchu.

²¹ Profetaspa escribisqasnin mana jayk'ajpis runaj munayninmantachu jamorqanku; manachayqa, Diospa ajllasqan runas, Santo Espiritunejta chay imasta parlarqanku.