1 Tesalonicenses 3 - Qheshwa Biblia DC

¹ Chayrayku, manaña suyayta atispa, noqayku ukhu parlarikorqayku Atenaspi sapayku qhepakunaykuta.

^2-3 Hermanoyku Timoteotataj kachamorqayku. Payqa Diospa kamachin, ruwaysiwajniykutaj Cristoj evangeliompi. Payta kachamorqayku qankunata sinch'ita sayachinampaj, creesqaykichejpitaj astawan yanapanampaj, ama pipis kay ñak'ariykunarayku iskayrayanampaj; imaraykuchus yachankichej jina, chaykunapaj churasqas kayku.

⁴ Ñaupajmantapacha qankunawan kashajtiyku, willarqayku llakiykunata jap'ikunaykichejta. Ajinataj karqa, imaynachus yachankichej jina.

⁵ Chayrayku, noqapis mana astawan suyayta atispa, Timoteota kachamorqani feniykichejmanta yachanampaj, ichapis supay pantachisunkichejman karqa, llank'asqaykutaj qhasipaj kanman, nispa.

⁶ Kunanqa, Timoteo kutimuspa willawayku feniykichejmanta, munakuyniykichejmanta ima; noqaykumantataj yuyarikojpuni kasqaykichejta, noqaykuta rikuyta munaspa, imaynatachus noqaykupis qankunata, ajinata.

⁷ Chayrayku, hermanos, qankunanejta sonqochakorqayku, tukuy llakiyniykupi, ñak'ariyniykichejpipis, feniykichejrayku.

⁸ Kunanqa watejmanta kausayku qankuna Señorpi sinch'ita sayasqaykichejrayku.

⁹ Imaynamantataj graciasta Diosman qoyta atiykuman may kusiywan, kusikusqaykumanta Diospa ñaupaqempi?

¹⁰ Tuta p'unchay anchatapuni Diosmanta mañakuyku uyaykichejta rikunaykupaj, feniykichejman pisisqantataj junt'anaykupaj.

¹¹ Kikin Dios Tatanchej, Señorninchej Jesucristowan, qankunaman rinaykupaj ñanta wakichichunku.

¹² Señortaj qankunata munakuywan junt'achichun, ashkhayachichuntaj qankuna ukhupi, wajkuna ukhupipis; imaynatachus noqaykupis qankunata munakuyku, ajinata.

¹³ Sonqosniykichej llimphu kausaypi kallpachasqas kachunku, mana k'amiyniyoj Dios Tatanchejpa ñaupaqempi, Señorninchej Jesucristo, tukuy ajllasqasninwan jamunankama.