1 Samuel 6 - Qheshwa Biblia DC

Filisteos Diospa trato cajonninta kutichipunku

¹ Diospa trato cajonnenqa qanchis killata filisteospa jallp'ankupi karqa.

² Chaypacha filisteosqa wajyacherqanku sacerdotesta, yatiristawan tapunankupaj: Imanasunchejtaj Diospa trato cajonninwanri? Niwayku imaynatachus llajtanman kutichipunata.

³ Paykunataj kuticherqanku: Diospa trato cajonninta kutichipuspaqa ama ch'usajllataqa kutichiychejchu, manachayqa imallatapis Señormanqa jaywariychejpuni juchasniykichejmanta. Chaypacha qankunaqa chay onqoymanta thañinkichej, yachankichejtaj imaraykuchus Diosqa jasut'isorqachej chayta.

⁴ Imatataj jaywasunman juchasninchejmantari?, nispa, filisteosqa tapurikorqanku. Sacerdotestaj kuticherqanku: Ruwaychej phishqa qori bolasta ch'upusman rijch'akojkunata ujtakama sapa kuraj filisteo kamachejkunarayku, jinataj phishqa qori juk'uchastawan, imaraykuchus kurajkunasniykichej, qankunapis kikin onqoyllawantaj kasqaykichejrayku.

⁵ Chayrayku ruwaychej llajtaykichejta tukuchishanku chay ch'upusman rijch'akojkunata, chanta juk'uchasman rijch'akojkunatapis. Israelpa Diosnintataj jatunchaychej, ichapis pay saqenman jasut'iyta diosniykichejta, jinataj jallp'aykichejtapis.

⁶ Imaraykutaj qankunaqa sonqoykichejta rumiyachinkichejri egipcios jina, faraón jinatajri? Paykunaqa Israelpa Diosnin jasut'ejtinraj israelitasta ripojta saqerqanku.

⁷ Chayrayku kunanqa mosoj carretata ruwaychej; chaymantataj uñayoj iskay wakasta mana jayk'aj yugoj chayananta, carretaj ñaupajninman wataykuychej. Amataj saqeychejchu uñasninku qhatinankuta, manachayqa kanchallapi saqeychej.

⁸ Señorpa trato cajonninta carretaman churaykuychej, chay uj ladonmantaj churaykuychej uj cajompi imastachus qorimanta ruwasqasta juchasniykichejmanta jaywarqankichej chaykunata. Chaymantataj saqeychej carretaqa payllamanta ripunanta.

⁹ Chaymantataj sumajta qhawaychej: Sichus chay carreta riponqa Bet-semes kikin jallp'aman chayqa, Israelpa Diosnin chay jina llakiykunaman churawasqanchejta. Manachayqa yachallasuntaj mana paychu jasut'iwasqanchejta, kay imasqa kanampuni kasqanta.

¹⁰ Chay runasqa kikinta ruwarqanku. Uñayoj iskay wakasta carretaj ñaupajninman wataykorqanku. Uñasnintataj kanchaman wisq'aykorqanku.

¹¹ Chaymantataj Señorpa cajoninta carretaman churaykorqanku, chay waj cajatawan ukhuman churaykuspa, qorimanta ruwasqa juk'uchasta, jinataj ch'upuman rijch'akoj ruwasqastawan.

¹² Chantataj chay wakasqa paykunallamanta thaskiyta qallarerqanku chay Bet-semes llajtaman rej ñanninta. Chay wakastaj qhaparispa cheqanta rerqanku mana wist'urispa ni pañaman ni lloq'eman. Filisteospa kurajkunasninkutaj qhepanta rerqanku Bet-semes tinkuykama.

¹³ Bet-semespi tiyakojkunaqa chay pampaspi trigota oqharisharqanku, qhawarispataj rikorqanku Diospa cajonnin jamushajta, maytataj kusikorqanku.

¹⁴ Wakaspa qhatatisqan carretaqa Bet-semespi Josuejpa jallp'ankama chayarqa, chaypitaj sayaykorqa, uj jatun rumi qayllapi. Chaypacha Bet-semesmanta kajkunaqa chay carretaj k'aspisninmanta llant'ata ruwaspa, chay wakasta Señorpaj rikuchikuta jina ruphachiporqanku.

¹⁵ Levitastaj chay Diospa trato cajonninta uraykuchispa, jinataj chay qorimanta ruwasqa cajontawan uraykuchispa chay jatun rumi pataman churaykorqanku. Bet-semesmanta kajkunataj chay p'unchaypi Señorpaj rikuchikusta ruphacherqanku, chanta waj rikuchikustawampis jaywallarqankutaj.

¹⁶ Chay imasta rikuspataj chay filisteospa phishqa kurajkunasnin chay kikin p'unchaypacha Ecronman kutiporqanku.

¹⁷ Chay phishqa qori ch'upusta filisteosqa qorqanku juchasninkoj cuentanmanta Señorman qorqanku. Chayqa karqa ujkama kay llajtaspa cuentanmanta: Asdodmanta, Gazamanta, Ascalonmanta, Gatmanta, Ecronmanta ima.

¹⁸ Qorimanta ruwasqanku chay juk'uchaspis filisteospa llajtasninkuta chay phishqa kurajkunas kamachisharqanku chay chhikallataj karqanku, yupaspa perqawan muyusqa llajtasta, jinataj mana perqawan muyuykusqa ranchostawan. Maypichus Señorpa trato cajonninta churarqanku chay jatun rumeqa Bet-semespi kaj Josuejpa jallp'ampi kunankama kashanraj.

¹⁹ Chaypacha Bet-semes llajtapi tiyakojkunamanta wakinta Señorqa wañucherqa Señorpa trato cajonnin ukhuta imaschus kasqanta rikuyta munaspa qhawaykusqankurayku. Chaypacha qanchis chunka runasta wañucherqa, tukuy ayllutaj waqarqanku chay chhikata Señor chay p'unchaypi paykuna ukhupi wañurachisqanmanta.

²⁰ Bet-semespi tiyakojkunataj nerqanku: Pitaj Santo Señor Diospa ñaupaqempi sayaykuyta atinmanri? Noqanchejmanta ithirikuspaqa pejpa contrampiñataj renqari?

²¹ Chaypacha willacherqanku Quiriat-jearimpi tiyakojkunaman kay jinata: Filisteosqa Señorpa trato cajonninta kutichimpunku, chayrayku jamuspa apakapuychej, nispa.