1 Samuel 15 - Qheshwa Biblia DC

Señorqa Saulta qhesachan

¹ Uj p'unchay Samuelqa Saulman nerqa: Señor kachamuwarqa t'aqasunaypaj Israel aylloj reynin kanaykipaj. Chayrayku kunan uyariy Señor imatachus nisuyta munan chayta.

² Ajinata nin Tukuy Atiyniyoj Señorqa: Amalicitasta jasut'isaj, paykunaqa israelitas Egiptomanta llojsimushajtinku ñankunapi jark'aykusqankurayku.

³ Chayrayku paykunawan maqanakoj riy; tukuy paykunata jinataj tukuy kapuyninkutapis chinkachimunaykipuni tiyan, ama ni uj chhikanta paykunamanta khuyarikuspa. Wañurachiy qharista warmista, wawasta, chay ñuñoj wawastapis, ajinallatataj wakasninkuta, ovejasninkuta, camellosninkuta, burrosninkuta ima.

⁴ Saulqa tukuy aylluta wajyacherqa, Telaimpitaj cantollamanta watucherqa. Tukuyninkupi karqanku iskay pachaj waranqa soldados chakipi rejkunamanta. Judá ayllumanta kajkunataj chunka waranqa soldados karqanku.

⁵ Chay qhepantataj Saulqa kachaykukorqa Amalec llajtaman. Chay mayu patanejpitaj jarakorqanku.

⁶ Saulqa quenitasman nerqa: T'aqakuychej chaymanta! LLojsiychej amalicitas chaupimanta, ama qankunatapis paykunatawan khuska wañuchinaypaj. Qankunaqa israelitas Egiptomanta llojsimushajtinku allinta paykunapaj ruwarqankichej. Quenitastaj amalicitasmanta t'aqakaporqanku.

⁷ Chaypacha Saulqa amalicitasta maqanakupi atipaykorqa. Havila llajtamantapacha Shur llajtaman yaykunankama, chayqa kashan Egiptowan tinkuypiña.

⁸ Chaypacha reyninku Agagta kausashajllata jap'icherqa, espadawantaj wañucherqa tukuy soldadosnintinta.

⁹ Chaywampis Saul soldadosninwan imaqa mana wañucherqankuchu rey Agagtaqa, allichaj ovejasnin kajta, nitaj torostapis, nillataj wira waka uñasnintapis, nitaj corderostapis, nitaj chay sumachaj kaj imastapis. Imastachus phirirarqanku chaykunaqa karqanku mana walej, nitaj valorniyoj imasllamanta.

^10-11 Chaymantataj Señorqa Samuelwan parlarqa: Saulta kamachejta churasqaymanta llakikuni, payqa noqamanta t'aqakapun, manataj nisqasniyta junt'anchu. Samuelqa sinch'i llakisqa qhepakorqa, tukuy tutantintaj Señormanta mañakusharqa.

¹² Q'ayantin paqarintaj tutapayarqa Saulwan tinkumunampaj, willarqankutaj payqa Carmelman ripusqanta, chaypitaj rumi qontuta paypaj sayarichisqanta, chaymanta kutirispataj Gilgalman ripusqanta.

¹³ Chaypacha Samuelqa rerqa maypichus Saul kasharqa chayman. Saultaj nerqa: Señor qanta bendicisuchun. Junt'aniña Señorpa kamachisqantaqa, nispa.

¹⁴ Samueltaj nerqa: Chanta ima niytataj munan chay ovejaspa jinataj torospa ch'ajwamusqasninkuri?, nispa.

¹⁵ Saultaj kuticherqa: Amalecmanta apamunku, runas t'aqasqanku chay allichaj kaj ovejasta, jinataj torosmantapis Señor Diosniykiman jaywanankupaj rikuchikuta jina, chay wakintataj wañuracherqayku, nispa.

¹⁶ Samueltaj chaypacha kuticherqa: Ch'in kay, willasqayki ch'isi imatachus Señor niwarqa chayta, nispa. Saultaj kuticherqa parlallay, nispa.

¹⁷ Samueltaj parlarqa: Qanqa mana kasuy runa karqanki, chaywampis Señorqa Israel ayllus ukhupi reyninku kanaykipaj ajllaspa churasorqa.

^18-19 Señorqa kamachisuspa kachamusorqa, chay juchasapa amalicitasta tukuchinaykipaj mana ujniyojta. Imaraykutaj Señorpa kamachisusqantaqa mana kasorqankichuri, chay enemigosmanta qhechusqaykita jap'ikapuspari? Jinamanta qanqa Señorpa ñaupaqempi mana allintachu ruwarqanki, nispa.

²⁰ Chaypitaj Saulqa kuticherqa: Noqa kasorqani Señorpa kamachisqasninta, paypa niwasqantataj junt'arqani: Apamorqani presota Amalec llajtaj reynin Agagta, chanta amalicitasta wañuracherqani.

²¹ Jinapis runasqa qhepakorqanku ovejaswan, jinataj toroswan ima, wañunankupuni karqa chaykunamanta aswan allinchajninta t'aqaspa, Gilgalpi Señor Diosniykiman rikuchikuta jina jaywanankupaj.

²² Chaypitaj Samuelqa kuticherqa: Señortaqa kasuypuni, astawan allinta kusichin, chay rikuchikusta, jinataj ruphasqa rikuchikusta jaywanamanta nisqaqa. Astawan allinraj payta kasunaqa, nisqasninta kasunapis, chay rikuchikusmanta, jinataj chay corderoj wirasninta jaywanamanta nisqaqa.

²³ Señorpa contrampi oqharikoyqa layqa juchawan ninakun, Señorta mana kasuytaj lanti yupaychana juchawan ninakullantaj. Imaynatachus qan qhesacherqanki chay kamachisqasninta ajinallatataj paypis qanta qhesachasunki manaña rey kanaykipaj.

²⁴ Chaypacha Saulqa Samuelman nerqa: Arí juchallini, Señorpa kamachisqasninta, niwasqaykitawan mana kasuta ruwaspa. Chaytaqa ruwarqani runasta manchachikuspa, imatachus mañawasqankuta uyarinayrayku.

²⁵ Chaywampis mañarikuyki juchasniymanta perdonanawaykita, noqawantaj kutinaykita Señorta yupaychaj.

²⁶ Samueltaj kuticherqa: Mana qanwanqa kutisajchu, qan Señorpa kamachisqanta qhesachasqaykirayku. Kunanqa pay qhesachasunkiña, manaña Israelpa reynin kanaykipaj.

²⁷ Samuel ripushajtinña, Saulqa Samuelpa qhatakuna p'achampa cantonmanta jap'iykorqa, llik'irparerqataj.

²⁸ Chaypacha Samuelqa Saulman nerqa: Ajinallatataj Señorpis qanmanta Israelpa reinonta qhechusunki, uj llajta masiyki runaman qopunampaj, chay runataj qanmantaqa aswan allin.

²⁹ Diosqa Israelpa kusiynin. Payqa mana llullakunchu, nitaj pesachikunchu. Mana payqa runachu pesachikunampaj.

³⁰ Saul kutichillarqataj noqa juchallini, nispa. Chaywampis mañakuyki tukuy israelitaspa ñaupaqempi, jinataj kurajkunaspa ñaupaqempipis allillampajpuni qhawanawaykita. Kutimuytaj, Señor Diosniykita noqawan yupaychamuna.

³¹ Chaypacha Samuelqa Saulwan Señorta yupaycharqa.

³² Chaymanta Samuelqa kamacherqa: Kayman pusamuway Amalecpa reynin Agagta. Agagtaj may kusisqa Samuelpa ñaupaqenman chimpamorqa, llakiyta wañunanmantaqa librakusqantaña yuyaspa.

³³ Samueltaj chaypi nerqa: Qan espadaykiwan ashkha warmista mana wawasniyojta saqerqanki. Kunanqa ajinallataj mamaykita qhatirenqa. Chayta niytawantaj Samuelqa, Señorpa ñaupaqempi chay reytaqa Gilgal llajtapi chhikan chhikanta khuchurarqa.

³⁴ Chaymanta Samuelqa Ramá llajtaman riporqa. Saultaj kutiporqa chay Saulpa nisqa Gabaa llajtanman.

³⁵ Samueltaj chaymantaqa manaña jayk'ajpis Saultaqa ujtawan rikorqañachu. Mayta llakikuspa Saulmanta waqarqa. Señortaj mayta pesachikorqa Israelpa reynin kanampaj Saulta churasqanmanta.