1 Reyes 7 - Qheshwa Biblia DC

Salomompa waj wasis ruwasqasnin

¹ Chanta Salomonqa palacionta ruwachikorqa tukucherqataj chunka kinsayoj watapi.

² Kikillantaj Líbano monte nisqa wasita ruwachillarqataj, chay wasitaj kay jina karqa, sayt'unman tawa chunka phisqhayoj metros, anchonmantaj iskay chunka iskayniyoj metros khuskanniyoj, patamantaj chunka kinsayoj metros khuskanniyoj, tawa filas cedro k'aspimanta sayantas patapi sayachisqa karqa, patampitaj churasqa karqa cedro kurkus.

³ Chay kurkusqa tawa chunka phishqayoj karqa, kinsa t'aqasman rak'isqa, sapa t'aqapitaj chunka phishqayoj kurkus karqa, sayantas patapi churasqas. Chay kurkus patataj cedro tablaswan mast'asqa karqa.

⁴ Kinsa sinrulla ventanas karqa, sapa ujtaj ujwan khawarinasqas karqanku.

⁵ Tukuynin punkustaj kurkusnimpiwan tawa esquinasniyoj karqanku, kinsa sinrulla ventanastaj sapa uj ujninwan khawarinasqas karqanku.

⁶ Chay wasej ñaupaqempitaj uj corredorta sayantasniyojta ruwallarqataj, chaytaj sayt'unman karqa iskay chunka iskayniyoj metros khuskanniyoj, anchonmantaj chunka kinsayoj metros khuskanniyoj karqa; chaypa aswan ñaupaqempitaj uj corredor kallarqataj.

⁷ Justiciata ruwanan chay tronompa ñaupaqenmantaj ruwacherqa uj corredorta, chaytapis cedro k'aspiswan wisq'aykullarqataj pampamantapacha techonkama.

⁸ Salomompa tiyakunan waseqa, wasa ladompi patioyoj karqa, chaypis kikin ruwasqallataj karqa; Salomonqa faraompa ususimpaj mayqenchus paypa warmin karqa chaypaj uj wasita ruwachiporqa chay corredor kikillantataj.

⁹ Chay ruwachisqan wasistaj sumaj k'acha rumiswanpuni ruwasqas karqanku, k'utusqas ch'eqosqastaj medidanman jina sumaj kasachisqas jawan cimientomantapacha tukukuyninkama, jinallataj jawa perqamanta ukhu jatun patiokama.

¹⁰ Chay wasej cimiento rumisnenqa sumaj jatuchej rumismanta karqa, wakinkunaqa tawa metro khuskanniyoj, wakintaj kinsa metro khuskan kurajniyoj.

¹¹ Chay perqaj patampipis ajina k'acha rumisllawantaj karqa medidaman jina k'utusqas, cedromanta k'aspiswan ima.

¹² Jatun patioj perqantataj ch'eqosqa rumiswan kinsa filata muyuykucherqa, patanmantaj cedro tablasta uj filata churaykorqa, imaynatachus Señorpa wasin ukhu patiopi ruwarqa chay wasej corredornimpipis ajinallatataj.

Tiromanta Hiramta llank'achinampaj Salomonqa jap'in

¹³ Kachaspataj rey Salomonqa Tiromanta Hiramta pusachimorqa.

¹⁴ Hiramqa Neftalí ayllumanta uj viudaj wawan karqa, tatantaj Tiromanta karqa, broncemanta ruwanaspi llank'aj. Hiramqa sumaj yachayniyoj yuyayniyojtaj karqa, broncemanta tukuy ima ruwanasta sumajta yacharqa, paytaj rey Salomompaman jamuspa tukuy imasta ruwarqa.

¹⁵ Bronceta unuyachispa iskay sayantasta jich'aspa sayacherqa, chaykunaqa sapa uj pataman pusaj metroyoj karqa, muyuynintaj phishqa metro khuskanniyoj karqa.

¹⁶ Ruwallarqataj broncemanta iskay kirpanasta, chay sayantaspa patanman churanankupaj, chay kirpanasqa phatunman iskay metro uj cuarta kurajniyoj karqa.

¹⁷ Ruwallarqataj ch'ipasta simp'asqa cadenasta jina, chay sayantaspa patampi kirpanasta muyuykuchinampaj, uj ch'ipata sapa uj kirpanapaj.

¹⁸ Ruwallarqataj iskay fila granadasta chay ch'ipaj muyuynimpi churanampaj, chaykunawan sayantas patapi kirpanasta khataykunampaj. Kikillantataj ruwarqa chay uj kaj sayantapajpis.

¹⁹ Chay sayantaspa puntasnimpi kirpanasnenqa lirio t'ikas jina karqa, phatunmantaj iskay metroyoj karqa.

²⁰ Iskaynin sayantaspa kirpanasnimpa patampi aswan rakhu muyumpi, ch'ipaj qhayllampi iskay pachaj granadas sapa ujnimpi iskay filaskama muyurisqa karqa.

²¹ Kay sayantastataj Hiramqa churarqa Diospa yupaychana wasej corredornimpi, paña ladopi kaj sayantata sayachispataj Jaquín nispa suticharqa, lloq'e ladopi kajta sayachispataj Boaz nispa suticharqa.

²² Chay sayantaspa patampi lirio t'ikaman rijch'akojta ruwaspa churarqa. Ajinata tukukorqa sayantasta sayacheyqa.

Templopi tukuy imas kajkuna

²³ Hiramqa broncemanta unuyachispa ruwarqa uj jatun yaku churanata, chaytaj muyu karqa, uj cantonmanta ujnin cantonkamataj tawa metro khuskanniyoj karqa, patanmantaj iskay metro cuarta kurajniyoj karqa, tukuy muyuynintaj chunka kinsayoj metros khuskanniyoj karqa.

²⁴ Chay jatun yaku churanaj simin urapitaj muyurisqa karqa lakayusman rijch'asqa moroq'os, sapa khuskan metropi jina chunka karqa, iskay sinru chaykunataj jatun jaku churanawan khuska unuyachispa ruwasqa karqa.

²⁵ Chaytaj chunka iskayniyoj bronce wakas patapi churasqa karqa, qhawasharqankutaj kinsa pata ladota, kinsataj ura ladota, kinsataj inti llojsimuy ladota, kinsataj inti yaykuy ladota, chay yaku churanaqa chaykunaj patampi churasqa karqa. Ajinamanta chay wakaspa qhepa chakisninku ukhu ladopi karqanku.

²⁶ Yaku churanaqa phatunman uj t'ajlli karqa, cantosnintaj rijch'akorqa lirioj t'ikanman, chaymantaj yaykoj tawa chunka tawayoj waranqa litros yaku.

²⁷ Chantapis ruwallarqataj broncemanta chunka chukusta, sapa ujtaj sayt'unman uj metro tawa cuartayoj karqa; anchonmantaj kikillantaj karqa, patanamantaj uj metro cuarta iskay t'ajlliyoj karqa.

²⁸ Chay chukusqa kay jina ruwasqas karqanku: Chaupimpi p'alta tablasniyoj jina, marcosniyoj jina k'achanchasqa.

²⁹ Chay marcospa chaupimpi p'altampitaj ruwasqas karqanku, leonesman rijch'akoj, wakasman, ángeles jinataj. Chay marcospa urampi patanejpiwan, jinallataj leonespa, wakaspapiwan urampi patanejpiwan warawas churasqa karqa.

³⁰ Sapa uj chukutaj broncemanta tawa ruedasniyoj karqa; ejesnimpis broncellamantataj karqa. Chay yaku churanaj tawantin esquinasnin urapi broncemanta jap'ichisqasniyoj karqa, chaykunataj t'ikanchasqa.

³¹ Yaku churanaj simenqa chay jap'ichinasmanta pataman khuskan metro jinalla karqa. Simintaj muyu karqa, p'ukunmanta patanmanta kinsa cuarta kurajniyoj karqa. Kallarqataj simimpi warawas ruwasqas, chaykunataj tawa esquinasniyoj karqanku, mana muyuschu.

³² Tawantin ruedastaj marcosnin urapi karqa, ejesnintaj kikin chukusllamantataj llojsimorqa, sapa uj reudajtataj pataman kinsa cuarta t'ajlliyoj jina karqa.

³³ Ruedastaj rijch'akorqa, carretaspa ruedasninman jina. Ejesnimpis, radiosnin, cubosnin, cinchosnin ima, tukuyninku broncellamantapuni ruwasqa karqa.

³⁴ Tawantin esquinaspi jap'ichinas chukuwan ujlla karqanku.

³⁵ Chukoj patampitaj uj juch'uy p'alta muyu karqa, chayqa phatunman cuarta kurajniyoj karqa, chay chukoj patampitaj k'achanchasqa marcosniyoj tableroswan chay chukuwan ujlla karqa.

³⁶ Chay marcosniyoj tablerospi Hiramqa lijrasniyoj querubinesta ruwarqa, leonesta, palmerastawan campo kasqanman jina, chaykunaj muyuynimpitaj waj k'achanchasqatawan churarqa.

³⁷ Chay jinamanta chay chunka chukusta kikimpurata broncemanta unuyachispa ruwarqa, chhikan purallatataj, kikin k'achanchasqallatataj.

³⁸ Broncemanta chunka yaku churanasta ruwallarqataj, sapa uj yaku churanataj uj metro tawa cuartayoj jina karqa, chaymantaj yakoqa pusaj pachaj pusaj chunkayoj litros junt'aj, sapa ujnintaj chunkantin chukus pataman ujtakama churasqa karqa.

³⁹ Wasej paña ladoman phishqa chukusta churarqa, uj phishqa chukostataj lloq'e ladonman. Chay jatun yaku churanatataj wasej paña ladonman churarqa, ura lado inti llojsimuynejman.

^40-41 Ajinallatataj Hiramqa ruwarqa paylasta, lampasta, yuritustawan. Ajinata tukuy imata ruwayta tukucherqa Señorpa wasimpaj, imaynatachus Salomompa nisqanman jina: Iskay sayantasta, pata puntampi muyu kirpanasta, iskaynin ch'ipastawan, chay iskaynin muyu kirpanasta khataykunampaj.

⁴² Ruwallarqataj tawa pachaj granadasta chay iskaynin ch'ipaspaj, iskay sinruta sapa ch'ipapaj, chaykunawan sayantaspa patampi muyu kirpanasta khataykunankupaj.

⁴³ Chunkantin chukusta, chunka yaku churanasnintawan.

⁴⁴ Chay jatun yaku churanata, urampi kasharqanku chay chunka iskayniyoj wakastawan.

⁴⁵ Chay jawataj Hiramqa Salomompa tukuy kamachisqanta broncemanta lliphirishajta ruwarqa, paylasta, lampasta, yuritustawan. Chay tukuy imastaj Señorpa wasimpaj karqa.

⁴⁶ Chay tukuyta reyqa Jordán pampanejpi unuyachispa ruwacherqa, Sucotwan, Saretanwan tinkuypi, chaypi sumaj llink'i jallp'a kasqanrayku.

⁴⁷ Salomonqa manataj pesacherqachu broncemanta imaspis mashkhachus kasqanta, manchay ashkhapuni kasqanrayku.

⁴⁸ Chanta Salomonqa tukuy imasta ruwachillarqataj Señorpa wasimpaj qorimanta uj altarta, qorimanta uj mesatawan chayman churanankupaj Señorpaj t'aqasqa t'antasta.

⁴⁹ Qorimanta chunka k'anchanasta, phishqata paña ladoman, phishqatataj lloq'e ladoman churarqa, Diospa tiyakunan ñaupaqempi, t'ikaswan, lamparaswan, tenazaswan ima, chaykunaqa qorimanta ruwasqas karqanku.

⁵⁰ Ajinallatataj ruwacherqa yurusta pabilo k'utunasta, tazasta, juch'uy cucharasta, incienso q'osñichinastawan, chay tukuynin qori puromanta ruwasqas karqanku. Diospa tiyakunan punkuspa jap'ichinasnimpis qorillamantataj karqa, jinallataj temploj punkusnimpa jap'ichinasnimpis.

⁵¹ Ajinata rey Salomonqa Señorpa wasimpi tukuy ruwanasta tukucherqa. Chaymantataj Salomonqa Diospa wasinman apamorqa tatan David tukuy imasta Señorpa t'aqasqanta, qolqeta qoritawan, tukuy chaykunata Señorpa wasimpi valorniyoj imasta waqaychanaman saqemorqa.