1 Reyes 2 - Qheshwa Biblia DC

Davidpa qhepa kaj kamachiykunasnin

^1-2 Davidpa wañupunan p'unchay qayllamusharqa, chayrayku wawan Salomonta kamacherqa: Kunanqa noqa wañupusaj, tukuypis wañunku jinata, qantaj kallpachakuy, qhari jinataj puriy.

³ Señor Diosniykej kamachisqasninta junt'ay, ñankunasnimpi purispa, kamachisqasninta allinta qhawaspa, chantá nisqasninta, yachachiykunasninta, leyesnintawan ima, imaynachus Moisespa leyesnimpi qelqasqa kasqanman jina, tukuy ima ruwasqaykipi qhallarisqaykipipis allin risunampaj.

⁴ Señor junt'anampaj chay tukuy ima niwasqanta: Sichus wawasniyki ñankunasniypi allinta purinkuman chayqa, ñaupaqeypitaj cheqa kajta ruwaspa, tukuy sonqonkuwan tukuy yuyayninkuwantaj chayqa, ni jayk'aj faltanqachu Israelpa tronompi qampa uj qhari wawayki.

⁵ Qanqa ñapis yachankiña imatachus ruwawasqanta Sarviaj wawan Joabqa, imatachus ruwasqanta israelita soldadospa chay iskay kurajkunasninwan, Nerpa wawan Abnerwan, Jeterpa wawan Amasapiwan, paykunataqa wañucherqa mana maqanaku kashajtin, yawarta jich'aspa maqanaku tiempopi jina, p'achasniyta, ojot'asniytawan yawarchaspa.

⁶ Qantaj ari kunanqa yuyayniykiman jina ruwanki, amataj sonqo tiyaykusqapi wañupojta saqenkichu.

⁷ Chaywampis Galaadmanta Barzilaipa wawasninta khuyarinki, qampa ladoykipitaj mikhuchinki, imaraykuchus paykunaqa khuyawarqanku wauqeyki Absalonmanta ayqekushajtiy chaypacha.

⁸ Chay jawaqa, qanllawantaj kashan benjaminita Bahurimmanta, Geraj wawan Simei. Payqa chay jinatapuni maldiciwarqa noqa Mahanaimman rishajtiy. Chanta payllataj uraykamuspa taripawaj jamorqa Jordán mayuman, noqataj payman jurarqani Señorpa sutimpi: Cuchillowan mana wañuchisqaykichu, nispa.

⁹ Paytaqa amapuni khuyankichu, imaraykuchus qanqa sumaj yachayniyoj runa kanki, yachankitajchá paywan imatapis ruwayta mana allin wañuypi wañunampaj.

Davidpa wañupuynin

¹⁰ Chantá Davidqa wañuporqa, tatasnimpi covachampitaj p'amparqanku, Davidpa llajtampi.

¹¹ Davidtaj kamacherqa Israel jallp'api tawa chunka watata, qanchis watata kamacherqa Hebrompi, kinsa chunka kinsayoj watatataj Jerusalempi kamacherqa.

¹² Chanta Salomontaj tatan Davidpa tronompi tiyaykukorqa, paypa reinontaj sinch'i sayasqa atiyniyojtaj karqa.

Adoniaspata yanapajkunasnimpatawan wañuynin

¹³ Haquitpa wawan Adoniasqa jamorqa Salomompa maman Betsabejpaman; paytaj taporqa: Allin yuyaywanchu jamuyniykeqa? Paytaj kuticherqa: Arí, allin yuyaywan.

¹⁴ Chaymantataj nerqa: Uj palabrata nisunay kashan. Betsabetaj nerqa: Nillaway.

¹⁵ Adoniastaj nerqa: Qan yachanki jina reinoqa noqajta kanan karqa, tukuy Israelmanta runastaj noqata qhawashawarqanku kamachinayta. Chaywampis reinoqa Salomón wauqeyman qosqa karqa, imaraykuchus Señor ajinata nerqa.

¹⁶ Kunanqa uj imata mañakusqayki amataj qhesachawankichu. Betsabetaj nerqa: Parlallay.

¹⁷ Chantá Adoniasqa nerqa: Noqa mañakuyki parlapunawaykita rey Salomonta, sunamita Abisagta qonawampaj warmiy kanampaj, qantaqa mana qhesachasonqachu.

¹⁸ Betsabetaj nerqa: Walejlla; reyta noqa parlapayapusqayki.

¹⁹ Betsabetaj jamorqa rey Salomompaman Adoniaspaj parlapayapoj. Reyqa jatarikorqa mamanta taripaj, chimpaspataj payman k'umuykorqa. Chantaqa watejmanta tronoman tiyaykukorqa, mamampajtaj uj jatun tiyanata churachiporqa, mamantaj paña ladompi tiyaykukorqa.

²⁰ Paytaj reyman nerqa: Munani qanmanta uj pisi imata mañasuyta, amataj: Mana, niwankichu. Reytaj payta nerqa: Mamáy, mañakullaway, mana qhesachasqaykichu.

²¹ Chaymanta payqa reyman nerqa: Sunamita Abisagqa wauqeyki Adoniasman warmin kanampaj qosqa kachun.

²² Rey Salomonqa mamanman kutichispa nerqa: Imaraykutaj sunamita Abisagta Adoniaspaj mañankiri? Reinotapis paypajqa mañapullaytaj ari, pay kuraj wauqey kasqanrayku, paywanñataj kashanku sacerdote Abiatarwan, Sarviaj wawan Joabpiwan.

²³ Chaymantataj rey Salomonqa Señorpa sutimpi jurarqa: Señor sinch'ita jasut'iwachun, sichus kayta parlasqanmanta Adonías mana wañonqa chayqa.

²⁴ Señorpa sutimpi jurani, payqa tatay Davidpa tronompi allinta tiyachiwan, mirayniytapis sumajta sayachenqa, Adoniasqa kunampacha wañonqa.

²⁵ Chantaqa rey Salomonqa kamacherqa Joiadaj wawan Benaiata, Adoniasta wañuchinanta. Paytaj rispa Adoniasta wañuchimorqa.

²⁶ Sacerdote Abiatartataj reyqa kamacherqa: Ripuy Anatot jallp'asniykiman, qanqa wañunayki karqa, chaywampis mana wañuchisqaykichu, Diospa trato cajonninta tatay Davidpa ñaupaqenta apasqaykirayku, chantapis tataywan khuska tukuy llakiynimpi karqanki.

²⁷ Ajinata Salomonqa qharqorqa Abiatarta Señorpa sacerdoten kasqanmanta, jinamanta Señorpa palabran junt'akunampaj, Elej ayllunmanta Silopi parlasqanman jina.

²⁸ Chanta Joab uyarerqa kay imasta, imaraykuchus paypis Adoniasta qhatillarqataj; Absalontarí mana qhaterqachu, chayrayku Joabqa ayqekorqa Señorpa toldonman, chaypitaj altarpa wajrasninmanta jap'iykukorqa.

²⁹ Rey Salomonmantaj willarqanku Señorpa toldonman Joab ayqekusqanta, altar chaynejpitaj kashasqanta. Chanta Salomón kacharqa, Joiadaj wawan Benaiata, kamachispa Joabta wañuchimunanta.

³⁰ Benaiaqa Señorpa toldonman yaykuspa nerqa: Rey kamachisunki llojsimunaykita, nispa. Joabtaj kuticherqa: Mana! Kaypi wañusaj! Benaiaqa kutimuspa reyman willarqa Joabpa imaynatachus kutichisqanta.

³¹ Reytaj payta nerqa: Ruway nisqanta jina, wañuchispataj p'ampaykuy, chanta chinkachiy tataypa wasinmanta noqaj ñaupaqeymantawan, Joab qhasillamanta yawarta jich'achisqa chayta.

³² Paypa patanmantaj yawar jich'asqanta Señorqa kutichenqa, imaraykuchus Joabqa iskay runasta wañucherqa, paymanta aswan sumaj cheqan runasta, tatay Davidpa mana yachasqallan. Israelitaspa soldadosnimpa kamachejnin Nerpa wawan Abnerta, Judamanta soldadospa kamachejnin Geterpa wawan Amasatawan.

³³ Paykunaj yawarnintaj Joabpa uman pataman jinataj mirayninmampis urmachun wiñaypaj. Señorpa sonqo tiyasqa kaynintaj wiñaypaj kallachumpuni Davidpa wasimpi, miraynimpiwan, tronompiwan.

³⁴ Chanta Joiadaj wawan Benaiaqa rispa Joabta wañuchimorqa, ch'in cheqapi wasimpitaj p'amparqanku.

³⁵ Reytaj Joabpa cuentanmanta Joiadaj wawan Benaiata soldadospa kurajnin kanampaj churarqa, sacerdote Sadoctataj Abiatarpa cuentanmanta.

³⁶ Chaymanta reyqa Simeita wajyachimuspa payman nerqa: Uj wasita Jerusalempi ruwakuy chaypitaj tiyakunki, chaymantataj ama maymampis llojsinkichu.

³⁷ Sichus kaymanta llojsispa Cedrón mayuta pasawaj chayqa, chaypacha wañunkipuni, chaypajtaj qanlla juchayoj kanki.

³⁸ Simeitaj reyman kutichispa nerqa: Parlawasqaykeqa cosapacha, imaynatachus wiraqochi reyníy, kamachiwashanki, ajinata ruwanqa kay kamachiykeqa; Simeitaj unayta Jerusalempi tiyakorqa.

³⁹ Kinsa wata qhepatataj Simeipa iskay kamachisnin ayqekusqanku Maacaj wawan Gatmanta rey Aquispaman. Simeimantaj willarqanku: Kamachisniykeqa Gatpi kashanku, nispa.

⁴⁰ Chanta Simeeqa burronta karunaykuspa, Aquispaman Gatman chayarqa kamachisninta mask'aspa. Ajinamanta Simeeqa Gatmanta kamachisninta pusarikamorqa.

⁴¹ Chaytataj Salomonman willarqanku, Simeeqa, Jerusalenmanta Gatman risqanta, chaymanta kutimusqantaña.

⁴² Chanta reyqa Simeita wajyachimuspa nerqa: Manachu Señorpa sutimpi juracherqayki, nerqaykitaj: Sichus kaymanta maymampis llojsinki chayqa wañunaykita? Qantaj niwarqanki parlasqaykeqa cosapacha, noqa kamachiykitaj kasusqayki, nispa.

⁴³ Imaraykutaj mana waqaycharqankichu Señorman jurasqaykitari, noqaj nisqaytapis?

⁴⁴ Chantapis reyqa Simeiman nillarqataj: Qanqa yachanki tukuy ima sajratachus tatay Davidpa contrampi ruwasqaykita, chaytaqa sonqoykipis yachashallantaj. Kunanqa Señor kutiykuchimusunki chay sajrata qampa umayki pataman.

⁴⁵ Rey Salomonqa bendicisqa kanqa, rey Davidpa tronompis wiñaypaj sayanqa Señorpa ñaupaqampi.

⁴⁶ Chanta reyqa kamacherqa Joidaj wawan Benaiata, paytaj llojsiytawan Simeita wañucherqa. Chaymanta reinoqa Salomompa makimpi sumaj kallpachasqa karqa.