1 Reyes 1 - Qheshwa Biblia DC

Rey Davidpa machuyaynin

¹ Rey Davidqa machu runaña karqa, ashkha watasniyojtaj, chayrayku p'achaswan khataykojtinkupis manaña q'oñichakuyta atejchu.

² Kamachisnintaj payman nerqanku: Señor reyniyku qampaj uj doncella sipasta mask'asqayku, qhawasunampaj, qanwan khuska puñuspataj q'oñichasunampaj.

³ Tukuynin Israel jallp'apitaj uj k'acha sipasta mask'arqanku, tarerqankutaj Sunem llajtamanta Abisagta, chantá reyman pusamorqanku.

⁴ Chay sipastaj ancha k'achitapuni karqa, paytaj reyta qhawaj chantá sirvejtaj, chaywampis reyqa payta mana llankharqachu.

Adonías kamachiyta munan

⁵ Chanta Haguitpa wawan Adoniasqa tatan Davidpa contrampi okharikorqa: Kunanqa noqa kamachisaj, nispa. Adoniasqa wakichikorqa carretasta, caballospi purej runasta, phishqa chunka runastawan paywan khuska kanankupaj.

⁶ Tatantaj ni jayk'ajpis k'amerqachu, imaraykutaj chay jinata ruwashanki?, nispa, Adoniasqa allin rijch'ayniyoj karqa, payqa Absalonmanta qhepata nacekorqa.

⁷ Adoniasqa uj tratota ruwarqa Sarviaj wawan Joabwan, sacerdote Abiatarwan ima, paykuna yanaparqanku Adoniasta.

⁸ Chaywampis sacerdote Sadoc, Joiadaj wawan Benaía, Natán profeta, Simei, Rei, chantá Davidpa tukuy kuraj runasnin imaqa Adoniasta mana qhaterqankuchu.

⁹ Chaypacha Adoniasqa ovejasta, wakasta, wira waka uñastawan ñak'arqa Zohelet qaqa chaynejpi, Rogel phujyu qayllanejpi, wajyarqataj reypa wawasnin tukuynin wauqesninta mikhunankupaj, Judamanta reypa kamachisnintawan.

¹⁰ Manataj wajyarqachu profeta Natanta, Benaiata, Davidpa wapu soldadosninta, nillataj wauqen Salomontapis.

¹¹ Chaypacha Natanqa Salomompa maman Betsabeman nerqa: Manachu yachanki Haquitpa wawan Adonías kamachishasqanta, David wiraqochinchejpa mana yachasqallan?

¹² Kunanqa jap'iy kay yuyaychasusqayta, wawayki Salomonwan qanwan ima ama wañunaykichejpaj.

¹³ Rey Davidpaman yaykuy, niytaj: Reyníy, manachu jurarqanki kay kamachiykiman: Noqaj qhepaypi wawayki Salomón kamachenqa tronoypitaj tiyakonqa, nispa. Imaraykutaj kunanqa Adonías kamachishanri?

¹⁴ Chantapis Natanqa nillarqataj, reywan qan parlashallajtiykiraj, noqapis qhepaykita yaykumuytawan chay nisqasniykita reyman nillashajtaj.

¹⁵ Chaypacha Betsabeqa reypa puñunan wasinman yaykorqa, chaypitaj Sunenmanta Abisag reyta qhawasharqa, ancha machuña kasqanrayku.

¹⁶ Reyman chimpaspataj Betsabeqa pampaman k'umuykorqa, reytaj payta nerqa: Imatataj munanki?, nispa.

¹⁷ Betsabetaj kuticherqa: Reyníy, qan jurarqanki kay kamachiykiman Señor Diosniykej sutimpi, Salomón waway kamachinanta qampa qhepaykipi, tronoykipitaj tiyananta.

¹⁸ Kunantaj Adonías kamachishan, qantaj, reyníy, mana chaytaqa yachankichu.

¹⁹ Wakasta, wira waka uñasta, ashkha ovejastawan ñak'aspa, mikhunankupaj wajyachin reypa tukuynin wawasninta, sacerdote Abiatarta, soldadospa kurajnin Joabtawan, kamachiyki Salomontarí manataj wajyachinchu.

²⁰ Kunantaj, reyníy, Israel aylloqa qanllata qhawashasunku, qan willanaykipaj pichus qhepaykipi kamachinanta tronoykipitaj tiyananta.

²¹ Mana jina kajtenqa, qan wañupojtiyki, noqawan Salomón wawaypiwan juchachasqas rikhurisqayku.

²² Betsabé reywan parlashajtillanraj, chayamorqa Natán profeta.

²³ Reymantaj willarqanku profeta Natán chayamusqanta. Profetataj reypaman yaykuspa ñaupaqempi pampaman k'umuykukorqa.

²⁴ Natantaj nerqa: Reyníy, qampunichu nerqanki: Noqaj qhepaypi Adonías kamachenqa, tronoypitaj tiyakonqa, nispa?

²⁵ Kunantaj uraykuspa wakasta, wira waka uñasta, ashkha ovejastawan ñak'achin, mikhunankupajtaj wajyachin reypa tukuynin wawasninta, soldadospa kurajkunasninta, sacerdote Abiatartawan. Kunantaj mikhushanku ujyashankutaj paypa ñaupaqempi, qhaparinkutaj: Kausachun rey Adoniasqa!, nispa.

²⁶ Manataj wajyachiwaykuchu noqa kamachiykita, sacerdote Sadocta, Joiadaj wawan Benaita, nitaj kamachiyki Salomontapis.

²⁷ Reyníy, ajinatapunichu kamacherqanki kamachisniykiman mana willaspalla, pichus kamachinanta tronoykipi qampa qhepaykita?

David nin Salomón kamachinanta

²⁸ Chanta rey Davidqa kamacherqa Betsabeta wajyamunankuta. Paytaj reyman chimpaykuspa ñaupaqempi sayakorqa.

²⁹ Reytaj jurarqa kay jinata: Señorpa sutimpi jurani, paymin almayta librarqa tukuy llakiymanta.

³⁰ Kunanqa jinapuni kanqa. Salomón wawayki kamachenqa noqaj cuentaypi, paytaj tiyakonqa tronoypi, imaynatachus jurarqaykiña Israelpa Señor Diosnimpa sutimpi.

³¹ Chanta Betsabeqa reypa ñaupaqempi pampaman k'umuykorqa, qhaparispataj nerqa: Reyniy David kausachun wiñaypaj!

³² Rey Davidtaj kamacherqa: Wajyampuwaychej sacerdote Sadocta, profeta Natanta, Joiadaj wawan Benaiatawan, nispa. Paykunataj chay rato jamorqanku reypa ñaupaqenman.

³³ Reytaj paykunaman nerqa: Qankunawan kamachisniypiwan khuska, noqaj mulaypi Salomonta pusaychej Gihonman.

³⁴ Chanta jaqaypitaj sacerdote Sadoc, profeta Natanwan Salomompa umanman aceitewan jawenqanku Israelpa kamachejnin kanampaj; putututa waqachispataj ninkichej: Kausachun kamachej Salomón!, nispa.

³⁵ Chaymanta qankunaqa qhepanta rinkichej, paytaj jamuspa tronoypi tiyaykukonqa, noqaj cuentaypitaj kamachenqa, imaraykuchus paytaqa noqa ajllani kamachinampaj Israelpi Judapiwan.

³⁶ Chantaqa Joiadaj wawan Benaiaqa reyman kutichispa nerqa: Ajina kachun; ajinata nichun Señor reyniypa Diosnin.

³⁷ Imaynatachus Señorqa reyniywan karqa ajinallatataj Salomonwampis kachun, tronontapis reyniy Davidpa trononmanta astawan jatuntaraj ruwachun.

³⁸ Chaymantataj Sacerdote Sadoc, profeta Natán, Joiadaj wawan Benaiawan, cereteoswan peleteospiwan uraykorqanku, Salomontataj rey Davidpa mulanman lloq'aykuchispa Cihonman pusarqanku.

³⁹ Sacerdote Sadoctaj Dioswan tinkukuna toldoman uj wajrapi aceiteta jap'ispa, Salomompa umanman jawiykorqa; putututa waqachispataj tukuynin ayllu qhaparispa nerqanku: Kausachun kamachej Salomonqa!, nispa.

⁴⁰ Chaymantaqa tukuynin ayllu paypa qhepanta wicharerqanku qhenasta tocaspa, may jatun kusiywan ch'ajwaspa, jallp'atapis kuyurichej jinapuni karqanku.

⁴¹ Adoniastaj tukuy wajyasqas karqanku chaykunawan ima, mikhuyta tukusqankumantaña chay ch'ajwasqankuta uyarerqanku. Joabtaj putututa waqajta uyarispa, nerqa: Imajtintaj llajtapi chay jinatapuni ch'ajwashankuri?

⁴² Joab parlashajtillanraj sacerdote Abiatarpa wawan Jonatán chayamorqa. Paytataj Adoniasqa nerqa: Qanqa sumaj wapu runa kanki, yaykumuy ari, qanqa sumaj willaykunastachá apamushanki.

⁴³ Kutichispataj Jonatanqa Adoniasman willarqa: Cheqamanta rey Davidpuni Salomonta churan rey kanampaj.

⁴⁴ Chantaqa reypuni Salomontawan khuska kacharqa sacerdote Sadocta, profeta Natanta, Joiadaj wawan Benaiata, jinallataj cereteosta peleteostawan ima, paykunaqa rey Davidpa mulampi Salomonta lloq'aykucharqanku.

⁴⁵ Profeta Natanwan, sacerdote Sadocwan Gihompi Salomonta rey kanampaj aceitewan jawiykunku, chaymantataj kusisqas kutimunku. Chayrayku ari chay jinata tukuy ayllu ch'ajwashanku, chaytataj qankunapis uyarerqankichej.

^46-47 Chay jawa Salomonqa tiyaykukunña tronopi, Rey Davidpa kamachisnimpis rinkuña payta napaykoj; Diosqa, sutiykimanta nisqaqa astawanraj Salomonpa sutinta uyarisqata ruwachun, tronontapis ajinallatataj qampa tronoykimanta nisqaqa astawan jatuntaraj ruwachun.

⁴⁸ Chantá reyqa nerqa: Israelpa Señor Diosnin bendicisqa kachun, aylluymanta ujnin kajta tronoypi tiyasqata rikunayta munasqanrayku.

⁴⁹ Adoniaspa wajyachisqasnenqa sinch'ita mancharikorqanku, sapa ujninkutaj ñanninkutakama riporqanku.

⁵⁰ Chayrayku Adoniasqa rey Salomonta manchachikuspa rispa altarpa wajrasninmanta jap'ikamorqa.

⁵¹ Chaytataj Salomonman willarqanku: Adoniasqa qanta manchachikususpa altarpa wajrasninmanta jap'iykukuspa kashan, nintaj: Jurawachun rey Salomonqa ama cuchillowan wañuchinawanta kay kamachinta.

⁵² Salomontaj nerqa: Sichus payqa allin runa kanqa chayqa, mana ni uj chujchallampis pampaman urmanqachu; sichus paypi sajrata tarisaj chayqa wañonqa.

⁵³ Chanta rey Salomonqa kacharqa chay altarmanta pusamunankuta, chaymantataj Adoniasqa rerqa Salomompaman, ñaupaqempitaj k'umuykorqa. Salomontaj payta nerqa: Ripuy wasiykiman, nispa.