SALMOS 70 - Dios Rimashcata Quillcashcami

Llaquimanta llucchichun Diosta mañashcamanta

Cantaccunata pushac Diosta yuyarichic nishpa cantachichun, David ruhuashca Salmomi.

¹ ¡Sumac Dioslla, ñucata quishpichingapac shamuiyari! ¡Ñuca Dioslla, ayudangapac utca shamuiyari!

² Ñucata huañuchishun niccunaca pingaichishpa muspachishca cachun. Ñucata llaquichishun niccunaca pingaihuan cutishca cachun.

³ Ñuca llaquihuan cacpi: «¡Allitamari chashna tucurca!» nishpa burlashpa asiccunaca pingaihuan cutishca cachun.

⁴ Tucui canta mashcaccunaca yallita cushicuchun. Quishpirinata munaccunaca: «Diosta jatunyachishca cachun» nichuncuna.

⁵ Ñucaca imapish illaclla, huacchami cani. ¡Dioslla, utca ñucapacman shamuiyari! ¡Mandac Dioslla, ñucata ayudashpa quishpichicmi cangui! ¡Mandac Dioslla, ama unayaichu!