SALMOS 125 - Dios Rimashcata Quillcashcami

Dios pai acllashcacunata cuidashcamanta

Huichai rishpa cantanami.

¹ Mandac Diospi shunguta churaccunaca Sión urcu shinami huiñaita maita mana cuyuchipac causancuna.

² Jerusalén puebloca, muyunditami urcucunata charin. Chashnallatacmi Mandac Diospish pai acllashcacunapac muyundita cuidacun.

³ Millaita ruhuaccunaca cashcata ruhuaccunapac llactapica mana unaita mandangachu. Chashna unaita mandacpica cashcata ruhuaccunami paicunapac maquihuan mana allita ruhuangacuna.

⁴ Mandac Dioslla, allita ruhuac chuya shungucunamanca allita ruhuaiyari.

⁵ Ashtahuanpish Diosmanta anchurishpa, millaita ruhuaccunataca millaita ruhuaccunallahuantacmi cachanga. ¡Israelcunamanca cushi causai tiyachun!