SALMOS 1 - Dios Rimashcata Quillcashcami

SHUCNIQUI PARTE (Salmos 1—41 ) Cashcata ruhuacmantapish, juchata ruhuacmantapish

¹ Millaita ruhuaccuna cunashcatapish mana uyac, juchata ruhuaccunapac ñantapish mana catic, Dios-huan burlaccunahuan mana tandaric runaca maimi cushicunmi.

² Chaipac randica Mandac Dios mandashcata pactachishpami cushicun. Pai mandashcapimi tutapish, punzhapish yuyaricunlla.

³ Yacu patapi huiñashca yura pangacunapish mana urmashpa pucuna punzhapi pucuc shinami canga. Tucui imata ruhuashcapish allimi canga.

⁴ Ashtahuanpish millaita ruhuaccunaca huaira apana ucsha shinami can.

⁵ Chaimantami millaita ruhuaccunaca taripana punzhapica, mana jataringacuna. Cashcata ruhuaccunapac tandanacuipipish mana chayaringacuna.

⁶ Cashcata ruhuaccunapac causaitaca Mandac Diosmi ricucun. Ashtahuanpish millaita ruhuaccunapac causaica chingarinallami.