JEREMÍAS 47 - Dios Rimashcata Quillcashcami

Filisteocunata llaquichinata huillashcamanta

¹ Gaza llactapi causac filisteocunata jatun mandac Faraón manarac llaquichicpimi, Mandac Diosca filisteocunamanta pai ima nishcata huillac Jeremiasman huillarca.

² Mandac Dios huillashpaca: «Jahua lado llactamantaca yacu tendirishpa shamuc shina, shamushpami cai llactatapish, caipi ima tiyashcatapish, llactatapish, chaipi tucui causaccunatapish tapanga. Shina tapacpica, tucui chaipi causac gentecunami caparishpa huacanga.

³ Caballocuna tulun nishpa callpamucta uyashpa, carreta ruedacuna huacashcata uyashpami taitacunaca huahuacunata shitashpa callpanga. Yallita manchaihuan chucchushpami imata mana ruhuai pudinga.

⁴ Filisteocunatapish, paicunata ayudac Tiro, Sidón llactacunatapish tucuchina punzhami chayamushca. Mama cucha chaupipi tiyac Caftor llactamanta chaupirishpa shamushca filisteocunataca Mandac Diosmi tucuchinga.

⁵ Gaza runacunaca llaquirishpami, uma acchata pitinga. Ascalonpi causaccunaca tucuringami. Pugru pambacunapi causaccuna, ¿ima horascamantac quiquin aichata chugriringuichic?

⁶ Mandac Diospac espadalla, ¿ima horastac samarigringui? Espadalla, huacaichinapi yaicushpa samariyari.

⁷ Mandac Dios ñucallatacmi Ascalón llactapi causaccunata, mama cucha ladopi tiyac llactapi causaccunata huañuchichun mandani. Shina cacpica, ¿imamantatac samaringuiyari?» ninmi.