2 CRÓNICAS 9 - Dios Rimashcata Quillcashcami

Sabá llactata jatun mandac huarmi Salomonta ricungapac shamushcamanta

¹ Sabá llactata jatun mandac huarmica Salomontaca Mandac Diospac shutimanta tucui alli nishpa parlanacucta uyashpami, achca gentecunata pushashpa, Jerusalenman shamurca. Chai huarmica mishquilla ashnacucta, achca curita, alaja rumicunata camellocunapi apachishpami, mana cutichi pudipac tapuicunata Salomonman tapushpa yachangapac shamurca. Paipacman shamushpaca paipac shungupi tucui ima yuyashcatami parlarca.

² Ashtahuanpish Salomonca tucui chai huarmi tapushcatami cutichirca. Jatun mandac mana cutichina pudishca tapuicunaca imapish mana tiyarcachu.

³ Sabá llactata jatun mandac huarmica Salomón yallita yachac cashcatapish, pai mandashpa tiyana huasita shayachishcatapish ricurcami.

⁴ Shinallatac paipac mizapi micunatapish, paita serviccuna causana ucucunatapish, cullquimanta serviccunatapish, paicunapac churanacunatapish, Diospac huasiman yaicuna cashcatapish, vinota cuccunatapish paicunapac churanatapish, Mandac Diospac huasipi animalcunata cushpa tucui rupachictapish ricurcami. Chaita ricushpami, yallita mancharishpa saquirirca.

⁵ Chaimantami jatun mandactaca: «¡Ñuca llactallapitacmi can imata ruhuashcacunatapish, can yallita yachac cashcatapish uyarcani! ¡Chaica chashnatacmi cashca!

⁶ Ashtahuanpish ñuca caiman shamungacamanmi mana crircani. Ñuca ñahuihuantac ricushpami crini. Can chashna jatun yachac cashcatapish, yallita charic cashcatapish chaupillatacmi parlashca. Ñuca uyashcamantaca ashtahuan yallitami ricucuni.

⁷ Cambac runacunaca mai alli nishcacunami. Cambac sumac yachaita cambac ñaupapi punzhanta uyac canta servic cai runacunaca yallita cushicushpami purincuna.

⁸ Canta Mandac Diosca alli nishca cachun. Paica canta alli nishpami, pai mandashpa tiyarinapi tiyachishca. Mandac Diosca israelcunata cuyashpami, tucuipac allita ruhuashpa, imatapish cashcata ruhuashpa mandachun cantaca churashca» nirca.

⁹ Shina nishca quipami, chai huarmica patsac ishcai chunga talento curita, mishquilla ashnacuc achca jambinacunata, alaja rumicunata, jatun mandacman curca. Sabá llactata jatun mandac huarmi jatun mandac Salomonman mishquilla ashnacucta achcata cungapac apamushca shinaca, jaicapi pi manarac apamurcachu.

¹⁰ Shinallatac Hiramta, Salomonta serviccunapish Ofir llactamantami curita apamushca carca. Paicunallatacmi sándalo caspicunatapish, alaja rumicunatapish apamurca.

¹¹ Chai sándalo caspicunahuanmi jatun mandacca Mandac Diospac huasipipish, pai mandashpa tiyana huasipipish gradata ruhuachirca. Cantaccunamanpish arpacunata, salteriocunatami ruhuachirca. Cai shina caspicunataca jaicapi Judá llactamanca mana apamushcachu carca.

¹² Jatun mandac Salomonca Sabá llactata jatun mandac huarmi tucui imata mañashcatami curca. Chai huarmi imata apamushcamantapish yallitami curca. Chai quipami mandac huarmica paita servic runacunandi paipac llactaman cutirca.

Salomonca yallita charic alli ricsishca cashcamanta

¹³ Salomonca huatantami impuestomantaca sucta patsac sucta chunga sucta talento curita japirca.

¹⁴ Randishpa, catushpa puriccuna impuestota cushcacarin mana yupashcachu carca. Arabia llactata jatun mandaccuna, pai mandacuc llactapi churashca mandaccunaca tucuimi curita, cullquita Salomonman apamuccuna carca.

¹⁵ Jatun mandac Salomonca ishcai patsac jatun escudotami curimanta ruhuachirca. Cada escudopimi sucta patsac ciclos pezac ashtahuan alli curita nuyuchishpa churarca.

¹⁶ Shinallatac quimsa patsac uchilla escudocunatami curimanta ruhuachirca. Cada escudopimi quimsa patsac ciclos curita nuyuchishpa churarca. Chaicunataca «Líbano urcumanta caspicuna» shuti ruhuashca huasipimi churarca.

¹⁷ Jatun mandacca mandangapac tiyarinatapish marfilmantami ruhuarca. Chaitaca ashtahuan alli curihuanmi jahuata llutarca.

¹⁸ Chai tiyarinaman huichicungapacca sucta gradami tiyarca. Chaquita samachinatapish chai tiyarinallapitacmi curimanta ruhuarca. Chaipi tiyarishpa, maquita samachinapish ishcai ladomantami ruhuashca carca. Maquita samachinacunapica ishcai ladomantami leoncunata churashca carca.

¹⁹ Chai sucta gradapipish chunga ishcai leoncunatami tucui gradapi ishcai ladoman shuc shucta churashca carca. Chashna tiyarina shinataca maijan mandana llactapipish, jaicapi mana ruhuashcachu carca.

²⁰ Jatun mandac Salomón ubiana vasocunapish curimanta ruhuashcami carca. Shinallatac Líbano urcu caspicunahuan shayachishca huasipi tiyac tucui platocunapish ashtahuan alli curimantami ruhuashca carca. Salomón mandacuc punzhacunapica cullquica yanga shinallami carca.

²¹ Jatun mandac Salomonpac jatun barcocunaca Hiramta serviccunahuan, Tarsis llactaman rishpami, chai barcocunapi curita, cullquita, marfilta, monocunata, pavo realcunata cada quimsa huatapi shuc cutin apamuc carca.

²² Chashnami jatun mandac Salomonca tucui llacta mandaccunata atishpa chayucpish, alli yachacpish tucurca.

²³ Llactacunata jatun mandaccunaca tucuimi Salomonta ricunata munarcacuna. Mandac Dios paiman yachachishcata huillacta uyangapacmi paipacman shamunata munaccuna carca.

²⁴ Tucui paicunami paiman cungapacca cullquimanta, curimanta ruhuashca alaja charinacunata, churarinacunata, macanacunata, mishquilla ashnacuc jambinacunata, caballocunata huatanta apamuccuna carca.

²⁵ Salomonca paipac caballocuna shayanatapish, macanacuna carretacunata churanatapish, chuscu huaranga huasitami charirca. Caballopi ric chunga ishcai huaranga soldadocunatami charirca. Paicunatami maijantaca macanacuna carretacunata huacaichina pueblocunapi, shuccunataca jatun mandacta cuidachun Jerusalenpi churarca.

²⁶ Salomonca Eufrates jatun yacumantaca filisteocunapac llactacaman, shinallatac Egipto llacta tupanacuicamanmi jatun mandaccunataca mandashpa charirca.

²⁷ Cullquitaca rumita shinami, Jerusalenpica charirca. Cedro caspicunatapish, Sefela pambapi tiyac sacha higo yuracunata shinami achcata charirca.

²⁸ Caballocunataca Egiptomanta, shinallatac shuctac jatun llactacunamantami Salomonca apamuc carca.

Salomón huañushcamanta

²⁹ Callarimanta tucuricaman Salomón ashtahuan ima ruhuashcacunaca Dios ima nishcata huillac Natán quillcashcapipish, Silo pueblopi causac Ahiasman Dios huillashcata quillcashcapipish huillacunmi. Shinallatac Dios ricuchishcata huillac Iddo Nabatpac churi Jeroboamta llaquichinamanta huillashcata quillcashcapipish tiyacunmi.

³⁰ Salomonca tucui Israel llactataca chuscu chunga huatatami Jerusalenpi mandarca.

³¹ Salomón huañushpa, paipac ñaupa taitacunahuan tandanacugricpica, paipac taita Davidpac pueblopimi enterrarca. Paipac randica paipac churi Roboammi mandai callarirca.