2 CRÓNICAS 36 - Dios Rimashcata Quillcashcami

Joacaz Judá llactata mandashcamanta

¹ Chai llactapi causaccunaca Josiaspac churi Joacaztami taitapac randi jatun mandac cachun Jerusalenpi churarcacuna.

² Joacazca ishcai chunga quimsa huatata charishpami mandai callarirca. Quimsa quillatami Jerusalenpi mandarca.

³ Paitaca Egipto llactata jatun mandacmi Jerusalenmanta anchuchirca. Shina anchuchishpami, Judá llactapi causaccunataca patsac talento cullquita, shuc talento curita impuestota cushpa causachun mandarca.

⁴ Egipto llactata jatun mandacca Judá llactata, Jerusalenta jatun mandac cachunca, Joacazpac huauqui Eliaquimtami churarca. Eliaquimtaca Joacimtami shutichirca. Paipac huauqui Joacaztaca Necaomi Egiptoman aparca.

Joacim Judá llactata mandashcamanta

⁵ Joacimca ishcai chunga pichca huatata charishpami mandai callarirca. Paica chunga shuc huatatami Jerusalenpi mandarca. Paita Mandac Diospac ñaupapica mana allitami ruhuarca.

⁶ Babilonia llactata jatun mandac Nabucodonosorca paihuan macanacungapac shamushpami, cadenacunahuan huatashpa Babilonia llactaman aparca.

⁷ Babilonia llactata jatun mandac Nabucodonosorca Mandac Diospac huasipi imalla tiyashcacunatapish apashpami Babiloniapi paipac diospac huasipi churarca.

⁸ Joacim ashtahuan imata ruhuashcapish, yalli millana juchacunata ruhuashcapish, pai ima shina llaquita apashcapish, Israel llactata, Judá llactata jatun mandaccuna imata ruhuashcacunata quillcashcapimi tiyacun. Joacim huañucpica, paipac randica paipac churi Joaquinmi mandai callarirca.

Joaquín Judá llactata mandashcamanta

⁹ Joaquinca chunga pusac huatata charishpami mandac callarirca. Paica quimsa quilla chunga punzhatami Jerusalenpi mandarca. Paita Mandac Diospac ñaupapica mana allitami ruhuarca.

¹⁰ Ña huata tucucucpimi, Nabucodonosorca Joaquintapish, Mandac Diospac huasipi tiyashca ashtahuan sumac charinacunatapish Babiloniaman apamuchun cacharca. Paita apashpaca, paipac huauqui Sedequiastami Judá llactata, Jerusalén pueblota jatun mandac cachunca churarca.

Sedequías Judá llactata mandashcamanta

¹¹ Sedequiasca ishcai chunga shuc huatata charishpami mandai callarirca. Paica chunga shuc huatatami Jerusalenpi mandarca.

¹² Paita Mandac Diospac ñaupapica mana allitami ruhuarca. Mandac Dios ima nishcata huillac Jeremías Diosmanta huillacucpipish, paica mana llaquirircachu.

¹³ Shinallatac jatun mandac Nabucodonosortapish mana cazurcachu. Nabucodonosorca paihuan shuc shinalla cachunmi, Diospac shutipi ari nishca carca. Chashna ari nishca jahuami sinchi shungu tucushpa, mana pactachishpa, israelcunata Mandac Diospacman cutirinatapish mana munarca.

¹⁴ Shinallatac curacunata tucui mandaccunapish, tucui gentecunapish ashtahuanmi mana allita ruhuashpa catircacuna. Shuctac llactapi causaccuna shinallatacmi mana allita ruhuashpa Mandac Diospac huasita mapayachirca. Chai huasitaca Mandac Diosllatacmi paipaclla cachun Jerusalenpi chicanyachishca carca.

¹⁵ Paicunapac ñaupa taitacunata Mandac Diosca pai acllashca gentecunatapish, paipac huasitapish llaquishpami, pai ima nishcata huillaccunata cutin cutin huillachirca.

¹⁶ Ashtahuanpish paicunaca Mandac Dios cachashca huillaccuna huillashcata mana cazushpami asircacuna. Dios huillachishca shimita yangapi churashpami, Dios ima nishcata huillaccunata burlarcacuna. Pai acllashcacuna chashna yallita llaquichicpimi, Mandac Diosca yallita piñarishpa, ima shina mana jarcari pudishpa llaquichirca.

Judá llactapi causaccunata prezu apashcamanta

¹⁷ Mandac Diosca chashna yallita piñarishpami, Judá llactapi causaccunata llaquichichunca, caldeocunata jatun mandacta cacharca. Paimi quipa huiñai mosocunatapish, carihuan manarac chayarishca solteracunatapish, yuyaccunatapish, ungushcacunatapish mana llaquishpa, Diospac huasi ucullapitac huañuchirca. Chashnami tucui paicunataca jatun mandacpac maquipi churarca.

¹⁸ Shinallatac Mandac Diospac huasipi tucui ima tiyashcacunataca uchillacunatapish, jatuncunatapish, chaipi sumac tiyashcatapish aparcami. Shinallatac jatun mandacpac huasipi, caishuc mandaccunapac huasipi ima sumac charishcacunatapish tucuimi Babiloniaman aparca.

¹⁹ Chai quipaca Mandac Diospac huasita rupachishpami, Jerusalén muyundi jatun pircatapish urmachirca. Mandashpa tiyana huasitapish rupachishpami, chai huasipi imalla sumaimana tiyashcacunatapish tucui chingachirca.

²⁰ Espadahuan huañuchinamanta miticushpa saquirishcacunataca Babiloniamanmi prezu aparca. Paicunaca Persia llactata jatun mandac tiyangacamanmi Nabucodonosortapish, paipac churicunatapish servishpa causarca.

²¹ Mandac Diosca paicunata cashna llaquichinataca Dios ima nishcata huillac Jeremiastami huillachishca carca. Paicunata chai llactaman apacpimi, Judá llactaca canchis chunga huatacunacaman sumacta samarirca.

Jatun mandac Ciro Jerusalenman cutimuchun mandashcamanta

²² Persia llactata jatun mandac Ciro ña shuc huatata mandacucpimi, Mandac Diosca Jeremiasman huillachishca pactachun, Mandac Diosllatac Persia llactata jatun mandac Ciroman yuyaita cushpa, pai mandacuc tucui llactacunapica shimillahuanpish, quillcacunahuanpish cashna huillachun mandarca:

²³ Persia llactata jatun mandac Ciroca: «Jahua pachapi causacuc Mandac Diosmi ñucataca cai pachapi tiyac tucui llactacunata mandachunpish, Judá llactapi tiyac Jerusalenpi paipac huasita shayachichunpish mandarca. Shina cashcamanta cancunapurapi Pai acllashca Mandac Diosta caticcuna caipi tiyashpaca, tucui Judá llactaman cutichuncuna. Paicunata Mandac Diosca paicunahuan cachun» nishpami huillarca.