2 CRÓNICAS 35 - Dios Rimashcata Quillcashcami

Josías Pascua micuita ruhuashcamanta

¹ Josiasca Mandac Diospac Pascua micuitami Jerusalenpi ruhuarca. Callari quilla chunga chuscu punzhapimi Diosman animalta cushpa huañuchishpa Pascuata ruhuarca.

² Curacunataca paicuna ruhuanallatatac ruhuachun mandashpami Mandac Diospac huasipi cushilla servichun churarca.

³ Tucui israelcunata yachachic Diospaclla chicanyachishca levitacunataca: «Ama cutin huanducungapac Diospac Arcataca israelcunata jatun mandac Davidpac churi Salomón shayachishca huasipi churaichic. Cunanca, cancunata Mandac Diostapish, pai acllashca israelcunatapish servishpa causaichic.

⁴ Israelcunata mandac Davidpish, paipac churi Salomonpish mandashca shina cancunapac taitacunapac huasi ucupura mashna cashca shinallatac, chullayanacushpa Diosta servichic.

⁵ Israelcunapac huahua huahuacunapac, huauquicunapac huasi ucupurata mashnapi chicanyachishca shinallatac levitacunapac huasi ucupuratapish chicanyachishca shinallatac Diospac huasipi saquirichic.

⁶ Pascua punzhapi huañuchina ovejata huañuchinguichic. Diospaclla tucushpa Mandac Dios Moisesta huillachishca shina cancunapac huauquicunapish micuchun allichinguichic» nirca.

⁷ Chaipi cac israelcunamanca Josiasllatacmi maltón ovejacunata, chivocunataca quimsa chunga huarangata, shinallatac huagracunataca quimsa chunga huarangata curca. Tucui chaicunataca chaipi tandanacushca gentecuna Pascua punzhapi huañuchishpa micuchunmi, jatun mandacca paipac haciendamanta curca.

⁸ Shinallatac jatun mandac churashca mandaccunapish paicunapac munaihuanmi israelcunaman, curacunaman, levitacunaman curcacuna. Mandac Diospac huasipi servic Hilcías, Zacarías, shinallatac Jehiel curacunapish chai Pascua punzhapi micuchunca ishcai huaranga sucta patsac ovejata, quimsa patsac huagratami curcacuna.

⁹ Conaniaspish, paipac huauqui Semaiaspish, Natanaelpish curcami. Shinallatac levitacunata mandac Hasabías, Jeiel, Josabadpish, Pascua punzhapi huañuchishpa micuchunmi pichca huaranga ovejata, pichca patsac huagrata levitacunaman curca.

¹⁰ Chashna tucuita allichishca quipami curacunaca paicuna ruhuana cashcallatatac ruhuangapac allichirircacuna. Levitacunapish jatun mandac mandashca shinallatacmi Diosta servingapac quipa ñaupa yaicurcacuna.

¹¹ Shina yaicushpami Pascua punzhapi huañuchina animalcunata huañuchircacuna. Curacunaca animalpac yahuarta levitacuna cucpimi, altarpi chiraparcacuna.

¹² Chai quipaca Moisés quillcashcapi nicushca shinallatacmi israelcunapac cada familiaman rupachina animalcunamanta aichata japishpa, asha ashata cararcacuna. Huagracunata huañuchishpapish chashnallatacmi ruhuarcacuna.

¹³ Chai quipaca mandashcapi nicushca shinallatacmi Pascua punzhapi huañuchishca animalcunapac aichata cusarcacuna. Shinallatac Diospaclla tucungapac cushcacunatapish mangacunapi, jatun pailacunapi, sartencunapi yanushpami tucui gentecunaman cararcacuna.

¹⁴ Chai quipami levitacunaca paicuna micungapacpish Aaronpac huahua huahuapuramanta curacunaman carangapacpish micunata ruhuarcacuna. Aaronpac huahua huahua curacunaca tutayangacamanmi animalcunatapish, huiratapish Diosman cushpa tucui rupachircacuna. Chai shina cashcamantami levitacunaca paicunapacpish Aaronpac huahua huahua curacunapacpish micunata allichircacuna.

¹⁵ Shinallatac Asafpac huahua huahuapuramanta cantaccunapish Davidhuan, Asafhuan, Hemanhuan, Dios ricuchishcata jatun mandacman huillac Jedutunhuan yuyarinacushpa mandashca shinallatacmi paicunapac ima ruhuanapi carcacuna. Pungupi cuidaccunapish tucui pungucunapimi carcacuna. Paicunaca paicunapac huauqui levitacuna paicunaman micunata ruhuacucpimi, paicuna Diospacta ruhuacushcamantaca maimanpish mana anchurircacuna.

¹⁶ Shinami chai punzhapica Mandac Diosta servingapac tucui allichircacuna. Pascua punzhapi cushicushpa micuita ruhuangapacpish, chai punzhapi micungapac huañuchishca animalcunata Mandac Diospac altarpi tucui rupachingapacpish, jatun mandac Josías mandashca shinami allichircacuna.

¹⁷ Chai punzhacunapimi chaipi tandanacushca israelcunaca Pascua punzhapi cushicushpa micuna shinallatac, levadura illac tandata micuna jatun fiestataca canchis punzhacaman ruhuarcacuna.

¹⁸ Israel llactapica cai shina Pascua punzhapi micuitaca Dios ima nishcata huillac Samuel huañushcamanta pachami mana ruhuarishca carca. Israel llactata maijan jatun mandacpish chai Pascua punzhataca jatun mandac Josías ruhuashca shinaca pipish mana ruhuarcachu. Paica curacunata, levitacunata, tucui Judá llactapi, Israel llactapi, Jerusalenpi causaccunata tandachishpami chashna ruhuarca.

¹⁹ Cai Pascua micuitaca chunga pusac huatata Josías ña mandacushpami cashna ruhuarca.

Josías huañushcamanta

²⁰ Tucui chaicunata ruhuashca shinallatac, Mandac Diospac huasitapish Josías ña allichishca quipaca, Egipto llactata jatun mandac Necaomi Eufrates jatun yacu ladopi tiyac Carquemis pueblopi causaccunahuan macanacungapac rirca. Shina ricpimi, Josiasca paihuan macanacungapac llucshirca.

²¹ Necao huillaccunata cachashpaca: «Judá llactata mandaclla, ñucaca imata canhuanca mana charinichu. Canhuan macanacungapacca mana shamushcanichu, ashtahuanpish ñucata piñaccunahuanmi macanacungapac shamuni. Mandac Diosllatacmi ñucataca utca ri nirca. Shina cashcamanta Dios mandashcata ama jarcaichu. Paica ñucahuanmi, pacta canta llaquichinman» nichun cacharca.

²² Necaoca Mandac Dios nishcatami huillarca. Ashtahuanpish Josiasca chai nishcata mana cazushpami shuc churanata churarishpa, paihuan macanacungapac rirca. Josiasca Meguido pambapimi macanacungapac rirca.

²³ Flechata shitaccunami Josiastaca flechahuan shitarcacuna. Chaipimi jatun mandacca paita serviccunataca: «¡Yallita chugrichishcami cani, caimanta anchuchichic!» nirca.

²⁴ Shina nicpimi, paita serviccunaca chai carretamanta llucchishpa, caishuc carretapi churashpa Jerusalenman aparicpimi, paica chaipi huañurca. Paitaca, paipac ñaupa taitacunata enterrashca jutcu ladollapitacmi enterrarca. Josías huañushcamantaca Judá llactapi causaccunapish, Jerusalenpi causaccunapish yallitami huacarcacuna.

²⁵ Jeremiasca Josías huañushcata yuyarishpami llaquilla cantota allichirca. Cantanata yachac tucui caricunapish, huarmicunapish cunan punzhacamanmi Josías huañushcata yuyarishpa huacana shimicunata cantancuna. Israelcunaca maijan huañucpipish, chai shimicunallatacmi cunan punzhacaman yuyarishpa cantancuna. Chai shimicunaca huacana shimicunata quillcashcapimi quillcashca tiyacun.

²⁶ Josías ashtahuan imata ruhuashcapish, Mandac Dios mandashcapi nishca shina shuccunata llaquishcapish,

²⁷ punta punzhapi, quipa punzhapi pai imacunallata ruhuashcapish, Israel llactata, Judá llactata jatun mandaccuna ima ruhuashcacunata quillcashcapimi tiyacun.