2 CRÓNICAS 31 - Dios Rimashcata Quillcashcami

¹ Tucui chaicunata ruhuashca quipami chaipi tandanacushca tucui israelcunaca Judá llacta pueblocunaman rishpa, ruhuashcalla dioscunatapish, Asera huarmi diosta yuyarina yuratapish tucui paquishpa tucuchirca. Tucui Judá llacta, Benjamín llacta lomacunapi tiyac altarcunatapish urmachircacunami. Efraín llactatapish, Manasés llactatapish tucui tucuchingacamanmi urmachircacuna. Chai quipami israelcunaca paicunapac pueblocunaman, paicuna causacuc allpacunaman cutircacuna.

Curacunatapish, levitacunatapish Diosta servinapi cutinllatac churashcamanta

² Chai quipami Ezequiasca curacunata, levitacunata paicuna imata ruhuanata yachac cashca shinallatac chullayanacushpa Diosta servichun chican chicanta churarca. Paicunataca animalcunata Diosman cushpa rupachichun, Dios-huan alli tucungapac cushcacunata cuchun, Diospacta ruhuachun, Mandac Diosta pagui nishpa paipac huasi pungucunapi alli nichunmi mandarca.

³ Tutamantapish, chishipish Diosman cushpa rupachichunca, jatun mandacllatacmi paipac quiquin haciendamanta animalcunata curca. Shinallatac samana punzhapi, llullu quillapi, fiesta punzhapi, Mandac Dios mandashpa quillcashcapi nishca shinallatac Diosman cushpa rupachichunmi curca.

⁴ Shinallatac Mandac Dios mandashcata curacunapish, levitacunapish ruhuashpa catichunca, Jerusalenpi causaccunatami curacunaman, levitacunaman cuna cashcata cuchun mandarca.

⁵ Pai mandashcata huillacpica, tucui israelcunami allpacunapi pucushca punta granota, vinota, aceiteta, bunga mishquita, pambacunapi pucushca shuctac granocunatapish achcata curcacuna. Shinallatac tucui ima tiyashcacunamantami chungamanta shucta chicanyachishpa achcata apamurcacuna.

⁶ Israel llactapi causaccunapish, Judá llacta pueblocunapi causaccunapish chashnallatacmi huagracunamanta, ovejacunamanta chungamanta shucta curcacuna. Shinallatac Diosman cungapac chicanyachishcacunamantapish chungamanta shuctami apamurcacuna. Chaicunata apamushpaca montonashpami churarcacuna.

⁷ Huata quimsa quillapi granocunata montonai callarishpaca canchis quillapimi tucuchirca.

⁸ Ezequiaspish, mandaccunapish chai grano montoncunata ricungapac rishpaca, Mandac Diosta allimari cangui nishpami, Dios acllashca israelcunatapish bendiciarcacuna.

⁹ Chai quipami Ezequiasca curacunatapish, levitacunatapish chai montón granomanta tapurca.

¹⁰ Chashna tapucpi, Sadoc curapac huasi ucupuracunata mandac Azarías curaca: «Mandac Diosman ofrendata cushpa, paipac huasiman apamui punzhamanta pachami ñucanchicca yallita micushcanchic. Chaipac jahuapica achca puchushcaracmi. Mandac Diosmi pai acllashcacunamanca bendiciashca. Chaimantami paicuna imata carashcacunaca achca puchushca» nirca.

¹¹ Shina cacpimi, Ezequiasca Mandac Diospac huasipi shuctac ucucunata ruhuachun mandarca. Shina mandacpimi, ucucunaca ruhuarcacuna.

¹² Chai ucupimi mana cungarishpa punta pucushcamanta cushca granotapish, chungamanta shucta cushcacunatapish, Diosman chicanyachishpa cushcacunatapish alli huacaichirca. Chaipi tucuita ricuchunca, Conanías levitatami churarca. Paipac quipa ricuchunca, paipac huauqui Simei levitatami churarca.

¹³ Shinallatac Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaías runacunaca Conanías shinallatac paipac huauqui Simeipish mandacucpimi, imatapish ricuccuna carca. Jatun mandac Ezequiaspish, Mandac Diospac huasipi mandac Azariaspish mandashca shinallatacmi servircacuna.

¹⁴ Inti llucshina lado pungupica Imna levitapac churi Coremi cuidacurca. Paica gentecuna tucui munaihuan Mandac Diosman cushca ofrendacunatapish, Mandac Diosman cushcata raquinacunatapish, Diospaclla chicanyachishcacunatapish cuidacmi carca.

¹⁵ Paitaca Edén, Miniamín, Jesúa, Semaías, Amarías, Secanías levitacunami servicurca. Paicunami curacuna causacuc pueblocunapica paicunaman raquina cashca shinallatac allita ruhuashpa ayudaccuna carca. Paicunapac huauqui curacuna ima shina japishca shinallatacmi yuyaccunamanpish, quipa huiñaicunamanpish curcacuna.

¹⁶ Mandac Diospac huasipi imata ruhuachun mandashcata ruhuangapac shamuccunamanpish curcami. Paicunaca huahua huahuacunata catishpa, quimsa huatamanta huichaiman shuticunata quillcashca caricunami carca.

¹⁷ Curacunataca maijan familiamanta cashcatami quillcashca carca. Shinallatac levitacunataca imata ruhuangapac chicanyachishcacunataca ishcai chunga huatamanta huichaiman quillcashcami carca.

¹⁸ Tucuita pactachingapac Diospaclla tucushcamantami paicunaca churicunandi, ushicunandi, huarmicunandi shuticunata quillcachishca carcacuna.

¹⁹ Pueblo muyundipi, michina pambacunapi causac Aaronpac huahua huahua curacunamanpish, levitacunamanpish raquingapacca tucui chai pueblocunapimi raquiccuna tiyarca. Chai curacunapish, levitacunapish huahua huahuacunata catishpa quillcashcami carcacuna.

²⁰ Ezequiasca tucui Judá llactapimi chashna ruhuarca. Paica, paita Mandac Diospac ñaupapica tucui shunguhuanmi mana pandarishpa allita ruhuashpa causarca.

²¹ Diospac huasipi imapi servinata callaringapac yuyarishcataca mandashca shimipi nicushca shinallatacmi ruhuarca. Paipac Mandac Diosta manchashpa, tucui shunguhuan imatapish ruhuashcamantami tucuipi alli llucshirca.