2 CRÓNICAS 29 - Dios Rimashcata Quillcashcami

Ezequías Diospac huasita cutin shayachishcamanta

¹ Ezequiasca ishcai chunga pichca huatata charishpami mandai callarirca. Paica ishcai chunga iscun huatatami Jerusalenpi mandarca. Paipac mamaca Zacariaspac ushi Abiasmi carca.

² Ezequiasca Mandac Diospac ñaupapica ñaupa taita David shinallatacmi allita ruhuashpa causarca.

Diospac huasipi Ezequías Diosta alli ninata allichishcamanta

³ Ezequiasca pai mandai callarishca huata callari quillapimi Mandac Diospac huasi pungu huichcashcata pascarca shinallatac allichirca.

⁴ Chai quipaca curacunatapish, levitacunatapish cayashpami, inti llucshina lado plazapi tandachirca.

⁵ Chaipimi paica: «Levitacuna uyaichic: Cancuna Diospaclla tucuichic. Cancunapac ñaupa taitacunata Mandac Diospac huasitapish paipaclla cachun allichichic. Diospac huasi ucumanta mapacunata llucchichic.

⁶ Ñucanchic ñaupa taitacunaca mana cazushpami, ñucanchicta Mandac Diospac ñaupapi mana allita ruhuashca. Mandac Diosta saquishpami, paipac jatun carpa huasimanta shuctac ladota ricushpa huashaiman cutirishcacuna.

⁷ Diospac huasi corredor pungucunata huichcashpami, lamparacunatapish huañuchirca. Inciensotapish mana rupachircachu. Diospac huasipi israelcunata Mandac Diosman animalcunata cushpa rupachinatapish saquishcacunami.

⁸ Chaimantami Mandac Dios yallita piñarishpa, Judá llactapi, Jerusalenpi causaccunaman llaquita cacharca. Chai llaqui shamucpimi, jatun mancharina tucushpa, burlashpa pingaichishca carcacuna. Chaitaca cancunapac ñahuihuantacmi ricucunguichic.

⁹ Riquichic, ñucanchic taitacunataca espadahuanmi huañuchirca. Shinallatac ñucanchic churicunatapish, ushicunatapish, ñucanchic huarmicunatapish prezumi aparcacuna.

¹⁰ Cunanca, Mandac Dios israelcunahuan yallita piñarishcamanta alli tucuchunmi paihuan ari ninacungapac yuyarircani.

¹¹ Ñuca huahuacunalla, ama mana entendiccuna, imatapish cungariccuna canguichicchu. Mandac Diosca cancunataca paipac ñaupapi paillata servishpa, paipacllata ruhuachun, shinallatac inciensota rupachichunmi acllarca» nirca.

¹² Shina nicpimi, Cohatpac huahua huahuapuramanta Amasaipac churi Mahat, Azariaspac churi Joel. Meraripac huahua huahuapuramantaca Abdipac churi Cis, Jehalelelpac churi Azarías. Gersonpac huahuapuramantaca Zimapac churi Joa, Joapac churi Edén.

¹³ Elizafanpac huahuapuramantaca Simri, shinallatac Jeiel. Asafpac huahua huahuapuramantaca Zacarías, shinallatac Matanías.

¹⁴ Hemanpac huahuapuramantaca Jehiel, shinallatac Simei. Jedutunpac huahuapuramantaca Semaías, shinallatac Uziel levitacunami pai nishcata ruhuangapac allichirirca.

¹⁵ Paicunami, paicunapac huauqui levitacunata tandachishpa, Diospaclla tucurcacuna. Chai quipaca jatun mandac mandashca shinallatac, Mandac Diospac shimi nishca shinallatacmi Mandac Diospac huasita pichangapac yaicurca.

¹⁶ Shina yaicushpami, Mandac Diospac huasi ucupi tiyac mapataca Mandac Diospac huasi pungu pambaman llucchirca. Shina llucchicpimi, levitacunaca Cedrón yacu huaicupi chai mapataca shitarca.

¹⁷ Chai huata callari quilla, punta punzhami, Diospaclla tucungapac allichirirca. Ña allichirishpami, chai quilla pusac punzhapi, Mandac Diospac huasi punguman shamushpa, Mandac Diospac huasitaca pusac punzhacunapi tucui mapacunata anchuchishpa Diospacllata ruhuarcacuna. Tucui caitaca chai quilla chunga sucta punzhapimi tucui tucuchirca.

¹⁸ Chaimantami jatun mandac Ezequiaspacman shamushpaca: «Mandac Diospac huasi ucumantaca ñami mapata tucui anchuchircanchic. Animalta cushpa rupachina altartapish, chai altarpi imallata ruhuangapac ima tiyaccunatapish, Diospac tandata churana mizatapish, chai mizapi imallata ruhuangapac ima tiyashcacunatapish chashnallatacmi ruhuarcanchic.

¹⁹ Shinallatac jatun mandac Acaz mana cazushpa, chai ucumanta llucchishpa shitashca imalla tiyashcacunatapish, Diospaclla cachunmi allichircanchic. Riqui, tucui chaicunaca Mandac Diospac altar ñaupapimi can» nircacuna.

²⁰ Jatun mandac Ezequiasca utca jatarishpami, pueblopi causac gentecunata mandaccunata tandachishpa, Mandac Diospac huasiman huichai rirca.

²¹ Chaipica mandacpac juchacunamantapish, Diospac huasimantapish, Judá llactamantapish cungapacmi canchis becita, canchis carnero ovejata, canchis malta ovejata, canchis cari chivota Diosman apamurcacuna. Jatun mandacca Aaronpac huahua huahuacunatami, Mandac Diosman cushpa, chai animalcunata altarpi rupachichun mandarca.

²² Becicunata huañuchicpica, curacunami yahuarta japishpa, altarpi chiraparca. Chai quipaca carnero ovejacunata huañuchishpapish, malta ovejacunata huañuchishpapish yahuartaca altarllapitacmi chiraparca.

²³ Chai quipami juchamanta cushca cari chivocunataca jatun mandacpac ñaupapi tiyac tucui gentecunapac ñaupapi churarcacuna. Shina churacpimi, chai chivocunapac uma jahuapi maquita churarca.

²⁴ Chai quipami curacunaca chivocunata huañuchirca. Shina huañuchishpami, chai chivocunapac yahuartaca tucui israelcuna Dios-huan alli tucuchun cushpa altarpi chiraparca. Jatun mandacca tucui israelcunatami Mandac Dios-huan alli tucuchun, paicunapac juchamanta chai animalcunata huañuchishpa tucui rupachichun mandashca carca.

²⁵ Jatun mandac David, Dios ricuchishcata huillac Gad, Natán mandashca shinami, levitacunataca Mandac Diospac huasipi salteriocunapi, arpacunapi, cimbalocunapi tocachun churarca. Chaitaca Mandac Diosmi pai ima nishcata huillaccunata huillachishca carca.

²⁶ Shinami levitacunaca David ruhuachishca tocanacunahuan, curacunaca trompetacunahuan shayacurca.

²⁷ Shina shayacucpimi, Ezequiasca animalcunata huañuchishpa, Diosman cushpa, altarpi rupachina animalcunata huañuchichun mandarca. Animalcunata tucui rupachic callaricpimi, cantaccunapish Diosta cantai callarirca. Paicunaca trompetapi, Israel llactata jatun mandac David ruhuachishca tocanacunapi tocashpami cantarcacuna.

²⁸ Tucui tandanacushca gentecunaca Diosman animalta cushpa tucui rupachingacamanmi Diosta allimari cangui nircacuna. Cantaccunaca cantarcami, tocaccunaca trompetapi tocarcami.

²⁹ Ña rupachishpa, tucui tucuchishca quipaca jatun mandacpish, paihuan cac tandanacushca gentecunapish cumurishpami, Diostaca allimari cangui nircacuna.

³⁰ Chaimantami jatun mandac Ezequiaspish, shuctac mandaccunapish levitacunataca David quillcashca shimicunahuanpish, Dios ima nishcata huillac Asaf quillcashca shimicunahuanpish Mandac Diostaca allimari cangui nichun mandarca. Shina nicpimi, paicunaca yallita cushicushpa cungurishpa Diosta alli nircacuna.

³¹ Chai quipami Ezequiasca: «Cunanca, cancunaca ñami Diospaclla canguichic. Chaimanta animalcunata Diosman cushpa huañuchingapac, Mandac Diospac huasipi paita pagui ningapac cuchuyaichiclla» nirca. Shina nicpimi, achca gentecuna Mandac Diosta pagui nishpa animalcunata cushpa huañuchingapac apamurca. Alli shunguta chariccunaca paicunapac munaimantami animalcunata tucui rupachingapac apamurcacuna.

³² Tandanacushca gentecuna Diosman cushpa rupachingapacca canchis chunga huagrata, patsac carnero ovejata, ishcai patsac malta ovejatami apamurca. Tucui cai animalcunatami Diosman cushpa tucui rupachircacuna.

³³ Ofrendacunaca sucta patsac huagra, quimsa huaranga ovejami carca.

³⁴ Ashtahuanpish curacunaca ashalla cashpami, tucui rupachina animalcunataca mana llushti pudircacuna. Chaimantami animalcunata llushtishpa, tucui tucuchingacaman shinallatac caishuc curacuna Diosta servingapac allichiringacamanca paicunapac huauqui levitacuna ayudarca. Levitacunami curacunata atishpa utca chuyayarca.

³⁵ Shinami rupachina animalcunaca achca tiyarca. Dios-huan alli tucungapac cushca animalcunapac huirapish, tucui rupachina animalhuan cushca vinopish achcami tiyarca. Shinami Mandac Diospac huasipica cutinllatac Diosta servinata callarirca.

³⁶ Mandac Dios tucui chaicuna pai acllashcacunaman utca ruhuashcamantami Ezequiaspish, tucui gentecunapish yallita cushicurca.