2 CRÓNICAS 27 - Dios Rimashcata Quillcashcami

Jotam Judá llactata mandashcamanta

¹ Jotamca ishcai chunga pichca huatata charishpami mandai callarirca. Paica chunga sucta huatatami Jerusalenpi mandarca. Paipac mamaca Sadocpac ushi Jerusami carca.

² Jotamca Mandac Diospac ñaupapica paipac taita Uzías shinami allita ruhuashpa causarca. Shina cashpapish Diospac huasimanca mana yaicurcachu. Ashtahuanpish gentecunaca mana allita ruhuashpami catirca.

³ Mandac Diospac huasipi cac ñaupa jatun pungutaca paimi ruhuachirca. Shinallatac Ofel shuti pirca jahuapipish ashtahuanmi pircacunata ruhuarca.

⁴ Judá llacta urcucunapica pueblocunatami ruhuarca. Sacha ucucunapica macanacuna ucucunata, jatun torrecunatami ruhuachirca.

⁵ Amonitacunata jatun mandac-huan macanacushpapish paimi misharca. Chaimantami amonitacunaca chai huatapica patsac talento cullquita, chunga huaranga coro trigota, chunga huaranga coro cebadata curca. Amonitacunaca cati huatapipish, quimsaniqui huatapipish chashnallatacmi curca.

⁶ Jotamca paita Mandac Diosta cazushpa causai callarishpami ashtahuan sinchi tucurca.

⁷ Jotam ashtahuan imata ruhuashcacunapish, pai ima shina cashcapish, macanacuicunata ruhuashcapish, Israel llactata, Judá llacta jatun mandaccuna ima ruhuashcacunata quillcashcapimi tiyacun.

⁸ Jotamca ishcai chunga pichca huatata charishpami, mandai callarirca. Paica chunga sucta huatatami Jerusalenpi mandarca.

⁹ Pai huañushpa, paipac ñaupa taitacunahuan tandanacugricpica, Davidpac pueblopimi enterrarca. Paipac randica, paipac churi Acazmi mandai callarirca.