2 CRÓNICAS 26 - Dios Rimashcata Quillcashcami

Uzías Judá llactata mandashcamanta

¹ Shina cashcamantami Judá llactapi causac tucui gentecunaca Uziasta paipac taita Amasiaspac randi jatun mandac cachun churarcacuna. Uziasca chunga sucta huatatami charirca.

² Jatun mandac Amasías huañushpa, paipac ñaupa taitacunahuan tandanacugrishca quipami Uziasca Elot pueblotaca Judá llactallapactac cachun allichishpa shayachirca.

³ Uziasca chunga sucta huatata charishpami mandai callarirca. Pichca chunga ishcai huatatami Jerusalenpi mandarca. Paipac mamaca Jerusalenmanta Jecoliasmi carca.

⁴ Uziasca Mandac Diospac ñaupapica paipac taita Amasías allicunata ruhuashpa causashca shinallatacmi causarca.

⁵ Zacarías causacui punzhacunapica Zacarías Diosta manchanata allita yachachishcamantami Uziasca Mandac Diosta servishpa causarca. Usaías Mandac Diosta servishpa causai punzhacunapica tucuimi alli llucshirca.

⁶ Uziasca filisteocunahuan macanacungapac llucshishpaca, Gat, Jabnia, Asdod pueblo muyundi jatun pircacunatami urmachirca. Chai quipaca Asdod llacta muyundipipish, filisteocunapac llactapipish shuctac pueblocunatami shayachirca.

⁷ Filisteocunahuan, Gur-baal pueblopi causac arabecunahuan, amonitacunahuan macanacucpipish, Mandac Diosmi mishachirca.

⁸ Amonitacunaca impuestotami Uziasman curcacuna. Uzías yallita jatun cashcataca Egipto llacta linderocamanmi yacharcacuna.

⁹ Jerusalenpica esquinapi cac pungupipish, pugru pambaman llucshina ladopipish, caishuc lado esquinapipish sinchi torrecunatami shayachirca.

¹⁰ Chashnallatac torrecunataca shitashca pambapipish shayachircami. Achca animalcunata charishcamantami Sefela pambacunapipish, caishuc pambacunapipish achca jutcucunata allashpa yacuta llucchirca. Uziasca chagrata ruhuanata munac cashcamantami urcucunapipish, alli pucuc pambacunapipish uvas chagracunata, shuctac chagracunatapish achcata charirca.

¹¹ Macanacunata alli yachac soldadocunatapish achcatami charirca. Chai soldadocunaca jatun mandacpac quillcac Jeiel, Maasías mandacpish, mandashpa quillcashca shinallatacmi chican chican llucshiccuna carca. Chai soldadocunataca mandaccunapuramanta Hananiasmi mandacurca.

¹² Familiacunata mandaccunaca alli sinchi imatapish mana manchac, ishcai huaranga sucta patsacmi carca.

¹³ Chai mandaccunaca macanacunata alli yachac quimsa patsac canchis huaranga pichca patsac alli sinchi soldadocunatami mandac carca. Paicunami jatun mandacta ayudashpa, paicunata piñaccunahuan macanacuccuna carca.

¹⁴ Uziasca chai tucui soldadocunamanmi escudocunata, lanzacunata, cascocunata, fierro churanacunata, arcocunata, huaracacunata ruhuachirca.

¹⁵ Jerusalenpipish imallata ruhuanata alli yachaccunamanmi jatun macanacunata ruhuachirca. Chaicunataca torrecunapi, pueblo pungucunapimi flechacunata, jatun rumicunata shitangapac churarca. Mandac Dios Uziasta tucuipi alli pushacpimi, pai yalli jatun cashcataca caru llactapi causaccunapish yachac chayarca.

Uziaspac tucuri huatacunamanta

¹⁶ Uzías ña tucuita mandai callarishpaca, jatun tucushpami llaquipi urmarca. Paica Mandac Diosta mana cazushpami, inciensota rupachina altarpi inciensota rupachingapac Diospac huasi ucuman yaicurca.

¹⁷ Paita catishpaca Azarías curami yaicurca. Paihuanca Mandac Diosta servic pusac chunga sinchi curacunami yaicurca.

¹⁸ Paicunami jatun mandac Uziasta piñarishpaca: «¡Uzías, Mandac Diosman inciensota rupachinaca mana cambac ruhuanachu! Ashtahuanpish Aaronpac huahua huahua curacunallami chaita rupachingapac chicanyachishca cashcamanta chaita ruhuai pudincuna. Diospaclla ucumanta llucshi. ¿Ima nishpatac chashna mana allita ruhuashpa, Mandac Diosta llaquichingapac shamurcanguiyari? Chashna ruhuashcamantaca Mandac Diospacca mana allichu cangui» nircacuna.

¹⁹ Ashtahuanpish paica curacunahuanmi piñarirca. Uziasca inciensota rupachingapacmi, inciensota rupachinata apashpa altar ñaupapi shayacurca. Chaipi shayacucpimi, paipac frentepica lepra ungüi llucshirca.

²⁰ Paipac frentepi lepra ungüi llucshishcataca curacunata mandac Azarías curapish, caishuc curacunapish ricurcami. Chaimantami chai ucumantaca utca llucshircacuna. Mandac Dios llaquichicpimi, chai ucumantaca paillatac utca llucshirca.

²¹ Chashnami jatun mandac Uziasca pai huañungacaman chai lepra ungüihuan causarca. Paica lepra ungüihuan cashpami, shuc huasipi pailla causarca. Shinallatac Diospac huasimantapish ladoyashcami carca. Mandashpa tiyana huasipica paipac churi Jotammi Judá llacta gentecunataca mandacurca.

²² Punta punzhacuna, quipa punzhacunata Uzías imata ruhuashcacunataca Amozpac churi Isaiasmi quillcarca. Paica Dios ima nishcata huillacmi carca.

²³ Uzías huañushpa paipac ñaupa taitacunahuan tandanacugricpica: «Caica lepra ungüihuanmi carca» nishpami paipac taitacunata enterrashca ladopi enterrarca. Paipac randica, paipac churi Jotammi mandai callarirca.