2 CRÓNICAS 24 - Dios Rimashcata Quillcashcami

Joás Judá llactata mandashcamanta

¹ Joasca canchis huatata charishpami mandai callarirca. Paica chuscu chunga huatatami Jerusalenpi mandarca. Paipac mamaca Beerseba pueblomanta Sibiami carca.

² Joasca Joiada cura causacui tucui punzhacunami Mandac Diospac ñaupapica allita ruhuashpa causarca.

³ Joiadaca Joastaca ishcai huarmihuanmi cazarachirca. Chai huarmicunahuanmi Joasca churicunata, ushicunata charirca.

⁴ Chai quipami Joasca Mandac Diospac huasita cutin allichinata yuyarirca.

⁵ Chaita yuyarishpami curacunata, levitacunata tandachishpaca: «Cancunata Mandac Diospac huasita huatanta allichingapac, Judá llactapi cac pueblocunaman rishpa, tucui israelcunamanta cullquita tandachichic. Chaitaca utcami ruhuana canguichic» nirca. Shina mandacpipish levitacunaca mana utca ruhuarcachu.

⁶ Chaimantami jatun mandacca curacunata mandac Joiadata cayashpaca: «Judá llactapi, Jerusalenpi causaccuna cushca ofrendata levitacuna apamuchunca, ¿ima nishpatac mana utca mandarcangui? Caitaca Mandac Diosta servic Moisesmi Dios mandashcacunata huacaichina carpa huasita ruhuangapac tandanacushca israelcunahuan mandarca.

⁷ Diosta mana manchac Ataliami paipac huahuacunahuan Mandac Diospac huasita tucuchishpa, chaipi tiyac Diospaclla chicanyachishcacunatapish yanga dioscunaman cungapac apashca» nirca.

⁸ Shina nishpami jatun mandacca shuc cajonta ruhuashpa, Mandac Diospac huasi canzha ladopi churachun mandarca.

⁹ Chai quipaca shitashca pambapi Mandac Diosta servic Moisés israelcunata mandashca shinami Mandac Diosman ofrendata cuchun Judapi, Jerusalenpi huillachun mandarca.

¹⁰ Chaita mandacpica, mandaccunapish, gentecunapish tucuimi cushicurcacuna. Shina cushicushpami, ofrenda chai cajón jundangacaman curca.

¹¹ Levitacunaca chai cajonpi jundacpica, jatun mandacpac quillcacpacmanmi aparca. Shina apacpimi, curacunata mandac curapish, chaita ricuchun churashca quillcac runapish chai cajonmanta cullquita llucchic carca. Paicuna chai cajonmanta cullquita llucchishpaca chai maipi cashcallapitacmi cutin churarca. Punzhanta chashna ruhuashpami, achca cullquita tandarca.

¹² Chai cullquitaca jatun mandac-huan Joiada curahuanmi Mandac Diospac huasita allichiccunaman curca. Paicunami Mandac Diospac huasita allichichunca rumita labraccunatapish, carpinterocunatapish, fierrota, bronceta ima shuccunata ruhuanata yachaccunatapish apamurca.

¹³ Diospac huasita allichiccunaca utcami tucuchirca. Chai huasitaca punta ima shina cashca shinallatacmi mushucta ruhuashpa saquirca. Chashnami chai huasita alli sinchita ruhuashpa saquircacuna.

¹⁴ Tucui allichishca quipa, chai puchushca cullquitaca jatun mandacpacman, Joiada curapacmanmi apamurca. Chai cullquihuanca Mandac Diospac huasipi imalla charinacunata, chaipi Diosta servingapac imalla charinacunata, animalcunata Diosman cushpa tucui rupachingapac imalla charinacunatami ruhuachirca. Curimanta, cullquimantami cucharacunatapish, vasocunatapish ruhuachirca. Mandac Diospac huasipica Joiada cura causacuc tucui punzhacunapimi animalcunata Diosman cushpa, tucui rupachic carcacuna.

¹⁵ Shina cashpapish Joiada curaca achca huatayuc tucushpami yuyacyashpa huañurca. Paica patsac quimsa chunga huatata charishpami huañurca.

¹⁶ Pai huañucpica, Davidpac pueblopimi jatun mandaccunata enterrashca ladopi enterrarca. Paitaca israelcunamanpish, Mandac Diosmanpish, Diospac huasipipish allita ruhuashcamantami chaipi enterrarca.

¹⁷ Joiada cura huañushca quipaca, Judá llactata mandaccunaca jatun mandacpacman shamushpami, canca allimi cangui nircacuna. Paicuna shina nishcataca jatun mandacca uyarcami.

¹⁸ Paicunapac ñaupa taitacunaca Mandac Diospac huasita shitashpami, Asera huarmi diosman ricchacunata, imamanpish riccha dioscunata ruhuashpa alli nircacuna. Chashna juchata ruhuashcamantami Mandac Diosca Judá llactapi causaccunahuanpish, Jerusalenpi causaccunahuanpish yallita piñarirca.

¹⁹ Shina piñarishpapish Mandac Diosca paipacman tigrarichun nishpami pai ima nishcata huillaccunata huillachun cacharca. Chai huillaccuna huillashcataca mana uyarcacunachu.

²⁰ Shina cacpimi, Joyada curapac churi Zacariaspacman Mandac Diospac Espíritu shamurca. Chaipimi paica gentecuna ricunallapi shayarishpaca: «Mandac Diosca: “¿Ima nishpatac ñuca mandashcacunataca mana cazunguichic? Chashna mana cazushcamantaca ima allitapish mana japinguichicchu. Ñucata cancuna saquishcamantaca ñucapish cancunataca saquishami” ninmi» nirca.

²¹ Ashtahuanpish paitaca pacalla llaquichinatami yuyarinacurca. Paicunaca jatun mandac mandacpimi, Mandac Diospac huasi pungu pambapi Zacariastaca rumicunahuan shitashpa huañuchirca.

²² Jatun mandac Joasca Zacariaspac taita Joiada cura paiman allita ruhuashcata mana yuyarishpami, paipac churitaca huañuchirca. Zacarías ña huañugricushpaca: «Chashna ruhuashcamantaca Mandac Diosllatac ricushpa llaquichichun» nirca.

²³ Chai huata callaripimi, Siria llactamanta soldadocunaca jatun mandac Joas-huan macanacungapac shamurcacuna. Judá llactaman Jerusalenman shamushpami, chai pueblopi causacpuramanta tucui mandaccunata huañuchishpa, chaipi imalla tiyashcacunatapish quichushpa, Damasco pueblota jatun mandacpacman cacharcacuna.

²⁴ Paicunapac ñaupa taitacunapac Mandac Diosta saquishcamantami Paica Siria llactamanta shamuc ashalla soldadocunapac maquipi achca soldadocunata churarca. Shinami Joastaca yallita llaquichirca.

²⁵ Chai Siria llactamanta soldadocunaca Joastaca yallita macashpami, ña huañunallata saquirca. Paitaca Joiada curapac churita huañuchishpa, yahuarta jichashcamantami paita serviccunallatac pacalla jatarishpa, paipac camallapitac huañuchirca. Shina huañucpica, Davidpac pueblopimi enterrarca. Ashtahuanpish jatun mandaccunata enterrashca jutcupica mana enterrarcachu.

²⁶ Pacalla jatarishpa paita huañuchiccunaca: Amonitapuramanta Simeatpac churi Zabad, moabitapuramanta Simritpac churi Jozabadmi carca.

²⁷ Joaspac churicunamantapish, impuestota japicushcamantapish, Mandac Diospac huasita cutin shayachishcamantapish jatun mandaccuna imata ruhuashcacunata quillcashcapimi tiyacun. Joaspac randica, paipac churi Amasiasmi mandai callarirca.