1 CRÓNICAS 9 - Dios Rimashcata Quillcashcami

Babilonia llactamanta cutimushcamanta

¹ Tucui israelcunataca ñaupa taitacunapac huahua huahuacunata catishpami yuparca. Chai shuticunaca Israel llactata jatun mandaccunapac libropimi quillcashca tiyacun. Judá llactapi causaccunataca Diosta mana cazushcamantami Babilonia llactaman prezu aparca.

² Paicunapac allpacunapi, pueblocunapi causangapac punta cutimuc israelcunaca curacuna, levitacuna, Diospac huasipi servishpa causaccunami carca.

³ Jerusalenpica Judapac Benjaminpac, Efrainpac, Manasespac maijan huahua huahuacunami causai callarirca.

⁴ Judapac huahua huahuapuramantaca Utaimi cutimurca. Paica Amihudpac churi, Amihudca Omripac churi, Omrica Imripac churi, Imrica Banipac churimi carca. Banica Farespac huahua huahuapuramantami carca. Faresca Judapac churimi carca.

⁵ Silo pueblopi causaccunapuramantaca punta churi Asaiasmi paipac churicunandi cutimurca.

⁶ Zerapac huahua huahuapuramantaca Jeuelmi paipac aillucunandi cutimurca. Paicunaca sucta patsac iscun chunga runacunami cutimurca.

⁷ Benjaminpac huahua huahuapuramantaca Salú, Saluca Mesulampac churi, Mesulamca Hodaviaspac churi, Hodaviasca Asenuapac churimi cutimurca.

⁸ Jerohampac churi Ibneías, Uzipac churi Elami cutimurca. Uzica Micripac churimi carca. Sefatiaspac churi Mesulampish cutimurcami. Sefatiasca Reuelpac churimi carca. Reuelca Ibniaspac churimi carca.

⁹ Paicunapac huauquicunapac huahua huahuacunata catishpa yupashpaca iscun patsac pichca chunga sucta runacunami carca. Paicunaca ñaupa taitacunapac huasi ucupura familiacunata mandaccunami carca.

¹⁰ Curacunapuramantaca Jedaías, Joiarib, Jaquín,

¹¹ Hilciaspac churi Azariasmi cutimurca. Hilquiasca Mesulampac churi, Mesulamca Sadocpac churi, Sadocca Meraiotpac churi, Meraiotca Ahitobpac churimi carca. Paimi Diospac huasipi curacunata mandac carca.

¹² Shinallatac Jerohampac churi Adaías, Jerohamca Pasurpac churi, Pasurca Malquiaspac churi, shinallatac Adielpac churi Masai curapish shamurcami. Adielca Jazerapac churi, Jazeraca Mesulampac churi, Mesulamca Mesilemitpac churi, Mesilemitca Imerpac churimi carca.

¹³ Paicunapac huasi ucupuracunata mandac curacunaca shuc huaranga canchis patsac sucta chunga curacunami shamurca. Paicunaca Diospac huasipi allita servic curacunami carca.

¹⁴ Levitapuramantaca Hasubpac churi Semaiasmi shamurca. Hasubca Azricampac churimi carca. Merari familiapuramanta Azricamca Hasabiaspac churimi carca.

¹⁵ Bacbacar, Heres, Galal, Micaiapac churi Mataniaspishmi shamurca. Mataniasca Zicripac churi, Zicrica Asafpac churimi carca.

¹⁶ Semaiaspac churi Abdiaspish shamurcami. Semaiasca Galalpac churi, Galalca Jedutunpac churimi carca. Asapac churi Beriquiaspish shamurcami. Asaca Alcanapac churimi carca. Paica netofatitacunapac muyundi uchilla llactacunapimi causarca.

¹⁷ Diospac huasita cuidaccunaca Salum, Acub, Talmón, Ahimanmi paicunapac huahua huahuacunandi shamurca. Paicunataca Salummi mandacurca.

¹⁸ Diospac huasiman jatun mandac yaicuna pungupi levitapuramanta cuidaccunaca cunan punzhacamanmi cuidacun. Chai punguca inti llucshina ladomanmi.

¹⁹ Corepac churi Salumpish, paipac taita Corepac caishuc churicunapish ñaupa taitacunapac huasi ucupurata mandaccuna shinami Mandac Dios-huan tupana huasi pungupi cuidashpa servircacuna. Coreca Ebiasafpac churimi carca. Ebiasafca Corepac churimi carca.

²⁰ Utcapica Eleazarpac churi Fineasmi paicunataca mandacurca. Mandac Diosca paihuanmi carca.

²¹ Meselemiaspac churi Zacariasca Dios-huan tupana huasi pungupimi cuidacurca.

²² Pungupi cuidachun tucui acllashcacunaca ishcai patsac chunga ishcai runacunami carca. Paicunapac llactacunapimi paicunapac huahua huahuacunata catishpa yuparca. Paicunataca Davidhuan, Dios imata ricuchishcata huillac Samuelhuanmi cuidachun churarca.

²³ Chashnami paicunapish, churicunapish Mandac Dios-huan tupana huasiman yaicuna pungupica chullayanacushpa cuidarcacuna.

²⁴ Chai cuidaccunaca jahua ladomanpish, ura ladomanpish, cai ladomanpish, chai ladomanpish chuscu ladomanmi cuidarca.

²⁵ Muyundi uchilla llactacunapi causac paicunapac huauquicunaca cada canchis punzhami paicunaman cuidana tucucpica, cuidangapac shamuccuna carca.

²⁶ Pungupi cuidaccunata mandac chuscu levitacunaca Diospac huasi ucutapish, chaipi tiyac valishcacunatapishmi cuidacurca.

²⁷ Paicunaca Diospac huasita tucui tutamanta punguta pascaccuna cashcamantami Diospac huasi muyundipi causarcacuna.

²⁸ Paicunapuramanta maijancunaca Diospacta ruhuana imallacunatami cuidarcacuna. Chaimantami llucchingapacpish, huacaichingapacpish yupac carcacuna.

²⁹ Maijancunaca Diospaclla huasipi shuctac ima tiyashcacunata, vasocunata, harinata, vinota, aceiteta, inciensota, mishquilla ashnacuccunatapishmi cuidacurca.

³⁰ Maijancunaca mishquilla ashnacuc jambicunatami ruhuacurca.

³¹ Coreitacunapuramanta Salumpac punta churi Matatías levitaca sartenpi cusacta mandacmi carca.

³² Cohatpac huahua huahuapuramanta maijancunaca paicunapac huauquicunahuanmi samana punzhapi Diosman cuna tandata sumacta churac carcacuna.

³³ Cutin levita huasi ucupuracunata mandac cantaccunaca Diospac huasi ucucunapimi causacurca. Paicunaca tutapish, punzhapish Diosta cantac cashcamantami ashtahuan imata mana ruhuac carcacuna.

³⁴ Paicunaca levitacunapac huahua huahua familiacuna ima shina cashca shinallatac mandaccunami carca. Chai mandaccunaca Jerusalenpimi causacurca.

Saulpac ñaupa taitacunapac shuticunamanta

³⁵ Gabaón pueblopica chai pueblopi causaccunapac ñaupa taita Jehielmi causarca. Paipac huarmica Maacami carca.

³⁶ Paipac punta churica Abdonmi carca. Quipa churicunaca Zur, Cis, Baal, Ner, Nadab,

³⁷ Gedor, Ahío, Zacarías, Miclotmi carca.

³⁸ Meclotca Simeam churitami charirca. Paicunapish Jerusalenllapitac paicunapac huauquicunapac chimba ladopimi causarca.

³⁹ Nerca Cis churitami charirca. Cisca Saúl churitami charirca. Saulca Jonatán, Malquisúa, Abinadab, Es-baal churicunatami charirca.

⁴⁰ Jonatanpac churica Merib-baalmi carca. Merib-baalca Micaías churitami charirca.

⁴¹ Micaiapac churicunaca Pitón, Melec, Tarea, Acazmi carca.

⁴² Acazpac churica Jarami carca. Jarapac churicunaca Alemet, Azmavet, Zimrimi carca. Zimripac churica Mosami carca.

⁴³ Mosapac churica Binami carca. Binapac churica Refaiasmi carca. Refaiaspac churica Elasami carca. Elasapac churica Azelmi carca.

⁴⁴ Azelca sucta churitami charirca. Paicunaca Azricam, Bocru, Ismael, Searías, Obadías, Hananmi carca. Caicunami Azelpac churicuna carca.