1 CRÓNICAS 17 - Dios Rimashcata Quillcashcami

Mandac Dios Davidman ari nishcamanta

¹ David paipac huasipi causacushpami, Dios ima nishcata huillac Natantaca: —Riqui, ñucaca cedromanta ruhuashca sumac huasipimi causani. Ashtahuanpish Dios ari nishca quillcata huacaichina Arcaca carpa huasillapimi tiyacun— nirca.

² Shina nicpimi, Natanca Davidtaca: —Mandac Diosca canhuanmi. Cambac shungu munashcata ruhuailla— nirca.

³ Shina cacpipish, Mandac Diosca chai tutallatac Natanta cayashpaca:

⁴ «Ñucata servic Davidtaca: “Ñuca causana huasitaca mana canchu ruhuangui.

⁵ Ñucaca israelcunata llucchimushca punzhamanta cunancamanca jaicapi mana ima huasipi causashcanichu. Ashtahuanpish carpa huasillapimi caipi chaipi, ñucapaclla chicanyachishca huasillapimi caipi chaipi causarcani.

⁶ Israelcunahuan ñuca maita purishpapish, israelcunata maijan pushaccunatata: ‘¿Imamantatac mana ñuca huasita cedromanta mana ruhuanguichic?’ nircani” nirca.

⁷ Chaimanta ñucata servic Davidtaca: “Ñucami cantaca ovejacunata michishpa puricucpi, ñuca acllashca israelcunata mandac cachun acllarcani.

⁸ Ñucaca can maita ricpipish, canhuanmi carcani. Canta piñaccuna llaquichisha nicpipish, tucuitami cambac ñaupamanta chingachircani. Shina ruhuashpami, cai pacha mandaccunata yalli ashtahuan jatun mandacta ruhuasha.

⁹ Shinallatac ñuca acllashca israelcunamanca shuc llactata acllashpami, chaipi tarpushca shina causachun churasha. Chaipimi paicunaca callari punzhapi llaquichishca shinaca pipish mana llaquichishca causanga.

¹⁰ Ñuca acllashca israelcunata pushachun churashca punzhamanta pachami paicunataca llaquichirca. Ñucami tucui canta piñaccunataca samachisha. Huillanimi Mandac Dios ñucami shuc huasita shayachisha.

¹¹ Can huañushpa, cambac ñaupa taitacunahuan tandanacugricpica, cambac huahua huahuatami shucta can mandacushcapi churashpa, can mandanataca sinchiyachisha.

¹² Paimi ñucamanta huasita shayachinga. Paimanca huiñaita mandanatami cusha.

¹³ Ñucaca paipac taitami casha. Paica ñuca churimi canga. Paimantaca punta mandacmanta anchuchishca shina ñuca cuyaitaca mana anchuchishachu.

¹⁴ Ñuca huasipipish, ñuca mandanapipish huiñaita mandachunmi churasha” ninmi nigri» nirca.

¹⁵ Natanca muscuipi shina uyashcataca tucuimi Davidman huillarca.

¹⁶ Chashna huillacpi, David Mandac Diospac ñaupaman yaicushpa tiyarishpaca: «Mandac Dioslla, ñucapish, ñuca huasi familiapish, ¿ima cacpitac cai tucuita ruhuanguiyari?

¹⁷ Jatun Mandac Dioslla, caita ruhuashca jahuapish, canta servic ñuca huasi familia quipaman ima shina canatapish huillashcanguimi. Mandac Dioslla, ñucataca shuc valic runata shinami ruhuashcangui.

¹⁸ Mandac Dioslla, ¿canta servic ñucaman allicunata ruhuashcamantaca imatatac ashtahuan nishayari? Canllatac ricsinguimi.

¹⁹ Mandac Dioslla, canta servic ñucata cuyashpami can munashca shina sumaimanata ruhuashpa ricuchishcangui.

²⁰ Ñucanchic ringrihuantac uyashca shinaca, pi shuctac Dios, can shinaca mana tiyanchu.

²¹ Cai pachapica, ¿picunatac can acllashca israelcuna shinaca tiyanyari? Can Dios rimashpami, paicunataca cambac acllashca cachun llucchimurcangui. Jatun mancharinacunata ruhuashpami, tucui gentecuna cambac shutita ricsichun chashna llucchimurcangui. Egiptomanta can llucchimushpaca, cambac acllashcacunapac ñaupamantami shuctac llactapi causaccunataca llucchishpa cacharcangui.

²² Can acllashca israelcunataca cambaclla huiñaita causachunmi churarcangui. Mandac Dioslla, chashna ruhuashpami paicunapac Dios tucurcangui.

²³ Cunanca, Mandac Dioslla, canta servic ñucamanpish, ñuca huasi familiamanpish can cusha nishca shina huiñaipac ruhuailla.

²⁴ Can imata ruhuasha nishcaca chashnatac pactashca cachun. Cambac shutitaca huiñaita jatunyachishpa: “Tucuita mandac Diosmi israelcunapac Diosca. ¡Paimi israelcunapac Diosca!” nichuncuna. Canta servic ñuca huasi familiaca pi mana cuyuchipac sinchi cachun.

²⁵ Mandac Dioslla, canllatacmi canta servic ñucamanca, cambac huahuacunatami mandac cachun churasha nircangui. Chaimantami canta servic ñucaca cambac ñaupapi canta mañai yuyaita japircani.

²⁶ Cunanca, Mandac Dioslla, canmi Dios cangui, canta servic ñucamanca allita ruhuana cashcatami huillashcangui.

²⁷ Cunanca, canta servic ñuca huasi familiacunata cambac ñaupapi huiñaita cuidashca cachunmi bendiciasha nircangui. Can Mandac Diosllatac bendiciashcamantami ñuca huasi familiaca huiñaita alli nishca canga» nirca.