Naiˍ htangˍ 21 - Pyen

Pawˉluˆ Yeˍruˆsaˍlaemˍ vengˍ veu lae jiˉ

¹ Yawng na ya hpakˍ peunˍ lang yao, gu heuˍ na ta yao, Kawˆsaˆ cunˉ veu keungˉ nae lae yaeˉ. Kaˉ nawngˍ veu htiˍ nuing ca laeˍ yao Rawˉduˆ cunˉ veu aeˉ yao, hiˉ keung veu lae laeˍ yao Paˍtaˍraˆ vengˍ veu hkeu lae yaeˉ.

² Hiˉ keung veu Hpiˆniˆ ang meungˉ veu lae naeˉ heuˍ na gu ya myangˉ yao, heuˍ hiˍ mangˉ na gu ta yao lae laeˍ yaeˉ.

³ Kuˇpaˉruˆ cunˉ hingˉ na ya myangˉ beu, laˍ saiˍ kaˍ seu gu aeˉ naeˉ nawngˍ veu, Suˉriˆ ang meungˉ veu ta aengˉ yao, Tuˆruˆ vengˍ veu saoˍ yaeˍ. Aˉ mae yao nae baoˉ vaˍ, heuˍ htaˍ veu tangˉ nga biˍ jiˍ ang keungˍ uiˍ na hingˉ keung veu yuˉ kla saiˍ yaeˍ.

⁴ Hiˉ keung veu ta peˍ htiˍ baˍ uiˍ na gu saˉ myangˉ yao, cetˍ nuing veu tiˍ hkeu ca yaeˉ. Taˍ peˍ hingˍ uiˉ aˍ, Pawˉluˆ Yeˍruˆsaˍlaemˍ vengˍ veu baˍ ya lae naeˉ uiˉ saˍ laiˍ, Ang hkawˍ laˉ nawˍ ta peˍ uiˍ na ha biˍ jiˍ.

⁵ Cetˍ nuing puing ngangˉ yao, gu awkˍ taw aengˉ yaeˉ. Yawng hkaˉ hko laˉ hko uiˉ nae hkaˍ ba ang yaˍ uiˍ muiˉ vengˍ ang ngiˉ veu tiˍ hkeu gu na suiˍ yao sa lae laˍ yao, chaˍ maeˍ lang ba ang hkawpˆ htang veu gu hkaˉ hko laˉ hko hpaˍ tuˍ laˍ hku nae ha yao ang buinˉ paˉ yaeˉ.

⁶ Htiˍ hu nae htiˍ hu hpakˍ lang naeˉ uiˉ ang tangˍ hkai peunˉ lang yao, gu heuˍ htaˍ veu awngˉ ngangˉ lae yao, yawng muiˉ aˍ sangˍ yang beu yumˉ veu lae laeˍ jiˍ.

⁷ Gu Tuˆruˆ vengˍ veu hta yao, heuˍ ta naeˉ kaˉ ba hingˉ lin ngangˉ beu, Paˍtawˆleˆ vengˍ veu hkeu lae yaeˉ. Hiˉ keung veu ca naeˉ yumˉ naeˉ saˉ naeˉ uiˉ changˉ kawngˉ bawˍ aeˉ yao, yawng kawngˉ htiˍ nuing ca yaeˉ.

⁸ Nawngˍ cangˍ nuing hingˉ ngang beu gu awkˍ taw aengˉ laeˍ yao, Kaeˉsaˍriˆ vengˍ veu hkeu aeˉ yaeˉ. Cetˍ hu hingˉ hkaoˉ veu Hpiˆliˆpuˆ nae maengˉ jiˉ mawnˍ pyawˉ naeˉ uiˉ ang buinˉ tangˍ maˍ biˍ naeˍ mangˉ htiˍ hu mangˉ yumˉ veu gu awngˉ lae yao, yang kawngˉ ca yaeˉ.

⁹ Hpaˍcaoˍ beu naiˍ htangˍ hpeuˍ nae uiˉ yang beu hkaˍ ba yaˍ hanˍ hu ang ca. Hkaˍ ba yaˍ hanˍ hu hingˉ uiˉ yaˍ biˍ yaˇ.

¹⁰ Yang yumˉ veu gu iˉ yaˍ mangˍ nae ca yao, Aˍgaˍbuˆ nae maengˉ jiˉ Hpaˍcaoˍ beu pa rawˉ hpaet htiˍ hu mangˉ Yuˉdaˆ ang meungˉ veu ca yao hiˉ keung veu hkeu laˉ jiˉ.

¹¹ Yang gu kawngˉ awngˉ peunˉ laˉ yao, Pawˉluˆ beu tawnˍ sitˍ hingˍ na yuˉ yao, yangˉ yang nae yang beu laˍ puˍ laˍ hkuiˍ uiˍ na hpui laeˍ jiˍ. Haeˉ mae beu, yang ciˍ jiˍ, Ang hkawˍ laˉ ang seungˍ sangˉ mangˉ ningˉ mae ciˍ jiˍ. Tawnˍ sitˍ niˍ mangˉ yumˉ suingˉ na Yeˍruˆsaˍlaemˍ vengˍ hkaoˍ veu Yuˉdaˆ changˉ htiˍ baˍ uiˍ ningˉ mae hpui yao Changˉ ceuˉ htiˍ baˍ uiˍ beu laˍ puˍ hkao veu ap lae naeˉ nae Aˍgaˍbuˆ ciˍ jiˍ.

¹² Gu ang tangˍ ningˍ na ya kyaˍ beu, gu aˍ hiˉ keung veu ca naeˉ uiˉ yumˉ naeˉ uiˉ changˉ nae yao, Yeˍruˆsaˍlaemˍ vengˍ veu baˍ ya aeˉ naeˉ uiˉ saˍ laiˍ Pawˉluˆ na paˉ yaeˉ.

¹³ Pawˉluˆ tawpˍ laeˍ jiˍ yang, Ba ceuˉ ha yao nawng ungˉ yao ga beu nuing ba ningˉ kvak naeˉ uiˉ saˍ laiˍ ha laˍ naeˇ. Ang suingˉ Yeˍsuˆ beu ang maengˉ hingˉ pa nae, Yeˍruˆsaˍlaemˍ vengˍ veu hao hpui laˍ naeˍ hingˉ htiˍ yaˍ baˍ aˍ, siˉ naeˉ na hkamˉ naeˉ uiˉ muiˉ ga haenˍ htaˍ yao chiˉ byaˇ nae ha biˍ jiˍ.

¹⁴ Gu yang na baˍ kaeˍ kaˍ nae beu, Ang suingˉ Hpaˍcaoˍ beu a loˍ capˆ naeˉ laˉ mae hpeuˍ laˉ bu nae, gu ciˍ yao kyapˆ nae ca yaeˉ.

¹⁵ Hingˉ nawngˍ veu, gu ang keungˍ haenˍ yao Yeˍruˆsaˍlaemˍ vengˍ veu lae yaeˉ.

¹⁶ Kaeˉsaˍriˆ vengˍ veu ca naeˉ uiˉ taˍ peˍ htiˍ baˍ uiˍ gu kawngˉ htuˍ yaˍ laˉ mae lae yao, Maˍnaˍsonˍ nae maengˉ jiˉ changˉ hiˉ mangˉ kawngˉ yuˍ naeˍ nae, gu na yang kawngˉ suiˍ yao sa lae langˍ ngaeˉ. Yaˇ ta peˍ hpeuˍ yaeˍ mangˍ ngangˍ jiˉ uiˉ changˉ htiˍ hu yaˇ.

Ang buinˉ paˉ kyaˉ cawngˉ ang huiˍ hkaoˍ veu hao Pawˉluˆ na hpui jiˉ

¹⁷ Gu Yeˍruˆsaˍlaemˍ vengˍ veu hkeu lae beu, yaˍ changˍ mawngˉ namˉ uiˉ gu na mawnˍ mawnˍ saˍ saˉ hap yuˉ langˍ ngaeˉ.

¹⁸ Kaˉ nawngˍ veu htiˍ nuing hingˉ ngang beu, Pawˉluˆ nawˍ gu kawngˉ htuˍ yaˍ lawˉ, Yaˍkok kawngˉ lae yao, awn hoˉ yaˍ mangˍ uiˍ hkaˉ hko laˉ hko muiˉ hpawm lang yao ca jiˉ.

¹⁹ Pawˉluˆ nawˍ yawng na laˍ puˍ kuinˍ lang jiˉ ang tangˍ ciˍ peunˍ lang yao, yang kanˉ vaˍ jiˍ hkaoˉ veu Changˉ ceuˉ htiˍ baˍ uiˍ saˍ laiˍ Hpaˍcaoˍ peunˍ cawngˉ jiˉ uiˉ kanˉ htiˍ baˍ uiˍ awˍ lawng, htiˍ ceuˍ peunˉ yao htiˍ ceuˍ yawng na maˍ biˍ jiˍ.

²⁰ Ciˍ tangˍ ningˍ na ya kyaˍ beu, yumˉ naeˉ saˉ naeˉ uiˉ changˉ Hpaˍcaoˍ na chiˍ huiˍ chiˍ mawng jiˉ. Haeˉ mae beu, yawng Pawˉluˆ na ha biˍ jiˍ. Aiˉ veuˉ, Yuˉdaˆ changˉ ceuˉ hkaoˉ veu, yumˉ naeˉ saˉ naeˉ uiˉ changˉ ang hengˉ hu byaˍ laˉ jiˉ na nang ang bae yaˇ. Yawng hkaˉ hko laˉ hko ang liˍ ang kawngˍ hingˍ na ang ha siˉ yaˇ.

²¹ Caˇ, naˇ aˍ sangˍ yang beu ang yaˍ uiˍ na ang hkaw baˍ ya haen nae, ang liˍ ang kawngˍ ca jiˉ laˉ mae baˍ ya ha nae nang ciˍ yao, Moˉseˍ beu ang liˍ hingˍ na paek ngangˉ sao nae Changˉ ceuˉ htiˍ baˍ uiˍ kawngˉ ca naeˉ Yuˉdaˆ Changˉ ceuˉ htiˍ baˍ uiˍ na nang maˍ biˍ jiˍ nae, Yuˉdaˆ changˉ uiˉ ang byaˍ cangˍ yaˍ kyaˍ jiˍ.

²² Hingˉ pa nae, aˉ mae ha naeˇ, nang hkeu lui jiˉ awˍ lawng ningˉ na yawng maˉ manˉ kyaˍ naeˍ uiˉ yaˇ.

²³ Ningˉ pa nae, Nang na gu hkai laˍ jiˍ laˉ mae hao voˍ. Saˉ caˉ caˍ jiˉ uiˉ changˉ gu kawngˉ hanˍ hu ang ca yaˇ.

²⁴ Yawng na haoˉ nga yao, yawng kawngˉ htuˍ yaˍ laˉ mae seungˍ sangˉ laˉ naeˉ uiˉ ang liˍ na ha aeˉ voˍ. Yawng ang tuˍ seuk tuiˉ laeˍ naeˍ uiˉ saˍ laiˍ, yawng saˍ laiˍ ang huˍ kanˍ aeˉ bu. Haeˉ mae ha baoˉ vaˍ, nang beu awˍ lawng changˉ niˉ mawk ningˉ ya kyaˍ jiˉ lawˉ baˍ ca jiˉ maˍ nae ya bae yao, nang ang to ang liˍ ang kawngˍ veu maenˍ nae yawˍ yao ca naeˍ na ya bae naeˉ yaˇ.

²⁵ Yumˉ naeˉ Changˉ ceuˉ htiˍ baˍ uiˍ saˍ laiˍ nawˍ, awˍ hang sangˉ htuˆ na tan na jiˉ ang ceuˉ nae caˍ naeˍ na baˍ upˍ, siˍ na caˍ naeˍ na baˍ upˍ, nuingˉ chuiˍ veu kaep saeˍ jiˍ uiˉ saˍ na caˍ naeˍ na baˍ upˍ, suˉ yaˍ linˉ yaˍ naeˍ na baˍ upˍ, ningˉ uiˉ ceuˉ na hpaeˉ saˍ taw voˍ nae gu tatˆ chae lang jiˉ lawˉ, yawng na ang laiˍ taemˉ yao piˍ peunˍ byaˇ nae yawng Pawˉluˆ na ha biˍ jiˍ.

²⁶ Haeˉ mae beu, Pawˉluˆ nawˍ, na seuˉ laˍ mae beu changˉ hanˍ hu uiˉ na haoˉ yuˉ yao, yawng kawngˉ htuˍ yaˍ laˉ mae seungˍ laˍ sangˉ laˉ naeˉ uiˉ ang liˍ hingˍ na taeng peunˉ lae yao, ang buinˉ paˉ kyaˉ cawngˉ ang huiˍ hkaoˍ veu awngˉ laeˍ jiˉ. Yawng seungˍ sangˉ laˉ naeˉ uiˉ ang liˍ na taeng naeˉ uiˉ nuing puing kawˉ laˉ naeˉ saˍ laiˍ, yawng htiˍ hu nae htiˍ hu saˍ laiˍ tanˍ seuˍ ya tanˍ biˍ naeˍ uiˉ ang nyamˍ na upˍ kyaˍ aeˉ biˍ jiˍ.

Pawˉluˆ na chu jiˉ

²⁷ Cetˍ nuing hingˉ saˉ puing laˉ beu, Aˍsiˆ ang meungˉ veu laˉ jiˉ Yuˉdaˆ changˉ htiˍ baˍ uiˉ aˍ, Pawˉluˆ na ang buinˉ paˉ kyaˉ cawngˉ ang huiˍ hkaoˍ veu ya myangˉ yao, changˉ ang muˉ uiˉ na htuing lae biˍ jiˍ. Haeˉ mae beu, yawng Pawˉluˆ na hpui peunˉ yao haoˉ yao ciˍ jiˍ yang,

²⁸ Iˉsaˍreˍlaˆ changˉ htiˍ baˍ yawng veuˉ, pawngˍ lui laˍ bao. Changˉ niˇ maˇ, gu changˉ ceuˉ uiˉ na baˍ upˍ, ang liˍ ang kawngˍ na baˍ upˍ, ca kyaˉ ningˉ na baˍ upˍ, ningˉ uiˉ na hu buinˉ naeˉ uiˉ saˍ laiˍ aˉ keung veu ca naeˉ changˉ uiˉ na maˍ biˍ naeˍ mangˉ changˉ htiˍ hu yaˇ. Ningˉ htaˍ veu muiˉ yang Changˉ ceuˉ htiˍ baˍ uiˍ na ang buinˉ paˉ kyaˉ cawngˉ ang huiˍ veu suiˍ langˉ yao, ang seungˍ sangˉ ningˉ na chaˍ kaeˍ kyaˍ taeng nga byaˇ nae ha biˍ jiˍ.

²⁹ Aˉ mae yao nae baoˉ vaˍ, Taˍroˆhpeˍ nae maengˉ jiˉ Eˉfeˉsuˆ changˉ htiˍ hu mangˉ na caeˉ langˉ saˍ jiˍ beu vengˍ hkaoˍ veu Pawˉluˆ kawngˉ cangˉ nga cangˉ naeˉ na yawng ya myangˉ yao, changˉ hiˉ mangˉ na ang buinˉ paˉ kyaˉ cawngˉ ang huiˍ veu Pawˉluˆ suiˍ langˉ jiˉ nae yawng kuitˆ jiˉ.

³⁰ Vengˍ changˍ uiˍ hkaˉ hko laˉ hko ciˍ ciˍ caeoˍ caeoˍ nae ha yao, changˉ ang muˉ ang cumˉ huinˍ yao laˉ jiˉ. Yawng Pawˉluˆ na suiˍ yao, yang na ang buinˉ paˉ kyaˉ cawngˉ ang huiˍ hingˍ ang ngiˉ veu seu awkˍ nga aengˉ yao, ang vaiˍ nae langˉ kaw uiˉ na hpiˍ hko jiˉ.

³¹ Pawˉluˆ na siˉ taw naeˉ uiˉ yawng ha yao ca beu, Yeˍruˆsaˍlaemˍ vengˍ htiˍ vengˍ hingˍ hkaˉ hko laˉ hko ciˍ ciˍ caeoˍ caeoˍ nae ca saw jiˉ awˍ lawng yinˍ cangˉ mangˉ na hao up kyaˍ lae biˍ jiˍ.

³² Htiˍ chitˍ laˍ hkaoˍ veu luk suikˆ uiˉ nae hpaiˍ cangˉ uiˉ na yang haoˉ chawnˉ yao changˉ ang muˉ ciˍ ciˍ caeoˍ caeoˍ nae ha naeˉ hiˉ keung huinˍ yao aeˉ jiˉ. Changˉ hiˉ mawk hingˉ, yinˍ cangˉ nae luk suikˆ uiˉ na ya myangˉ beu Pawˉluˆ na baˍ tuiˍ nae saoˍ ngangˍ jiˉ.

³³ Haeˉ mae beu, yinˍ cangˉ mangˉ Pawˉluˆ kawngˉ aeˉ yao yang na chu chiˉ yao samˉ laˍ tuiˍ nyiˍ senˍ nae hpui voˍ nae ang tangˍ piˍ jiˍ. Peunˉ na yao yang ciˍ jiˍ. Yaˇ aˉ mae uiˉ changˉ jeuˇ, ba ceuˉ vaˍ si jeuˇ nae naˉ jiˉ.

³⁴ Changˉ ang muˉ hkaoˉ veu, htiˍ pakˍ htiˍ ceuˍ haoˉ yao ca jiˉ. Ningˉ mae ciˍ ciˍ caeoˍ caeoˍ ha naeˉ pa nae, maenˍ nae baˍ bae hkaemˍ nae yao Pawˉluˆ na luk suikˆ uiˉ yumˉ veu suiˍ laenˉ voˍ nae yinˍ cangˉ mangˉ ang tangˍ piˍ jiˍ.

³⁵ Pawˉluˆ ca pawngˉ maˍ lin veu hkeu lae beu, changˉ ang muˉ kaˍ haenˍ nae haoˉ yao, luk suikˆ uiˉ yang na paˍ ta laengˉ jiˉ.

³⁶ Aˉ mae yao nae baoˉ vaˍ, changˉ ang muˉ ang byaˍ yang nawngˍ veu hkeˍ yao, Pawˉluˆ na saeˍ bao nae haoˉ jiˉ.

Changˉ ang byaˍ tawngˍ naˍ veu Pawˉluˆ hkaˍ muˍ hkai jiˉ

³⁷ Luk suikˆ uiˉ beu yumˉ veu Pawˉluˆ na suiˍ awngˍ ngangˉ laeˍ naeˍ nae ha beu, yawng yinˍ cangˉ mangˉ na ha biˍ jiˍ. Nang na ga hkaˍ muˍ hkai laˍ yao ang kaˍ laˍ nae naˉ jiˉ. Nae yao yinˍ cangˉ mangˉ ha biˍ jiˍ. Naˇ Heˍlaˍsaˆ tangˍ ang ciˍ hkiˍ laˍ.

³⁸ Naˇ, baˍ mangˍ ngangˍ suing nae beu, ang meungˉ na hpaw saˍ yao hao na saeˍ naeˍ changˉ hanˍ hingˍ hu uiˉ na suiˍ yao changˍ kawngˍ veu suiˍ lae jiˉ Eˉjiˆtuˆ changˉ htiˍ hu hiˉ mangˉ baˍ aˍ la nae naˉ jiˉ.

³⁹ Pawˉluˆ ha laeˍ biˍ jiˍ, Gaˇ Kiˉliˉkiˆ ang meungˉ hkaoˉ veu ca naeˉ Taˍsuˆ vengˍ changˍ, Yuˉdaˆ changˉ htiˍ hu yaˇ. Vengˍ hingˉ ngaˍ, ang maengˉ baˍ huiˍ nae uiˉ vengˍ baˍ aˍ. Changˉ niˉ mawk ningˉ na hkaˍ muˍ hkai biˍ naeˍ uiˉ aˉ hkvangˍ iˉ yaˍ piˍ lao nae yang na paˉ jiˉ.

⁴⁰ Yinˍ cangˉ mangˉ yang na aˉ hkvangˍ piˍ yao Pawˉluˆ nawˍ, ca pawngˉ htaˍ veu cung yao laˍ puˍ maˍ biˍ jiˍ. Yawng kyapˆ nae ca beu, Pawˉluˆ yawng na Heˍbraeˉ tangˍ ciˍ yao ha biˍ jiˍ,