2 TESALUNIKA 1 - PEJANJIAN EMPAI CERITAU ILUAK

Pesan

¹ Jak di Paulus, Siluanus ngan Timutius batan endak jemau Keristen di Tesalunika diau njadi umat Allah Bapak ngan Tuhan Yesus Keristus.

² Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai ngan kamu.

Ukuman masau Keristus datang

³ Kantin-kantinku, kami maju beterimau-kasia ngan Allah karnau kamu. Nyela, semestiau luak itu, karnau kamu tamba percayau ngan Keristus ngan tamba sangi sayangi.

⁴ Itula sebapau kami muji kamu di guak jemau Keristen. Riang nian kami nceritauka kamu, karnau kamu maju percayau ngan tekun ngan Keristus, empuak kamu diluatka ngan dianiayau.

⁵ Gegalaunyautu nyatauka Allah ngakimi ngan adil. Kamu sengsarau mbak kini, karnau Allah njadi rajau kamu, mangku kamu sepantasau njadi umatAu.

⁶ Allah itu adil. Diau ka mbalaska jemau diau mbuati kamu.

⁷ Mbak kini kitau diau sengsarau. Allah ka mbibaska kitau nanti, masau Tuhan Yesus tughun jak di sergau ngan malaikatAu diau bekuasau.

⁸ Ngan api diau maghak Diau ka tughun endak ngukum jemau diau enggup percayau ngan Allah ngan enggup ta'at ngan ceritau iluak jak di Yesus, Tuhan kitau.

⁹ Ughangtu ka benasau selelamaunyau, dicapakka keluagh jak di guak Tuhan, jak di kuasauNyau diau agung.

¹⁰ Gegalaunyautu ka tejadi, amun Diau datang nanti endak diagungka umatAu ngan diregaui bilang jemau diau percayau. Kamuni pulau ka temasuak umatAu, karnau kamu percayau ngan ceritau diau kami kiciakka ngan kamu.

¹¹ Itula sebapau kami maju du'aka kamu, supayau Allah njadika kamu pantas idup nuruti kenda'Au, karnau batan endak itula kamu dipilia. Kami bedu'a, supayau Allah ngan kuasauNyau nulung kamu endak ngerjauka setu diau iluak diau endak kamu kerjauka, karnau percayau ngan Keristus.

¹² Ngan carau luak itula Tuhan kitau Yesus diagungka karnau kitau, mangku kamu pulau dipuji Yesus karnau keilu'an ati Allah ngan Tuhan kitau Yesus Keristus.