1 KURINTUS 1 - PEJANJIAN EMPAI CERITAU ILUAK

¹ Jak di Paulus, diau dipilia Allah njadi rasul Yesus Keristus, ngan jak di Sustenis, kantin kitau,

² batan endak jemau Keristen di Kurintus, jemau diau la dipilia Allah njadi umatAu ngan melemakka atiAu karnau Keristus Yesus, ngan gegalau jemau di manau ajau diau nyemba Tuhan kitau Yesus Keristus, Tuhan ughangtu ngan Tuhan kitau pulau.

³ Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai ngan gegalau kamu.

Keilu'an Allah karnau Yesus Keristus

^4-5 Aku maju beterimau-kasia ngan Allah, karnau kamu la nerimau keilu'an Allah karnau la seghundak ngan Yesus Keristus, mangku kamu la njadi kayau ngan gegalaunyau, kayau ngan katau, kayau ngan pengertian.

⁶ Itu tandaunyau, bansau ceritau Keristus la meghesap dalam ati kamu.

⁷ Mangku kamu nidau kurang tuapau-apau pengenjuak Rua Allah, penarau kamu nunggu Tuhan kitau Yesus Keristus datang agi.

⁸ Diau pulau ka neguaka ngan njagaui kamu enggut pengabisan, mangku kamu nidau becacat masau aghi Tuhan kitau Yesus Keristus datang.

⁹ Allah ka ngerjaukanyau. Diautu pacak dipercayaui nian. Diaula milia kamu njadi seghundak ngan Ana'Au Yesus Keristus, Tuhan kitau.

Melaghau jemau bebala

¹⁰ Dalam namau Tuhan kitau Yesus Keristus aku mintak nian, supayau kamu suijauan ngan jangan adau diau bebala, anyautu kamu mesti semegi pendapat.

¹¹ Karnau adau jak di kapu Kelui diau la ngiciakka ngan aku, bansau adau jak di kamu diau bebala.

¹² Inila diau kukiciakka: Adau diau ngatauka, “Aku ngikut Paulus,” adau diau lain agi bekatau, “Aku ngikut Apulus,” adau agi diau bekatau, “Aku ngikut Pitrus,” mangku adau pulau diau bekatau, “Aku ngikut Keristus.”

¹³ Baghia Keristus dibagi-bagi? Apu Paulus mati di kayu salip batan endak kamu? Apu kamu dibaptiska ngan namau Paulus njadi anak-buahau?

¹⁴ Untungla aku nidau mbaptis sughang kiala jak di kamu lain ngan Kerispus ngan Gayus.

¹⁵ Mangku nidau bediau diau pacak bekatau, bansau kamu dibaptis ngan namauku endak njadi anak-buaku.

¹⁶ Nyela, kapu Setipanus kubaptiska pulau, tapitu lain jak di itu pengingatanku endiak bediau agi diau kubaptiska.

¹⁷ Keristus ngajung aku ukan endak mbaptiska jemau, tapitu endak ngiciakka ceritau iluak jak di Allah. Itu pulau mesti kukerjauka, ukan karnau pintar ngiciak, supayau kematian Keristus di kayu salip jangan kesesiau ajau.

Kuasau ngan pengertian Allah nyatau dalam Keristus

¹⁸ Ceritau Yesus mati di kayu salip dianggap mbu'ung ngan jemau diau ka benasau, anyautu ngan kitau diau ka diselamatka, itu kuasau Allah.

¹⁹ Dalam Injil Allah bekatau, “Kepintaran jemau bepengertian ka Kuabiska. Rupu'an jemau beilmu ka Kukacauka.”

²⁰ Mangku tuapau retiau jemau pintar? Tuapau retiau jemau beilmu ngan jemau pintar ngiciak? Allah la nyatauka, bansau kepintaran manusiau nidau bediau retiau.

²¹ Luak manau kila pintar manusiau, diau nidau ka pacak keruan Allah ngan kepintarannyautu. Anyautu karnau Allah bepengertian, Diau endak nyelamatka jemau diau percayau ngan Diau karnau ceritau iluak diau dianggap deniau kici'an bigal.

²² Jemau Yahudi mintak tandau nyelia njadi buktiau, jemau Yunani ndalak kepintaran manusiau.

²³ Kamini ngiciakka Keristus mati di kayu salip. Ceritau itu nyinggung jemau Yahudi, jemau ukan Yahudi nganggap itu bigal.

²⁴ Batan endak jemau diau la dipilia Allah, empuak jemau Yahudi empuak jemau ukan Yahudi, ceritau itu nyatauka kuasau Allah ngan pengertian Allah.

²⁵ Karnau setu diau kina'an bigal di Allah, pintarla titu sangkan kepintaran manusiau; diau kina'an litak di Allah, teguala titu sangkan manusiau.

²⁶ Cubau ingatka, luak manau idup kamu masau kamu dipilia Allah. Gi dikit ajau jak di kamu diau bepengertian nurut pandangan manusiau. Gi dikit diau bekuasau ngan bepangkat tinggi.

²⁷ Allah sajauka milia diau dianggap bigal di deniauni, supayau jemau diau pintar dimaluka. Allah milia pulau diau dianggap deniau litak, supayau jemau diau gaga dimaluka.

²⁸ Allah milia diau dianggap deniau inau ngan diau nidau bediau retiau, supayau diabiska diau diregaui deniau.

²⁹ Mangku nidau sughang kia pacak ninggika diriau di adapan Allah.

³⁰ Kamu seghundak ngan Keristus karnau Allah. Kitau bepengertian karnau Keristus. Diautu mbenaghka kitau ngan njadika kitau umat Allah ngan mbibaska kitau.

³¹ Mangku itu luak la ditulis di Injil, “Jemau diau endak bangga mesti mbanggaka setu diau dikerjauka Allah.”