Psalmyn 99 - Lioar ny Psalmyn 1765 (Pointed)

PSAL. 99. Dominus regnavit.

¹ She yn Chiarn y Ree, lhig da’n pobble girree magh myr sailliu: t’eh ny hoie eddyr ny cherubimyn ga dy vel y seihll cha anveagh.

² S’mooar ta’n Chiarn ayns Sion: as ard er-skyn dy-chooilley phobble.

³ Ver ad booise da dt’Ennym’s: ta mooar, yindyssagh, as casherick.

⁴ Ta pooar y ree graihagh er briwnys; t’ow er hoiaghey seose cairys: t’ow er chooilleeney briwnys as ynrickys ayns Jacob.

⁵ O cur-jee ard-voylley da’n Chiarn y Jee ain: as tuitt-jee sheese er nyn ghlioonyn kiongoyrt rish stoyl e choshey, son t’eshyn casherick.

⁶ Moses as Aaron mastey e haggyrtyn, as Samuel mâroosyn ta geamagh er e Ennym: deïe ad shoh er y Chiarn, as cheayll eh ad.

⁷ Loayr eh roo ass y phillar vodjallagh: son dreill ad e recortyssyn, as y leigh v’eh er choyrt daue.

⁸ Cheayll oo ad, O Hiarn nyn Yee: leih oo daue, O Yee, as ren oo kerraghey ny obbraghyn fardalagh oc.

⁹ O cur-jee ard-voylley da’n Chiarn yn Jee ain, as jean-jee eshyn y ooashlaghey er e chronk casherick: son ta’n Chiarn yn Jee ain casherick.