Psalmyn 96 - Lioar ny Psalmyn 1765 (Pointed)

PSAL. 96. Cantate Domino.

¹ O gow-jee arrane noa da’n Chiarn: gow-jee arrane da’n Chiarn, ooilley yn slane seihll.

² Gow-jee arrane da’n Chiarn, as moylley-jee yn Ennym echey: bee-jee ginsh jeh e haualtys veih laa dy laa.

³ Jean-jee e onnor y hoilshaghey da ny ashoonyn-quaagh: as e yindyssyn da dy-chooilley phobble.

⁴ Son ta’n Chiarn mooar, as cha vod eh dy-feeu ’ve er ny voylley: ta ny smoo dy aggle dy ve goit roïshyn na dy-chooilley Yee.

⁵ Son cha vel ooilley Jee'ghyn ny ashoonyn agh jallooyn: agh she’n Chiarn chroo ny niaughyn.

⁶ Ta gloyr as ooashley ayns e enish: ta pooar as onnor ayns ynnyd e chasherickys.

⁷ Cur-jee da’n Chiarn, O shiuish chynneeyn y phobble: chebb-jee da’n Chiarn ooashley as pooar.

⁸ Cur-jee da’n Chiarn yn onnor cair da’n Ennym echey: chebb-jee ourallyn, as tarr-jee stiagh ayns e chooyrtyn.

⁹ O cur-jee ooashley da’n Chiarn ayns yn ynnyd aalin dy chasherickys: lhig da’n slane seihll ’ve arrymagh ayns e enish.

¹⁰ Insh-jee mastey ny ashoonyn, dy nee yn Chiarn y Ree: as dy nee eshyn eh t’er n’yannoo yn seihll rhunt cha shickyr nagh vod eh ve er ny scughey, as kys dy jean eh yn pobble y vriwnys dy-cairagh.

¹¹ Lhig da ny niaughyn goaill boggey, as lhig da’n thalloo ’ve gennal: lhig da’n faarkey fiyr y yannoo, as ooilley ny t’ayn.

¹² Lhig da’n magher ’ve laane dy voggey, as ooilley ny t’ayn: eisht nee ooilley biljyn y cheyll boggey ’ghoaill kiongoyrt rish y Chiarn.

¹³ Son t’eh cheet, t’eh cheet dy vriwnys y thalloo: as lesh cairys dy vriwnys y seihll, as y pobble lesh e ynrickys.