Psalmyn 94 - Lioar ny Psalmyn 1765 (Pointed)

PSAL. 94. Deus ultionum.

¹ O Hiarn Yee, dhyts ta bentyn dy ghoaill kerraghey: uss Yee, dhyts ta kerraghey bentyn, jean oo hene y hoilshaghey.

² Trogg ort, uss Vriw y theihll: as jean ny mooaralee y chooilleeney lurg nyn doilchin.

³ Hiarn, caid nee ny mee-chrauee: caid nee yn vooinjer vee-chrauee boggyssagh?

⁴ Caid nee ooilley ny drogh-yantee loayrt cha mooaralagh: as goaill orroo lheid y voggyssagh voyrnagh?

⁵ T’ad bwoalley sheese dty phobble, O Hiarn: as jannoo tranlaase er dt’eiraght.

⁶ T’ad dunverys y ven-treoghe, as y joarree: as cur y liannoo gyn ayr dy baase.

⁷ As foast t’ad gra, Cha n’aggle dooin, cha jean y Chiarn fakin: cha-moo ver Jee Yacob geill da.

⁸ Gow-jee tastey, shiuish vee-hushtee mastey’n pobble: O shiuish ommydanyn, cooinn nee shiu toiggal?

⁹ Eshyn ren y chleaysh y hoiaghey, nagh jean eh clashtyn: ny eshyn ren y thooill, nagh jean eh fakin?

¹⁰ Ny eshyn ta cummal seose ny ashoonyn: she eshyn ta gynsaghey da dooinney tushtey, nagh jean eshyn kerraghey?

¹¹ Ta fys ec y Chiarn er smooinaghtyn dooinney: nagh vel ad agh fardail.

¹² Bannit yn dooinney t’ow dy smaghtaghey, O Hiarn: as dy ynsaghey ayns dty leigh;

¹³ Dy vod oo surranse y choyrt da ayns earish seaghyn: derrey vees yn ooig er ny chleiy son ny mee-chrauee.

¹⁴ Son cha jean y Chiarn failleil e phobble: cha-moo nee eh treigeil e eiraght;

¹⁵ Derrey hyndaa's cairys reesht gys briwnys: nee adsyn ooilley ta firrinagh ayns cree, geiyrt er.

¹⁶ Quoi nee girree seose mârym noi ny mee-chrauee: ny quoi hassys er my cheu noi ny drogh-yantee?

¹⁷ Mannagh beagh y Chiarn er chooney lhiam: cha row saase my chour nagh beagh m’annym er ny choyrt ny-host.

¹⁸ Agh tra dooyrt mee, Ta my chass er skyrraghtyn: ren dty vyghin’s, O Hiarn, mish y chummal seose.

¹⁹ Ayns ymmodee ny smooinaghtyn trimshagh v’aym ayns my chree: ta dty gherjagh er ooraghey m’annym.

²⁰ Bee veg ayds dy yannoo rish y stoyl-briwnys dy vee-chairys: ta cummey yn aggair myr y leigh?

²¹ T’ad chaglym cooidjagh noi annym y dooinney cairagh: as deyrey gy baase yn uill neu-chyndagh.

²² Agh yn Chiarn my chemmyrk: as my Yee niart my hreishteil.

²³ Cooilleenee eh orroosyn nyn olkys, as stroie-ee eh ad ayns y ghoanlys oc hene: dy-jarroo, nee’n Chiarn yn Jee ain ad y stroie.