Psalmyn 90 - Lioar ny Psalmyn 1765 (Pointed)

MORNING PRAYER. PSAL. 90. Domine, refugium.

¹ Hiarn, t’ow uss er ve nyn gemmyrk: veih sheeloghe gys sheeloghe.

² Roish my daink ny sleïtyn rish, ny rieau yn thalloo as y seihll er nyn groo: she uss Jee er dy-rieau, as seihll gyn jerrey.

³ T’ow chyndaa dooinney gys toyrt-mow: reesht t’ow gra, Tarr-jee reesht, shiuish chloan gheiney.

⁴ Son cha vel thousane blein ayns dty hilley’s agh myr y laa jea: fakin dy vel shen er n’gholl shiaghey myr arrey ’syn oie.

⁵ Cha leah as t’ow dyn skeayley ad, t’ad dy-jarroo myr cadley: as fioghey ersooyl chelleeragh myr y faiyr.

⁶ Ayns y voghrey te glass, as gaase seose: agh ayns yn astyr te giarit sheese, te creen as fiojit.

⁷ Son ta shin lheïe ersooyl ayns dty yymmoose: as ta aggle orrin roish dty chorree hrome.

⁸ T’ow er hoiaghey nyn ghrogh-yannoo kiongoyrt rhyt: as nyn beccaghyn follit ayns soilshey dt’eddin.

⁹ Son tra t’ow uss corree, ta ooilley nyn laghyn er n’immeeaght: ta ny bleeantyn ain ec kione myr skeeall t’er ny insh.

¹⁰ Ta laghyn yn eash ain three-feed blein as jeih; as ga dy vod deiney ’ve cha lajer as dy roshtyn kiare-feed blein: ny-yeih cha vel y troshid oc eisht agh deïnys as trimshey; cha leah shen te er n’gholl shiaghey, as ta shin goit jeh.

¹¹ Agh quoi ta toiggal pooar dty yymmoose: son dy-jarroo myr ta dooinney goaill aggle, shen myr ta dty chorree.

¹² Ynsee dooin myr shen dy earroo nyn laghyn: dy vod ny creeaghyn ainyn ve soit er creenaght.

¹³ Chyndaa uss reesht, O Hiarn, ec y jerrey: as bee graysoil da dty harvaantyn.

¹⁴ O jean shin y yannoo magh lesh dty vyghin, as shen dy-leah: myr shen nee mayd boggey ’ghoaill, as bee mayd gennal ooilley laghyn nyn mea.

¹⁵ Gerjee shin reesht, nish lurg y traa t’ow er cherraghey shin: as son ny bleeantyn ayndoo ta shin er hurranse seaghyn.

¹⁶ Soilshee dt’obbyr da dty harvaantyn: as da nyn gloan dty ghloyr.

¹⁷ As dy row Ard-ooashley gloyroil y Chiarn yn Jee ain orrin: bishee uss obbyr nyn laueyn orrin, O bishee uss ny ta shin dy ghoaill ayns laue.