Psalmyn 9 - Lioar ny Psalmyn 1765 (Pointed)

MORNING PRAYER. PSAL. 9. Confitebor tibi.

¹ Ver-yms booise dhyts, O Hiarn, lesh ooilley my chree: loayr-ym jeh ooilley dty obbraghyn mirrillagh.

² Bee’ms gennal as goym boggey ayn-yds: dy-jarroo, my arraneyn nee’m y yannoo jeh dt’Ennym, O Uss smoo Ard.

³ Choud as ta my noidyn er nyn imman ersooyl: nee ad tuittym as cherraghtyn ec dt’enish.

⁴ Son t’ow er vendeil my chairys as my chooish: t’ow dty hoie er stoyl-reeoil dy vriwnys cairagh.

⁵ T’ow er choyrt oghsan da ny ashoonyn, as er stroie ny mee-chrauee: t’ow er choyrt ass yn ennym oc son dy-bragh as dy-bragh.

⁶ O uss noid, ta traartyssyn er jeet gys slane jerrey: eer myr ny ard-valjyn t’ow er stroie; ta’n imraa oc er gholl naardey mâroo.

⁷ Agh ta’n Chiarn farraghtyn son dy-bragh: t’eh myrgeddin er chiarail e stoyl-reeoil son briwnys.

⁸ Son nee eh yn seihll y vriwnys ayns cairys: as shirveish briwnys firrinagh er y pobble.

⁹ Bee yn Chiarn neesht fendeilys dauesyn ta tranlaasit: dy-jarroo kemmyrk ayns y traa cooie dy heaghyn.

¹⁰ As adsyn shione daue dt’Ennym, ver nyn dreishteil ayn-yds: son cha vel uss, Hiarn, rieau er hreigeil adsyn ta dy dty hirrey.

¹¹ O moylley-jee yn Chiarn ta vaghey ayns Sion: soilshee-jee da’n pobble cre t’eh er n’yannoo.

¹² Son tra t’eh jannoo briaght son deayrtey fuill dyn loght, t’eh cooinaghtyn orroo: as cha vel eh jarrood accan ny ymmyrchee.

¹³ Jean myghin orrym, O Hiarn; smooinee er y seaghyn ta mee dy hurranse lioroosyn ta dwoaie oc orrym: uss ta dy my hroggal seose veih giattyn y vaaish;

¹⁴ Dy voddym soilshaghey ooilley dty voylley cheu-sthie jeh giattyn inneen Sion: nee’ms boggey ’ghoaill ayns dty haualtys.

¹⁵ Ta ny ashoonyn er duittym sheese ayns yn ooig t’ad hene er n’yannoo: ayns y ribbeh cheddin dollee ad dy-follit, ta’n chass oc hene er ny ghoaill.

¹⁶ Ta fys ain dy vel y Chiarn cooilleeney briwnys: ta’n mee-chrauee er ny chassey ayns obbyr e laueyn hene.

¹⁷ Bee ny drogh-yantee er nyn jyndaa gys niurin: as ooilley yn sleih ta jarrood Jee.

¹⁸ Son cha bee’n boght dy-kinjagh er ny yarrood: cha jean farkiaght surransagh ny imlee cherraghtyn son dy-bragh.

¹⁹ Trogg ort, Hiarn, as ny lhig da dooinney laue yn eaghtyr y gheddyn: lhig da ny ashoonyn v’er nyn mriwnys ayns dty hilley.

²⁰ Cur ad ayns aggle, O Hiarn: dy vod fys ’ve ec ny ashoonyn nagh vel ad hene agh deiney.