Psalmyn 89 - Lioar ny Psalmyn 1765 (Pointed)

EVENING PRAYER. PSAL. 89. Misericodias Domini.

¹ Bee m’arrane kinjagh jeh kenjallys-ghraihagh y Chiarn: lesh my veeall bee’ms dy-bragh soilshaghey dt’irriney veih un sheeloghe gys sheeloghe elley.

² Son ta mee er ghra, Bee myghin er ny hoiaghey seose son dy-bragh: dt’irriney nee oo y hickyraghey ayns ny niaughyn.

³ Ta mee er yannoo conaant rish my er-reiht: ta mee er vreearrey da David my harvaant;

⁴ Dty ’luight’s nee’ms y hickyraghey son dy-bragh: as dty stoyl-reeoil y hoiaghey seose veih sheeloghe gys sheeloghe.

⁵ O Hiarn, nee ny niaughyn hene dt’obbraghyn yindyssagh y voylley: as dt’irriney ayns sheshaght ny nooghyn.

⁶ Son quoi eh er-skyn ny bodjallyn: vees er ny hoyllaghey rish y Chiarn?

⁷ As quoi eshyn mastey ny Jee'ghyn: vees casley rish y Chiarn?

⁸ Ta aggle feer vooar dy v’er ny ghoaill roish Jee ayns chaglym-cooidjagh ny nooghyn: as ta arrym dy ve er ny choyrt da lioroosyn ooilley ta mygeayrt-y-mysh.

⁹ O Hiarn Yee jeh sheshaght flaunys, quoi ta goll rhyts: ta dt’irriney, Hiarn smoo niartal, er dy-chooilley cheu.

¹⁰ T’ow reill dewlys ny marrey: t’ow kuinaghey ny tonnyn eck tra t’ad troggal.

¹¹ T’ow er choyrt Egypt fo-chosh, as er stroie eh: t’ow er skeayley dty noidyn dy-lhean lesh dty roih niartal.

¹² Ta ny niaughyn lhiats, lhiats myrgeddin yn thalloo: t’ow er hoiaghey undin y seihll rhunt, as ooilley ny t’ayn.

¹³ T’ow er yannoo yn twoaie as y jiass: nee Tabor as Hermon boggey y ghoaill ayns dt’Ennym.

¹⁴ Ta roih niartal ayd: s’lajer ta dty laue’s, as ard ta dty laue yesh.

¹⁵ Cairys as cor'mid ta stoyl-reeoil dty ynnyd-vaghee: hed myghin as firrinys roish dt’eddin.

¹⁶ Bannit ta’n pobble, O Hiarn, oddys boggey y ghoaill ayn-yd: nee ad gimmeeaght ayns soilshey dt’eddin.

¹⁷ Bee yn taitnys oc gagh-laa ayns dt’Ennym’s: as ayns dty chairys nee ad boggyssagh;

¹⁸ Son uss gloyr y niart oc: as ayns dty chenjallys-ghraihagh nee oo nyn ghing y hroggal seose.

¹⁹ Son ta’n Chiarn nyn vendeilagh: ta’n Er Casherick dy Israel nyn Ree.

²⁰ Loayr oo keayrt dy row ayns ashlishyn rish dty nooghyn, as dooyrt oo: Ta mee er choyrt cooney er fer ta niartal; Ta mee er hoiaghey seose fer reiht ass y pobble.

²¹ Ta mee er gheddyn David my harvaant: lesh my ooïll chasherick ta mee er n’ooïllaghey eh.

²² Cummee my laue eshyn dy-shickyr: as nee my roih eh y niartaghey.

²³ Cha bee yn noid abyl tranlaase y yannoo er: cha jean mac yn olkys aggair y yannoo da.

²⁴ Bwoaill-ym sheese e noidyn kiongoyrt rish yn eddin echey: as nee’m adsyn y stroie ta feoh oc ersyn.

²⁵ Bee m’irriney neesht as my vyghin mârish: as ayns m’Ennym’s bee’n niart echey er ny hoiaghey seose.

²⁶ Soie-ym seose yn reill echey neesht er yn aarkey: as e laue yesh ayns ny thooillaghyn.

²⁷ Nee eh geamagh hym, She uss my Ayr: my Yee, as my haualtys lajer.

²⁸ As nee’ms eh y yannoo my vac shinney: ny syrjey na reeaghyn y thallooin.

²⁹ Freill-ym my vyghin er e hon son dy-bragh: as shassee my chonaant shickyr mârishyn.

³⁰ Ver-ym er y sluight echey myrgeddin dy arraghtyn son dy-bragh: as y stoyl-reeoil echey myr laghyn niau.

³¹ Agh my hreigys yn chloan echey my leigh: as nagh nimmee ad ayns my vriwnyssyn;

³² My vrishys ad my ’lattyssyn, as nagh vreill ad m’annaghyn: nee’ms ny foilljyn oc y cherraghey lesh y clatt, as nyn beccah lesh booillaghyn.

³³ Ny-yeih, my chenjallys-ghraihagh cha goym dy-bollagh voïsh: cha-moo lhiggym da m’irriney dy ailleil.

³⁴ My chonaant cha jean-ym y vrishey, ny yn red y chaghlaa t’er n’gholl magh ass my veillyn: ta mee er n’yannoo breearrey un cheayrt liorish my chasherickys, nagh vail-ym David.

³⁵ Nee yn sluight echey tannaghtyn son dy-bragh: as ta’n stoyll echey goll-rish y ghrian kiongoyrt rhym.

³⁶ Nee eh shassoo shickyr son dy-bragh myr yn eayst: as myr yn feanish firrinagh ayns niau.

³⁷ Agh t’ow er chur cooyll rish as er hreigeil dt’Er-ooïllit: as t’ow jymmoosagh rish.

³⁸ T’ow er vrishey conaant dty harvaant: as er hilgey yn attey echey gys y thalloo.

³⁹ T’ow er lieggal ooilley e voallaghyn: as er vrishey sheese ny tooryn lajer echey.

⁴⁰ T’adsyn ooilley ta goll shiaghey dy spooilley eh: as t’eh er jeet dy ve ny oltooan da e naboonyn.

⁴¹ T’ow er hoiaghey seose laue yesh e noidyn: as er chur orroosyn ooilley va n’oï dy ghoaill boggey.

⁴² T’ow er ghoaill ersooyl foyr e chliwe: as cha vel oo cur da barriaght ayns y chaggey.

⁴³ T’ow er choyrt ass e ghloyr: as er hilgey e stoyl-reeoil sheese gys y thalloo.

⁴⁴ Laghyn e aegid t’ow er yannoo giare: as er choodaghey eh lesh mee-ooashley.

⁴⁵ Hiarn, caid nee uss oo hene y ollaghey, son dy-bragh: as jean dty chorree lostey goll-rish aile?

⁴⁶ O cooinee cre cha giare as ta my hraa: cre’n-fa t’ow uss er n’yannoo dy-chooilley ghooinney dy ve fardalagh?

⁴⁷ Quoi’n dooinney ta bio, nagh vaik y baase: as jean eh yn annym echey y livrey veih laue yn oaie?

⁴⁸ Hiarn, cre vel dty henn chenjallyssyn-ghraihagh: yiall oo lesh breearrey da David ayns dt’irriney?

⁴⁹ Cooinee, Hiarn, er yn oltooan t’ec dty harvaantyn: as kys ta mee gymmyrkey ayns m’oghrish scammyltyn ymmodee sleih;

⁵⁰ Lhieu ta dty noidyn er dty oltooaney; as er hilgey scammylt er kesmadyn dt’Er-ooïllit: dy row yn Chiarn er ny voylley son dy-bragh. Amen, as Amen.