Psalmyn 85 - Lioar ny Psalmyn 1765 (Pointed)

PSAL. 85. Benedixisti, Domine.

¹ Hiarn, t’ow er jeet dy ve graysoil da dty heer: t’ow er hyndaa ersooyl cappeeys Yacob.

² T’ow er leih mee-chraueeaght dty phobble: as er goodaghey ooilley nyn beccaghyn.

³ T’ow er choyrt voïd ooilley dty yymmoose: as er hyndaa oo hene veih chiass dty chorree.

⁴ Chyndaa shin reesht, O Yee nyn Saualtagh: as lhig da dty chorree scuir voïn.

⁵ Bee oo jymmoosagh rooin son dy-bragh: as jean oo dty chorree y heeyney magh veih un heeloghe gys sheeloghe elley?

⁶ Nagh jean oo chyndaa reesht, as shinyn y vioghey: dy vod dty phobble boggey y ghoaill ayn-yd?

⁷ Soilshee dooin dty vyghin, O Hiarn: as giall dooin dty haualtys.

⁸ Eaisht-ym cre jirr y Chiarn my mychione’s: son nee eh shee y loayrt rish e phobble, as rish e nooghyn, nagh jyndaa ad reesht gys ommijys.

⁹ Son ta e haualtys er-gerrey dauesyn ta goaill aggle roïsh: dy vod gloyr tannaghtyn ayns y cheer ain.

¹⁰ Ta myghin as firrinys er choyrt qualtys dy chielley: ta cairys as shee er phaagey yn derrey yeh yn jeh elley.

¹¹ Nee firrinys blaaghey ass y thalloo: as ta cairys er yeeaghyn neose veih niau.

¹² Dy-jarroo, nee yn Chiarn kenjallys-ghraihagh y hoilshaghey: as ver y cheer ain magh e mess.

¹³ Nee cairys goll roïshyn: as e immeeaght y leeideil er y raad.