Psalmyn 82 - Lioar ny Psalmyn 1765 (Pointed)

EVENING PRAYER. PSAL. 82. Deus stetit.

¹ Ta Jee shassoo ayns chaglym-cooidjagh ny prinsyn: t’eshyn briw mastey Jeeaghyn (fir-reill).

² Caid ver shiu briwnys aggairagh: as soiaghey jeh persoonyn ny mee-chrauee?

³ Jean-jee ny boghtyn as y chloan gyn ayr y endeil: jeeagh-jee dy vow adsyn cairys ta ayns feme as ymmyrch.

⁴ Livrey-jee yn vooinjer ta treigit as ny boghtyn: saue-jee ad veih laue ny mee-chrauee.

⁵ Cha naillieu ’ve ynsit, cha-moo nee ad toiggal y ghoaill, agh goll er nyn doshiaght kinjagh ayns dorraghys: ta ooilley undinyn y thallooin ass nyn ghoorse.

⁶ Dooyrt mee, She Jee'ghyn shiu: as ta shiu ooilley nyn ghloan jeh’n Fer smoo syrjey;

⁷ Agh yiow shiu baase goll-rish deiney: as tuittee shiu myr fer jeh ny prinsyn.

⁸ Trogg ort, O Yee, as jean uss y seihll y vriwnys: son nee uss ooilley ny ashoonyn-quaagh y ghoaill son dt’eiraght.