Psalmyn 78 - Lioar ny Psalmyn 1765 (Pointed)

EVENING PRAYER. PSAL. 78. Attendite, popule.

¹ Clasht-jee rish my leigh’s, O my phobble: cromm-jee nyn gleayshyn gys goan my veeall’s.

² Nee’m my veeall y osley ayns coraa-dorraghey: ver-ym y bun diu jeh raaghyn doillee yn chenndeeaght;

³ Ad ta shin er chlashtyn as er hoiggal: as lheid as ta nyn ayraghyn er n’insh dooin;

⁴ Nagh jinnagh shin ad y cheiltyn veih cloan ny sheelogheyn ta ry heet: agh dy hoilshaghey onnor y Chiarn, ny obbraghyn niartal as yindyssagh t’eh er n’yannoo.

⁵ Ren eh conaant rish Jacob, as hug eh leigh da Israel: shen ren eh saarey nyn shenn-ayraghyn dy ynsaghey da nyn gloan;

⁶ Dy voddagh y sluight oc toiggal ’ghoaill jeh: as y chloan nagh row foast er nyn ruggey;

⁷ Dy voddagh adsyn tra veagh ad er n’aase seose: yn chooid cheddin y hoilshaghey da nyn gloan;

⁸ Dy voddagh ad nyn dreishteil y choyrt ayns Jee: as gyn obbraghyn Yee y yarrood, agh ny annaghyn echeysyn y reayll.

⁹ As gyn ve myr nyn shenn-ayraghyn, sheeloghe vee-chredjuagh as mee-viallagh: sheeloghe nagh ren nyn gree y hoiaghey dy cairagh, as y spyrryd oc cha ren lhiantyn dy shickyr gys Jee;

¹⁰ Goll-rish cloan Ephraim: lurg daue ve eïllit son caggey, as cur lhieu bowaghyn, hyndaa ad nyn gooyl ayns laa yn chaggey.

¹¹ Cha dreill ad conaant Yee: as cha jinnagh ad gimmeeaght ayns e leigh;

¹² Agh yarrood ad ny v’eh er n’yannoo: as ny obbraghyn yindyssagh v’eh er hoilshaghey er nyn son oc.

¹³ Reddyn mirrillagh ren eshyn ayns shilley ny shenn-ayraghyn ainyn, ayns thalloo Egypt: dy-jarroo ayns magher Zoan.

¹⁴ Ren eh yn aarkey y scarrey, as lhig eh daue goll ny-hrooid: hug eh er ny hushtaghyn dy hassoo er mooin-y-chielley [myr voall er dagh cheu.]

¹⁵ Ayns y laa neesht ren eh ad y leeideil lesh bodjal: as fud-ny-hoie lesh soilshey dy aile.

¹⁶ Ren eh ny creggyn creoi y scoltey ’syn aasagh: as hug eh jough daue assdoo, myr dy beagh eh ass y diunid vooar.

¹⁷ Hug eh lesh ushtaghyn ass y chreg chloaie: myr shen dy vrish ad magh goll-rish ny awinyn.

¹⁸ Ny-yeih son shoh as ooilley hie ad ny sodjey er nyn doshiaght ayns peccah n’oï: as ren ad yn Fer smoo syrjey y vrasnaghey ’syn aasagh.

¹⁹ Ren ad Jee y hrial ayns nyn greeaghyn: as hirr ad bee son y thaynt oc.

²⁰ Loayr ad noi Jee myrgeddin, gra: Jean Jee boayrd y chiarail nyn gour ayns yn aasagh?

²¹ Voaill eh yn chreg chloaie dy-jarroo, dy ren yn ushtey brishey magh, as dy roih eh ooilley ny strooanyn: agh vod eh arran y choyrt myrgeddin, ny feill y chiarail gour e phobble?

²² Tra cheayll y Chiarn shoh, v’eh jymmoosagh: myr shen va’n aile er ny oaddey ayns Jacob, as haink jymmoose trome seose noi Israel;

²³ Er-y-fa nagh ren ad credjal ayns Jee: as nagh dug ad nyn dreishteil ayns e chooney.

²⁴ Myr shen ren eh ny bodjallyn heose y haarey: as doshil eh dorryssyn yn aer.

²⁵ Gheayrt eh neose orroo myrgeddin frassyn dy Vanna dy ee: as hug eh beaghey daue veih niau.

²⁶ Myr shen ren dooinney bee ainleyn y ee: son hug eh daue beaghey dy-liooar.

²⁷ Hug eh er y gheay niar dy heidey fo’n aer: as trooid e phooar hug eh lesh stiagh yn gheay-neear-ass.

²⁸ Gheayrt eh feill neose orroo cha chiu as joan: as eeanlee skainagh myr geinnagh ny marrey.

²⁹ Lhig eh da tuittym mastey ny cabbaneyn oc: dy-jarroo eer mygeayrt nyn gummallyn.

³⁰ Myr shen ren ad gee, as v’ad jeant magh, son hug eh daue nyn aigney hene: cha row ad giarit jeh nyn yeearree.

³¹ Agh choud as va’n bee foast ayns nyn meeall, haink jymmoose trome Yee orroo, as varr eh yn vooinjer by verchee jeu: dy-jarroo, as voaill eh sheese ny reih deiney va ayns Israel.

³² Agh son shoh as ooilley, hie ad ny sodjey er nyn doshiaght ayns peccah: as cha chred ad ny obbraghyn yindyssagh echey.

³³ Shen-y-fa ny laghyn oc hug eh shiaghey ayns fardaalys: as ny bleeantyn oc ayns seaghyn.

³⁴ Tra stroie eh ad, ren ad eh y hirrey: as hyndaa ad ad hene dy-moghey, as ren ad briaght lurg Jee.

³⁵ As chooinee ad dy nee Jee va’n niart oc: as dy row yn Jee ard nyn Ver-kionnee.

³⁶ Ny-yeih, cha ren ad agh brynnyraght rish lesh nyn meeall: as foalsaght y yannoo rish lesh nyn jengey.

³⁷ Son cha row yn cree oc slane leshyn: cha-moo ren ad tannaghtyn shickyr ayns e chonaant.

³⁸ Agh v’eh cha myghinagh shen, dy leih eh daue nyn voiljyn: as cha ren eh ad y stroie.

³⁹ Dy-jarroo, shimmey keayrt hyndaa eh e chorree ersooyl: as cha lhiggagh eh da’n slane jymmoose echey brishey magh.

⁴⁰ Son chooinee eh nagh row ad agh feill: as nagh row ad agh myr geay ta goll ersooyl as nagh vel cheet reesht.

⁴¹ Shimmey keayrt ren ad eh y vrasnaghey ’syn aasagh: as eh y heaghney ’sy chaitnys ghennish.

⁴² Hyndaa ad back as ren ad Jee y vrasnaghey: as ghreinnee ad yn Er Casherick ayns Israel.

⁴³ Cha smooinee ad er y laue echey: as er y laa tra ren eh ad y livrey veih laue yn noid.

⁴⁴ Kys v’eh er n’obbraghey e virrillyn ayns Egypt: as e yindyssyn ayns magher Zoan.

⁴⁵ Hyndaa eh ny hushtaghyn gys fuill: myr shen nagh dod ad giu jeh ny awinyn.

⁴⁶ Hug eh meeyllyn ny mast’ oc, dy chur mow ad: as froggyn dy stroie ad.

⁴⁷ Hug eh yn vess oc da’n phraddag [caterpillar]: as yn laboraght oc da’n locust.

⁴⁸ Stroie eh ny biljyn-feeyney oc lesh claghyn-sniaghtee: as ny biljyn-mulberry oc lesh y rio.

⁴⁹ Voaill eh yn ollagh oc myrgeddin lesh claghyn-sniaghtee: as ny shioltaneyn oc lesh claghyn-taarnee.

⁵⁰ Hilg eh eulys e chorree orroo, farg, jymmoose, as seaghyn: as hug eh magh drogh ainleyn ny-vud oc.

⁵¹ Hug eh raad da e elgys, as cha ren eh yn annym oc y haghney veih baase: agh livrey eh seose yn vioys oc gys y chramp;

⁵² As voaill eh ooilley yn chied v’er nyn ruggey ayns Egypt: yn vooinjer b’yrjey as by niartal ayns cummallyn Ham.

⁵³ Agh er son e phobble hene, ren eh ad y leeideil magh myr kirree: as hug eh lesh ad ’syn aasagh myr shioltane.

⁵⁴ Hug eh lesh ad magh dy-sauchey, nagh jinnagh ad aggle y ghoaill: as vaih eh nyn noidyn lesh yn aarkey.

⁵⁵ As hug eh lesh ad cheu-sthie jeh cagliaghyn e ynnyd casherick: dy-jarroo gys y chronk t’eshyn er chionnaghey lesh e laue yesh.

⁵⁶ Hilg eh magh ny ashoonyn-quaagh myrgeddin kiongoyrt roo: hug eh er y cheer oc dy ve er ny rheynn ny mast’ ocsyn son eiraght, as hug eh er sheelogheyn Israel dy chummal ayns ny cabbaneyn oc.

⁵⁷ Myr shen vrasnee ad as hug ad jymmoose er y Jee smoo ard: as cha dreill ad ny recortyssyn echey;

⁵⁸ Agh hyndaa ad nyn gooyll, as huitt ad ersooyl goll-rish ny shenn-ayraghyn oc: leïme ry-liattee myr bhow brisht.

⁵⁹ Son ren ad eh y heaghney lesh nyn altaryn ayns ynnydyn ard: as vrasnee ad eh gys jymmoose lesh ny jallooyn oc.

⁶⁰ Tra cheayll Jee shoh, v’eh corree: as ghow eh jymmoose trome noi Israel;

⁶¹ Myr shen dy hreig eh yn cabbane-agglish ayns Silo: dy-jarroo yn cabbane v’eh er hoiaghey seose mastey deiney.

⁶² Livrey eh yn phooar oc harrish gys cappeeys: as yn aalid oc gys laue yn noid.

⁶³ Livrey eh yn pobble echey myrgeddin harrish gys y chliwe: as v’eh jymmoosagh rish e eiraght.

⁶⁴ Ren yn aile ny deiney aegey oc y stroie: as cha row ny moidynyn oc er nyn ghoyrt ayns poosey.

⁶⁵ Va ny saggyrtyn oc er nyn stroie lesh y chliwe: as cha row mraane-treoghe erbee dy yannoo dobberan.

⁶⁶ Myr shen ghooisht yn Chiarn myr fer ass cadley: as myr fowyr er ny niartaghey lesh feeyn;

⁶⁷ Voaill eh ny noidyn echey ayns ny ayrnyn cheu-chooylloo: as hug eh ad gys nearey kinjagh.

⁶⁸ Dobb eh cabbane-agglish Yoseph: as cha ren eh reih sheeloghe Ephraim;

⁶⁹ Agh reih eh sheeloghe Yudah: dy-jarroo cronk Sion bynney lesh.

⁷⁰ As ayns shen hrog eh e hiamble dy-ard: as hoie eh yn undin echey, myr y thalloo t’eh er n’yannoo son eashyn.

⁷¹ Reih eh myrgeddin David e harvaant: as ghow eh ersooyl eh veih ny bwoaillchyn-keyrragh;

⁷² Myr v’eh geiyrt er ny kirree trome lesh eayin, ghow eshyn eh: dy voddagh eh bochillaght Jacob e phobble, as Israel e eiraght.

⁷³ Myr shen yeeagh eh daue lesh cree ynrick as firrinagh: as reill eh ad dy-tushtagh lesh ooilley e phooar.