Psalmyn 77 - Lioar ny Psalmyn 1765 (Pointed)

PSAL. 77. Voce mea.

¹ Eam-ym gys Jee lesh my choraa: dy-jarroo gys Jee nee’m geamagh lesh my choraa, as nee eh m'y chlashtyn.

² Ayns traa my heaghyn hirr mee yn Chiarn: ren my hing roih, as cha ghow eh fea fud-ny-hoie; ren m’annym gerjagh y obbal.

³ Tra ta mee ayns trimshey, smooinee-ym er Jee: tra ta my chree seaghnit, nee’m gaccan.

⁴ T’ow cummal my hooillyn dooisht: ta mee cha annoon nagh voddym loayrt.

⁵ Ta mee er smooinaghtyn rhym pene er laghyn y chenn earish: as er ny bleeantyn t’er n’gholl shiaghey.

⁶ Ta mee tayrn gys cooinaghtyn m’arrane: as ayns yn oie ta mee resooney rish my chree hene, as ronsaghey magh m’annym.

⁷ Jean y Chiarn eh hene y reayll voym son dy-bragh: as nagh bee eh foayroil arragh?

⁸ Vel e vyghin dy-slane er n’immeeaght son dy-bragh: as vel e ghialdyn er jeet dy-bollagh gys jerrey brâ?

⁹ Vel Jee er yarrood dy ve graysoil: as jean eh dooney e chenjallys-ghraihagh ayns jymmoose?

¹⁰ As dooyrt mee, She m’annooinid hene eh: agh cooinee-yms er bleeantyn laue yesh yn Er smoo syrjey.

¹¹ Nee’m cooinaghtyn er obbraghyn y Chiarn: as tayrn-ym gys my smooinaghtyn ny yindyssyn ayds ayns y chenn earish.

¹² Nee’m smooinaghtyn myrgeddin er ooilley dt’obbraghyn: as bee my haggloo jeh dty yannoo.

¹³ Dty raad, O Yee, te casherick: quoi eh ta Jee cha niartal as y Jee ain?

¹⁴ Uss y Jee ta jannoo yindyssyn: as t’er hoilshaghey dty phooar mastey’n pobble.

¹⁵ T’ow dy niartal er livrey dty phobble: dy-jarroo mec Yacob as Yoseph.

¹⁶ Honnick ny hushtaghyn oo, O Yee, honnick ny hushtaghyn oo, as v’ad agglit: ny diunidyn myrgeddin v’ad er nyn seiy.

¹⁷ Gheayrt ny bodjallyn magh ushtey, ren yn aer thaarnaghey: as hie dty hideyn magh dy-lhean.

¹⁸ Va feiyr dty haarnagh er ny chlashtyn dy-chooilley raad mygeayrt: ren dty hendeil cur soilshey er y thalloo, va’n ooir er ny ghleashaght, as ooilley er-creau.

¹⁹ Ta dty raad ayns yn aarkey, as dty chassanyn ayns ny hushtaghyn mooarey: as kesmadyn dty choshey, cha vel ad er nyn gronnaghey.

²⁰ Ren oo dty phobble y leeideil myr kirree: liorish laueyn Voses as Aaron.