Psalmyn 74 - Lioar ny Psalmyn 1765 (Pointed)

PSAL. 74. Ut quid Deus.

¹ O Yee, cre’n-fa t’ow freayll oo hene voïn choud dy hraa: cre’n-fa ta dty yymmoose cha cheh noi kirree dty phastyr?

² O smooinee er dty phobble t’ow er chionnaghey, as er veaysley er dyn chenn earish.

³ Smooinee er sheeloghe dt’eiraght: as er cronk Sion, ayn t’ow er chummal.

⁴ Trogg seose dty chassyn, dy vod oo dy-bollagh dy-chooilley noid y stroie: t’er n’yannoo olk ayns dt’ynnyd casherick.

⁵ Ta dty noidyn gullaghey ayns mean dty haglym cooidjagh: as soiaghey seose nyn mergaghyn son cowraghyn.

⁶ Eshyn ren feigh y ghiarey sheese roish nish ass ny biljyn chiu: v’eh ry akin dy chur lesh eh gys obbyr aalin.

⁷ Agh nish t’ad brishey sheese ooilley yn obbyr granit eck: lesh teighyn as oardyn.

⁸ T’ad er hoiaghey dt’ynnydyn casherick er aile: as er lhieggal sheese ynnyd-vaghee dt’Ennym, eer gys y laare.

⁹ Dy-jarroo, dooyrt ad ayns nyn greeaghyn, Lhig dooin ad y stroie dy-bollagh ooilley-cooidjagh: myr shoh t’ad er lostey seose ooilley thieyn Yee ’sy cheer.

¹⁰ Cha vel shin fakin nyn gowraghyn; cha vel phadeyr er-mayrn: cha vel unnane ta toiggal caid.

¹¹ O Yee, caid nee eshyn ta dt’oï yn vee-onnor shoh y yannoo: caid nee yn noid loayrt dy-mollaghtagh noi dt’Ennym, nee son dy-bragh?

¹² Cre’n-fa t’ow tayrn back dty laue: kys te nagh vel oo goaill dty laue yesh ass dt’oghrish dy chur mow yn noid?

¹³ Son Jee my Ree er dyn chenn earish: yn cooney ta jeant er y thalloo, eh hene ta dy yannoo eh.

¹⁴ Ren oo yn aarkey y scarrey trooid dty phooar: vrish oo khing ny dragonyn ayns ny ushtaghyn.

¹⁵ Voaill oo khing y Leviathan ayns peeshyn: as hug oo eh dy ve son beaghey da’n pobble ayns yn aasagh.

¹⁶ Hug oo lhiat farraneyn, as ushtaghyn magh ass ny creggyn creoi: hyrmee oo seose ushtaghyn niartal.

¹⁷ She lhiats yn laa, as lhiats yn oie: uss t’er phointeil yn soilshey as y ghrian.

¹⁸ T’ow er hoiaghey ooilley cagliaghyn ny hooirey: t’ow er yannoo sourey as geurey.

¹⁹ Cooinee er shoh, O Hiarn, kys ta’n noid er oltooaney: as kys ta’n pobble ommijagh er loayrt goan mollaghtagh noi dt’Ennym.

²⁰ O ny livrey annym dty chalmane meen gys earroo ny noidyn: as ny jarrood sheshaght ny boghtyn son dy-bragh.

²¹ Jeeagh er y chonaant: son ta ooilley yn ooir laane dy ghorraghys as dy chummallyn dewil.

²² O ny lhig da’n vooinjer gyn loght goll roue lesh nearey: agh lhig da ny boghtyn as ny ymmyrchee moylley ’choyrt da dt’Ennym.

²³ Trogg, O Yee, jean dty chooish hene y chummal seose: cooinee kys ta’n dooinney ommijagh dy dt’oltooaney dy-chooilley laa.

²⁴ Ny jarrood coraa dty noidyn: ta’n daanys vooaralagh ocsyn ta feoh oc ort, gaase dy-kinjagh ny smoo as ny smoo.