Psalmyn 73 - Lioar ny Psalmyn 1765 (Pointed)

EVENING PRAYER. PSAL. 73. Quam bonus Israel!

¹ Dy-firrinagh ta Jee graihagh er Israel: dy-jarroo er nyn lheid as ta jeh cree glen.

² Ny-yeih, va my chassyn faggys er n’gholl voym: va my chesmadyn er-gerrey dy skyrraghtyn.

³ As cre’n-oyr? va mee seaghnit er coontey ny mee-chrauee: ta mee myrgeddin fakin drogh ’leih ayns lheid y raah.

⁴ Son cha vel ad ayns gaue erbee jeh’n vaase: agh t’ad trean as lajer.

⁵ Cha vel ad cheet ayns drogh-haghyrt erbee myr sleih elley: cha-moo t’ad er nyn gerraghey myr deiney elley.

⁶ As shoh yn oyr dy vel ad sheidit seose lesh moyrn: as coodit harrish lesh dewlys.

⁷ Ta ny sooillyn oc gatt lesh riurid: as t’ad jannoo dy-jarroo myr sailliu.

⁸ T’ad mhilley sleih elley, as dy-mee-chrauee loayrt goan mollaghtagh: ta’n ghlare oc noi yn Er-syrjey;

⁹ Son t’ad sheeyney magh nyn meeall noi niau: as ta’n chengey oc goll trooid y theihll.

¹⁰ Shen-y-fa ta’n pobble tuittym lhieu: as cha nee beggan cosney t’ad dy hayrn ass shen.

¹¹ Twish, t’ad gra, Kys ver Jee tastey da: vel fyssyree ayns yn Er-syrjey?

¹² Jeeagh, ad shoh ny mee-chrauee, ad shoh ta bishaghey ayns y theihll, as oc shoh ta berchys ayns nyn gummal: as dooyrt mee, Eisht ta mish er ghlenney my chree ayns fardail, as er niee my laueyn ayns ônid.

¹³ Fey-ny-laa ta mee er ve er my cherraghey: as er my smaghtaghey dy-chooilley voghrey;

¹⁴ Dy-jarroo, as va mee er loayrt faggys myr ren adsyn: agh cur-my-ner, veïn eisht er gheyrey sheeloghe dty cloan.

¹⁵ Eisht ghow mee ayns laue dy hoiggal shoh: agh ve ro ghoillee er my hon,

¹⁶ Derrey hie mee stiagh ayns ynnyd-casherick Yee: eisht hoigg mee jerrey ny deiney shoh;

¹⁷ Ta shen, Kys t’ow uss dy hoiaghey ad ayns ynnydyn shliawin: as dy hilgey ad sheese, as dy stroie ad.

¹⁸ Oh, cre cha leah as t’ad goll naardey: cherraghtyn, as cheet gys jerrey agglagh!

¹⁹ Dy-jarroo, eer myr dreamal tra ta fer doostey: myr shen ver oo er y chaslys oc dy lheïe ersooyl ass yn ard-valley.

²⁰ Shoh myr va my chree seaghnit: as hie eh eer trooid my veeghyn.

²¹ Cha ommijagh shen va mee, as cha mee-hushtagh: dy-jarroo myr dy beagh eh baagh kiongoyrt rhyts.

²² Ny-yeih, ta mee kinjagh liort’s: son t’ow er my chummal rish my laue yesh.

²³ Nee oo m'y leeideil lesh dty choyrle: as ny lurg m'y ghoaill gys gloyr.

²⁴ Quoi t’aym ayns niau agh uss: as cha vel unnane erbee er y thalloo ta mee dy yeearree ayns solaghey jeeds.

²⁵ Ta m’eill as my chree failleil: agh ta Jee niart my chree, as my hoghyr son dy-bragh.

²⁶ Son cur-my-ner, nee adsyn ta dy dty hreigeil, cherraghtyn: t’ow er stroie adsyn ooilley ta kyndagh jeh maarderys dt’oï.

²⁷ Agh te mie er my hon’s dy chummal shickyr gys Jee, dy chur my hreishteil ayns y Chiarn Jee: as loayrt jeh ooilley dt’obbraghyn ayns giattyn inneen Sion.