Psalmyn 72 - Lioar ny Psalmyn 1765 (Pointed)

PSAL. 72. Deus, judicum.

¹ Cur da’n Ree dty vriwnyssyn, O Yee: as dty chairys da mac y Ree.

² Eisht nee eh dty phobble y vriwnys cordail rish cairys: as nee eh ny boghtyn y endeil.

³ Ver ny sleïtyn myrgeddin lhieu shee: as ny croink veggey cairys da’n pobble.

⁴ Freilee eh yn vooinjer ôney ayns nyn gair: cloan y voght nee eh y endeil, as ny tranlaasee y cherraghey.

⁵ Gow-ee ad aggle royd choud as ta’n ghrian as yn eayst er-mayrn: veih un heeloghe gys sheeloghe elley.

⁶ Hig eh neose myr y fliaghey ayns loamrey olley: dy-jarroo myr ny bineyn ta gushtaghey yn thalloo.

⁷ Ayns y lhing echeysyn nee yn vooinjer chairagh bishaghey: dy-jarroo, as palchey dy hee, choud as ta’n eayst farraghtyn.

⁸ Bee yn reilltys echey myrgeddin veih un aarkey gys faarkey elley: as veih’n awin vooar gys ayrnyn sodjey yn ooir.

⁹ Adsyn ta vaghey ’syn aasagh nee ad gliooney sheese kiongoyrt rish: nee e noidyn yn joan y liee.

¹⁰ Reeaghyn Tharsis as ny ellanyn, ver ad lhieu toyrtyssyn: ver reeaghyn Arabia as Saba lhieu giootyn.

¹¹ Nee dy-chooilley ree tuittym sheese kiongoyrt rish: nee dy-chooilley ashoon eh y hirveish.

¹² Son nee eh yn boght y livrey tra t’eh geam: yn ymmyrchagh neesht, as eshyn nagh vel fer-coonee erbee echey.

¹³ Bee eh foayroil da’n vooinjer ôney as ny ymmyrchee: as nee eh anmeenyn ny boghtyn y choadey.

¹⁴ Nee eh ny anmeenyn oc y livrey veih foalsaght as aggair: as deyr vees yn uill oc ayns e hilley.

¹⁵ Bee eh bio, as dasyn vees er ny choyrt jeh airh Arabia: bee padjer er ny yannoo dy-kinjagh huggey, as gagh-laa vees moylley er ny choyrt da.

¹⁶ Bee palchey arroo er y thalloo, ard er ny croink: nee’n mess echey craa myr Libanus, as bee eh glass ’syn ard-valley myr faiyr er y thalloo.

¹⁷ Nee yn Ennym echey farraghtyn son dy-bragh, bee yn Ennym echey er-mayrn fo’n ghrian mastey ny sheelogheyn ta foast ry heet: vees er nyn mannaghey ny-hrooidsyn, as nee ooilley ny ashoonyn eh y voylley.

¹⁸ Bannit dy row yn Chiarn Jee, dy-jarroo yn Jee dy Israel: ta ny-lomarcan jannoo reddyn yindyssagh;

¹⁹ As bannit dy row Ennym yn Ard-ooashley echey son dy-bragh: as bee ooilley yn seihll er ny lhieeney lesh e Ard-ooashley. Amen, Amen.