Psalmyn 71 - Lioar ny Psalmyn 1765 (Pointed)

MORNING PRAYER. PSAL. 71. In te, Domine, speravi.

¹ Ayn-yds, O Hiarn, ta mee er choyrt my hreishteil; ny lhig dou dy-bragh v’er my choyrt gys nearey: agh feayshil orrym, as livrey mee ayns dty chairys; cromm dty chleaysh hym, as saue mee.

² Bee oo my chummal lajer, huggey oddyms kinjagh goll son sauchys: t’ow er yialldyn dy chooney lhiam; son oo thie m’endeilys as my chastall.

³ Livrey mee, O my Yee, veih pooar ny mee-chrauee: veih laue yn dooinney neu-chairagh as dewill.

⁴ Son dty lurg’s, O Hiarn Yee, ta mee goaill foddeeaght: uss my hreishteil, dy-jarroo veih m’aegid.

⁵ Liort ta mee er ny chummal seose neayr as ruggyr mee: uss ren m'y ghoaill ass breïn my vayrey; bee my voylley dy-bragh jeeds.

⁶ Ta mee er jeet dy ve shilley agglagh da ymmodee: agh ta my hreishteil shickyr ayn-yds.

⁷ O lhig da my veeall v’er ny lhieeney lesh dty voylley: dy voddym arrane y ghoaill jeh dty ghloyr as dty onnor slane liurid y laa.

⁸ Ny tilg mee ersooyl ayns my henn eash: ny treig mee tra ta my niart dy m’ailleil;

⁹ Son ta my noidyn loayrt m’oï, as t’adsyn ta lhie farkiaght son m’annym, coyrt nyn goyrle dy-cheïley, gra: Ta Jee er hreigeil eh; eiyr-jee er, as gow-jee eh; son cha vel fer erbee dy livrey eh.

¹⁰ Ny gow foddey voym, O Yee: my Yee, jean siyr dy chooney lhiam.

¹¹ Lhig dauesyn ta noi m’annym ve er nyn goyrt mow as cherraghtyn: lhig daue ve coodit lesh nearey as mee-ooashley ta shirrey dy yannoo aggair dou.

¹² Agh er my hon’s, nee’m dy-meen farkiaght dy-kinjagh: as moyll-ym oo ny smoo as ny smoo.

¹³ Loayr-ee my veeall dagh-laa jeh dty chairys as jeh dty livrey-ys: son cha nione dou yn earroo oc.

¹⁴ Hem magh ayns niart y Chiarn Jee: as loayr-ym ynrycan jeh dty chairys.

¹⁵ T’ow uss, O Yee, er m’ ynsaghey veih my aegid derrey nish: shen-y-fa soilshee-yms magh dty obbraghyn yindyssagh.

¹⁶ Ny treig mee, O Yee, ayns my henn eash, tra ta my chione lheeah: derrey ta mee er hoilshaghey dty niart da’n cheeloghe shoh, as dty phooar dauesyn ooilley ta foast roï cheet.

¹⁷ Ta dty chairys, O Yee, feer ard, as smooar ny reddyn shen t’ow er n’yannoo: O Yee, quoi ta dy ve er ny hoyllaghey hoods!

¹⁸ O cre’n seaghyn as yn arkys trome t’ow er choyrt my raad! as foast hyndaa oo as ren oo mee y ooraghey: dy-jarroo, as hug oo lhiat mee reesht veih diunid ny hooirey.

¹⁹ T’ow er chur lhiat mee gys onnor: as er my gherjaghey er dy-chooilley cheu;

²⁰ Shen-y-fa nee’m uss as dt’irriney y voylley, O Yee, cloie er greïe dy vingys: hoods goym arrane er y chlaasagh, O uss Er chasherick dy Israel.

²¹ Bee my veillyn gennal tra ta mee goaill arrane hoods: as myr shen vees m’annym t’ow uss er ny livrey.

²² Nee my hengey myrgeddin loayrt jeh dty chairys fey-ny-laa: son t’ad er nyn ghoyrt mow as er nyn ghoyrt lhieu gys nearey, ta shirrey olk y yannoo dooys.