Psalmyn 68 - Lioar ny Psalmyn 1765 (Pointed)

MORNING PRAYER. PSAL. 68. Exurgat Deus.

¹ Lhig da Jee girree seose, as lhig da e noidyn v’er nyn skeayley: lhig dauesyn myrgeddin ta dwoaie oc er, roie er-chea roïshyn.

² ’Naght myr ta’n jaagh goll ass nyn shilley, myr shen nee oo gimman ad ersooyl: as myr ta kere lheïe rish yn aile, myr shen lhig da’n vee-chrauee cherraghtyn ec kionfenish Yee.

³ Agh lhig da’n vooinjer chairagh ve gerjoil, as boggey ’ghoaill kiongoyrt rish Jee: lhig daue myrgeddin ve gennal as laane dy voggey.

⁴ O gow-jee arrane gys Jee, as arraneyn-moyllee gys e Ennym: cur-jee ard-voylley dasyn ta markiagh er ny niaughyn, myr er cabbyl; cur-jee moylley da ayns e Ennym Jah, as gow-jee boggey kiongoyrt rish.

⁵ Eshyn Ayr yn chloan gyn ayr, ta fendeil cooish ny mraane-treoghe: dy-jarroo Jee ayns e ynnyd-vaghee casherick.

⁶ Eshyn y Jee ta cur er deiney dy ve jeh un aigney ayns thie, as ta cur lesh ny pryssoonee magh ass cappeeys: agh lhiggey da ny wagaanee tannaghtyn ayns genney.

⁷ O Yee, tra hie uss magh roish y pobble: tra hie oo rowe trooid yn aasagh,

⁸ Chrie yn thalloo, as ren ny niaughyn shilley ec kionfenish Yee: myr va Sinai myrgeddin er ny chraa ec fenish Yee, eh ta Jee Israel.

⁹ Hug uss, O Yee, fliaghey graysoil er dt’eiraght: as dooiree oo eh tra ve tooillit.

¹⁰ Nee dty hioltane cummal ayn: son t’ow uss, O Yee, jeh dty vieys er chiarail son ny boghtyn.

¹¹ Ren y Chiarn yn fockle y choyrt: smooar va sheshaght ny preachooryn.

¹² Ren reeaghyn lesh nyn sheshaghtyn-caggee roih er-chea, as v’ad er nyn goyrt fo-chosh: as adsyn jeh’n lught-thie rheynn ad y spooilley.

¹³ Ga dy vel shiu er ve ny lhie mastey ny pooiyt, foast vees shiu myr skainyn calmane: ta coodit lesh skainyn argid, as ny fedjagyn eck goll-rish airh.

¹⁴ Tra ren yn Ooilley-niartal reeaghyn y skeayley er y choontey ocsyn: eisht v’ad cha gial as sniaghtey ayns Salmon.

¹⁵ Myr ta cronk Vasan, myr shen ta cronk Yee: dy-jarroo cronk ard, myr cronk Vasan.

¹⁶ Cre’n-fa ta shiu lieme myr shen, shiuish chroink ard? shoh cronk Yee, ayn s’gooidsave lesh dy chummal: dy-jarroo, nee yn Chiarn tannaghtyn ayn son dy-bragh.

¹⁷ Ta fainee Yee feed thousane, dy-jarroo thousaneyn dy ainlyn: as ta’n Chiarn ny mast’ oc, myr ayns ynnyd casherick Sinai.

¹⁸ T’ow er n’gholl seose er yn yrjid, t’ow er leeideil cappeeys ayns bondiaght, as er gheddyn giootyn son deiney: dy-jarroo, son dt’eer noidyn, dy voddagh y Chiarn Jee cummal ny mast’ oc.

¹⁹ Moylley dy row gys y Chiarn gagh-laa: dy-jarroo yn Jee ta cooney lhien, as deayrtey e hoyrtyssyn orrin.

²⁰ Eshyn y Jee ain, dy-jarroo yn Jee veih ta cheet nyn saualtys: Jee yn Chiarn, liorishyn ta shin shiaghney baase.

²¹ Nee Jee broo kione e noidyn: as claigin renaigagh lheid y fer as ta goll kinjagh er e hoshiaght ayns e vee-chraueeaght.

²² Ta’n Chiarn er ghra, Ver-yms lhiam my phobble reesht, myr ren mee veih Basan: my vooinjer hene ver-ym lhiam reesht myr ren mee keayrt dy-row veih diunid ny marrey;

²³ Dy vod dty chass ve er ny hummey ayns fuill dty noidyn: as dy vod chengey dty voddee ve jiarg lesh yn uill cheddin.

²⁴ Smie te ry akin, O Yee, kys t’ow uss gimmeeaght: kys t’ow uss, my Yee as Ree, gimmeeaght ayns yn ynnyd casherick.

²⁵ T’adsyn ta goaill arraneyn shooyll hoshiaght, adsyn ta jannoo bingys er greïnyn-kiaull cheet nyn-yeï: ayns y vean ta ny mraane-aegey cloie er ny timbrelyn.

²⁶ Cur booise, O Israel, da Jee yn Chiarn ayns y chaglym cooidjagh: veih grunt y chree.

²⁷ Ayns shen ta Benjamin beg nyn er-reill, as prinsyn Yuda nyn fir-choyrlee: prinsyn Zabulon, as prinsyn Nephthali.

²⁸ Ta dty Yee er choyrt magh niart er dty hon’s: jean y red y hickyraghey, O Yee, t’ow er n’obbraghey aynin.

²⁹ Son graih dty hiamble ec Jerusalem: myr shen ver reeaghyn lhieu giootyn hoods.

³⁰ Tra vees sheshaght ny deiney-shleiy, as earrooyn ny deiney niartal er nyn skeayley dy-lhean (mastey feïeys y pobble,) myr shen dy vel ad dy-imlee cur lhieu peeshyn dy argid: as tra t’eh er skeayley yn pobble ta goaill taitnys ayns caggey;

³¹ Eisht hig ny prinsyn magh ass Egypt: nee cheer ny Morianee dy-leah ny laueyn eck y heeyney magh gys Jee.

³² Gow-jee arrane gys Jee, O shiuish reeriaghtyn yn ooir: O gow-jee arraneyn-moyllee gys y Chiarn,

³³ Ta ny hoie ayns ny niaughyn er-skyn ooilley er dyn toshiaght: cur-my-ner, t’eh cur magh e choraa, dy-jarroo, as shen coraa niartal.

³⁴ Gow-jee rish dy nee ec Jee ta’n phooar harrish Israel: ta e ooashley as e niart ayns ny bodjallyn.

³⁵ O Yee, yindyssagh t’ow uss ayns dt’ynnydyn casherick: dy-jarroo yn Jee dy Israel; ver eshyn niart as pooar da e phobble; bannit dy row Jee.