Psalmyn 66 - Lioar ny Psalmyn 1765 (Pointed)

PSAL. 66. Jubilate Deo.

¹ O bee-jee gerjoil ayns Jee, ooilley shiuish cheeraghyn: gow-jee arraneyn-moyllee gys onnor e Ennym; cur-jee er e voylley dy ve gloyroil.

² Abbyr-jee rish Jee, O cre cha yindyssagh as t’ow ayns dt’obbraghyn: trooid mooads dty phooar vees dty noidyn er nyn gheddyn nyn mreageryn ayns dt’enish.

³ Son nee ooilley yn seihll ooashley ’chur dhyt: goaill arrane jeed, as moylley dt’Ennym.

⁴ O tar-jee ayns shoh, as cur-jee tastey da obbraghyn Yee: cre cha yindyssagh as t’eh ayns e yannoo gys cloan gheiney!

⁵ Hyndaa eh yn faarkey gys thalloo chirrym: myr shen dy jagh ad trooid yn ushtey rish nyn gosh; ayns shen ghow shin boggey jeh.

⁶ T’eh reill lesh e phooar son dy-bragh; ta e hooillyn cur tastey da’n pobble: as ny lheid as nagh jean credjal, cha bee abyl ad hene y hoiaghey seose.

⁷ O cur-jee moylley da’n Jee ain, shiuish phobble: as cur-jee er coraa e voylley dy ve er ny chlashtyn;

⁸ Ta freayll yn annym ain ayns bioys: as nagh vel lhiggey da nyn gassyn dy skyrraghtyn,

⁹ Son t’ow uss, O Yee, er phrowal shin: t’ow myrgeddin er hrial shin, myr ta argid er ny hrial.

¹⁰ Hug oo lhiat shin ayns y ribbeh: as hug oo seaghyn er nyn meeaghyn.

¹¹ Lhig oo da deiney dy varkiagh harrish nyn ghing: hie shin trooid aile as ushtey, as hug oo lhiat shin magh gys ynnyd berchagh.

¹² Hem stiagh gys dty hie lesh chebballyn-losht: as eeck-ym dhyt my vreearaghyn, yiall mee lesh my veillyn, as loayr mee lesh my veeall, tra va mee ayns seaghyn.

¹³ Chebb-yms dhyt ourallyn-losht roauyrey, marish oural millish reaghyn: chebb-ym dew as goair.

¹⁴ O tar-jee ayns shoh, as eaisht-jee, ooilley shiuish ta goaill aggle roish Jee: as insh-ym diu cre t’eh er n’yannoo son m’annym.

¹⁵ Deïe mee er lesh my veeall: as hug mee moylley da lesh my hengey.

¹⁶ My ta my chree goaill taitnys ayns mee-chairys: cha jean y Chiarn m'y chlashtyn.

¹⁷ Agh ta Jee er my chlashtyn: as er choyrt tastey da coraa my phadjer.

¹⁸ Moylley dy row gys Jee, nagh vel er hoiaghey beg jeh my phadjer: ny er hyndaa e vyghin voym.